കൊച്ചി: ജനങ്ങള്ക്കു മുമ്പില് വികസന അജണ്ട ഉയര്ത്തിപ്പിടിച്ചുള്ള തെരഞ്ഞെടുപ്പു പ്രചാരണത്തിനാണ് രൂപം നല്കുന്നതെന്ന് ബിജെപി സംസ്ഥാന ജനറല് സെക്രട്ടറി എം.ടി. രമേശ്. സംസ്ഥാന നേതൃയോഗ തീരുമാനങ്ങള് വിശദീകരിക്കുകയായിരുന്നു അദ്ദേഹം.
ദേശീയതലത്തിലും പ്രാദേശികതലത്തിലും ഗ്രാമപഞ്ചായത്ത് വാര്ഡ് തലത്തിലും വിഷയങ്ങള് തിരിച്ചറിഞ്ഞ് വികസന അജണ്ടയാണ് ജനങ്ങള്ക്ക് മുമ്പില് അവതരിപ്പിക്കുക. അജണ്ട മുന്നിര്ത്തിയുള്ള പ്രചാരണമാണ് കേരളത്തില് വേണ്ടത്. അതാണ് കേരളത്തിലെ എല്ലാ പ്രശ്നങ്ങള്ക്കുമുള്ള പരിഹാരമെന്നാണ് നേതൃയോഗം ഉദ്ഘാടനം
ചെയ്ത് കേന്ദ്ര ആഭ്യന്തര മന്ത്രി അമിത് ഷാ സൂചിപ്പിച്ചത്.
കേരളത്തിന്റെ വികസന പ്രതിസന്ധി, സാമ്പത്തിക പ്രതിസന്ധി, സുരക്ഷാ മേഖലയ്ക്കുണ്ടാകുന്ന വീഴ്ച ന്നിവയ്ക്കുള്ള പരിഹാരം 2026ല് കേരളത്തില് എന്ഡിഎ സര്ക്കാര് അധികാരത്തിലെത്തുകയെന്നതാണ്. ഇതിന് മുന്നോടിയായി വരാന് പോകുന്ന തദ്ദേശ തെരഞ്ഞെടുപ്പുകളെ മാറ്റുന്ന റൂട്ട് മാപ്പാണ് അമിത് ഷാ യോഗത്തില് അവതരിപ്പിച്ചത്. വലിയ ലക്ഷ്യത്തിലേക്കുള്ള ആദ്യ ചവിട്ടുപടിയായി തദ്ദേശ തെരഞ്ഞെടുപ്പിനെ കാണുന്നു.
കുറുക്കുവഴികളില്ലെന്നും കഠിനാധ്വാനത്തിലൂടെ അടിത്തട്ടില് പ്രവര്ത്തിച്ചാലേ വിജയിക്കാനാകൂ എന്നുമാണ് അമിത് ഷാ നല്കിയ സന്ദേശം. 26 മുതല് അടുത്ത മാസം രണ്ടു വരെ നടക്കുന്ന മേഖലാ ശില്പ്പശാലകളില് വികസന അജണ്ടകള് ചര്ച്ച ചെയ്യും. ഇവിടെ അവതരിപ്പിച്ച റൂട്ട് മാപ്പിന്റെ വിശദമായ ചര്ച്ചകളും നടക്കും.
സപ്തംബര് 30 ആകുമ്പോഴേക്കും വാര്ഡ് തലത്തില് വരെ ഈ വികസന അജണ്ട പ്രാവര്ത്തികമാക്കാനുള്ള പദ്ധതികള് രൂപീകരിക്കും. ഒക്ടോബര് രണ്ട് സ്വച്ഛ് ഭാരത് ദിനമായി ആചരിക്കും. വാര്ഡ് തലത്തില് സപ്തംബര്, ഒക്ടോബര് മാസങ്ങളില് ജനകീയ കണ്വന്ഷന് സംഘടിപ്പിക്കും. വാര്ഡുകളിലെ ജനകീയ പ്രശ്നങ്ങള് ചര്ച്ച ചെയ്യാനുള്ള അദാലത്തുകള് സംഘടിപ്പിക്കും. വാര്ഡ് വികസന സന്ദേശ യാത്രകള് നടത്തും.
