ന്യൂദല്ഹി: ഗഗന്യാന് ദൗത്യത്തിന് എല്ലാവിധ ആശംസകളും നേര്ന്ന് രാഷ്ട്രപതി ദ്രൗപദി മുര്മു. ബഹിരാകാശ യാത്രികന് ഗ്രൂപ്പ് ക്യാപ്റ്റന് ശുഭാംശു ശുക്ല, ഐഎസ്ആര്ഒ ചെയര്മാന് ഡോ. വി. നാരായണന് എന്നിവരടങ്ങുന്ന സംഘവുമായി നടത്തിയ കൂടിക്കാഴ്ചയിലാണ് രാഷ്ട്രപതി എല്ലാവിധ പിന്തുണയും ആശംസകളും അറിയിച്ചത്.
ഗ്രൂപ്പ് ക്യാപ്റ്റന് ശുഭാംശു ശുക്ല ബഹിരാകാശ യാത്രയിലെ തന്റെ അനുഭവങ്ങള് രാഷ്ട്രപതിയുമായി പങ്കുവയ്ക്കുകയും ചെയ്തു. ഗ്രൂപ്പ് ക്യാപ്റ്റന് പ്രശാന്ത് ബാലകൃഷ്ണന് നായര്, ഗ്രൂപ്പ് ക്യാപ്റ്റന് പുണ്യശ്ലോക് ബിസ്വാള്, ഹ്യൂമന് സ്പേസ് ഫ്ളൈറ്റ് സെന്റര് ഡയറക്ടര് ദിനേശ് കുമാര് സിങ് എന്നിവരും രാഷ്ട്രപതി ഭവനിലെത്തി മുര്മുവുമായി കൂടിക്കാഴ്ച നടത്തിയ സംഘത്തിലുണ്ടായിരുന്നു.
നേരത്തെ പ്രധാനമന്ത്രി നരേന്ദ്ര മോദി, കേന്ദ്രപ്രതിരോധമന്ത്രി രാജ്നാഥ് സിങ് തുടങ്ങിയവരുമായും സംഘം കൂടിക്കാഴ്ച നടത്തിയിരുന്നു. കേന്ദ്രമന്ത്രി ജിതേന്ദ്രസിങിനൊപ്പം മാധ്യമപ്രവര്ത്തകരുമായി സംവദിക്കുകയും ചെയ്തിരുന്നു.