ആഭ്യന്തര സുരക്ഷയെ സംബന്ധിച്ച് കേന്ദ്ര ഏജന്സികള് നിരന്തരം നല്കുന്ന റിപ്പോര്ട്ടുകള് പ്രകാരമുള്ള നടപടികള് സ്വീകരിക്കാന് മാറിമാറി വരുന്ന സംസ്ഥാന സര്ക്കാരുകള് തയാറാകുന്നില്ല. പിഎഫ്ഐ നിരോധന ശേഷം അവരുടെ സ്ലീപ്പിങ് സെല്ലുകള് മറ്റു പല രൂപത്തിലും പ്രവര്ത്തിക്കുന്നെന്നു കേന്ദ്ര രഹസ്യാന്വേഷണ വിഭാഗങ്ങള് നിരവധി തവണ റിപ്പോര്ട്ട് ചെയ്തിട്ടുണ്ട്.
പുതിയ സംസ്ഥാന പോലീസ് മേധാവി തന്നെ കാര്യങ്ങള് തുറന്ന് സമ്മതിച്ചിട്ടുമുണ്ട്. എസ്ഡിപിഐ ലേബലിലും മറ്റ് ചില സംഘടനകളുടെ പേരിലും ഭീകര പ്രവര്ത്തനങ്ങള് നടക്കുന്നു. ഇതില് കേന്ദ്രം മുന്നറിയിപ്പ് നല്കിയിട്ടും അതിനെതിരായ നടപടിയൊന്നും സ്വീകരിച്ചിട്ടില്ല. കേരള തീരപ്രദേശങ്ങള് കേന്ദ്രീകരിച്ചു വലിയ തരത്തിലുള്ള ദേശവിരുദ്ധ പ്രവര്ത്തനങ്ങള് നടത്താന് പലരും ശ്രമിക്കുന്നു. അക്കാര്യത്തിലും ഇടപെടാന് സംസ്ഥാന സര്ക്കാര് തയാറാകുന്നില്ല. കുറ്റകരമായ അനാസ്ഥയാണ് ഇപ്പോഴത്തെ എല്ഡിഎഫ് സര്ക്കാരും മുന് യുഡിഎഫ് സര്ക്കാരും കാണിച്ചത്. യുഡിഎഫും എല്ഡിഎഫും ദേശ സുരക്ഷയെ മുന്നിര്ത്തിയുള്ളതൊന്നും ചെയ്യുന്നില്ലെന്നും അദ്ദേഹം പറഞ്ഞു.
ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര്, കേന്ദ്രമന്ത്രിമാരായ സുരേഷ് ഗോപി, ജോര്ജ് കുര്യന്, സംസ്ഥാന പ്രഭാരി പ്രകാശ് ജാവ്ദേക്കര്, സഹ പ്രഭാരി അപരാജിത സാരംഗി എംപി, സി. സദാനന്ദന് മാസ്റ്റര് എംപി, മുന് സംസ്ഥാന അധ്യക്ഷരായ വി. മുരളീധരന്, കുമ്മനം രാജശേഖരന്, സി.കെ. പദ്മനാഭന്, പി.കെ. കൃഷ്ണദാസ്, കെ. സുരേന്ദ്രന്, ദേശീയ ഉപാധ്യക്ഷന് എ.പി. അബ്ദുള്ളക്കുട്ടി, സംസ്ഥാന ജനറല് സെക്രട്ടറിമാരായ ശോഭ സുരേന്ദ്രന്, അഡ്വ. എസ്. സുരേഷ് എന്നിവര് നേതൃയോഗത്തില് പ്രസംഗിച്ചു.
