ആധുനിക വിദ്യാഭ്യാസവുമായി ബന്ധപ്പെട്ടു നമുക്ക് കൂടുതല് പ്രധാനവും പ്രസക്തവുമായത് അപരാവിദ്യയാണ്. പരമസത്തയുടെ നേരിട്ടനുഭവം ലഭ്യമാകാത്തതെല്ലാം അപരാവിദ്യ. ആദ്യം മനുഷ്യന് തേടിയതും നേടിയതും അപരാവിദ്യ. നാല് വേദങ്ങളും, വേദാംഗങ്ങളും അപരാ വിദ്യയില് പെടും. കൂടാതെ പുണ്യ ഗ്രന്ഥങ്ങള് മുഴുവനും, ഒപ്പം തന്നെ ലൗകിക – ഭൗതിക ശാസ്ത്ര ഗ്രന്ഥങ്ങളും അപരാവിദ്യയില് പെടുന്നു. ഇന്ദ്രിയ – മനോ -ബുദ്ധി വ്യാപാരങ്ങളാല് ആര്ജ്ജിക്കുന്ന അറിവുകളെല്ലാം അപരാവിദ്യയാണ്. ഭാരതത്തിലെ ആയിരക്കണക്കിന് ക്ഷേത്രങ്ങള്,ആശ്രമങ്ങള്, അവിടെയെല്ലാം പുലര്ത്തിപ്പോരുന്ന ആചാരങ്ങള്, അനുഷ്ഠാനങ്ങള്, വിവിധ ആധ്യാത്മിക സമ്പ്രദായങ്ങള് പിന്തുടരുന്ന ലക്ഷക്കണക്കിന് സന്യാസിമാര്, യോഗികള്, മുനിമാര്, ഗുരുക്കന്മാര് ഇവയെല്ലാം അപരാവിദ്യയാകുന്ന ചൂണ്ടുപലകകളാണ്.കൂടാതെ ഗ്രന്ഥ സമുച്ചയങ്ങളിലൂടെ നമുക്ക് ലഭ്യമായിട്ടുള്ള അനേകം ഭൗതിക വിജ്ഞാന ശാഖകളും അപരാവിദ്യയില് പെടുന്നു.
‘ഗണിതശാസ്ത്രം, ഊര്ജ്ജതന്ത്രം, രസതന്ത്രം, വാസ്തുവിദ്യ – അതില്ത്തന്നെ വ്യോമയാനം, സമുദ്രയാനം, ആയുധനിര്മ്മാണം, വൈദ്യ ശാസ്ത്രം, ജ്യോതിശാസ്ത്രം തുടങ്ങിയവയെല്ലാം തന്നെ ക്രി. മു. നാലായിരാമാണ്ടിനും ആയിരമാണ്ടിനും മധ്യേയാണ് രൂപം കൊണ്ടത്. ഭാരതീയ ശാസ്ത്രജ്ഞന്മാരായ അഥര്വ്വന്,വിശ്വാമിത്രന്, ശുനശെഫന്,വാമദേവന്,മേധാതിഥി,ദീര്ഘതമസ്സ്,ഗാര്ഗ്യന് മുതലായവര് നല്കിയിട്ടുള്ള സംഭാവനകളിലേക്കു കണ്ണോടിക്കുന്ന നാം നിശ്ചയമായും അഭിമാന പുളകിതരാകും. ആര്യഭടന്, വരാഹമിഹിരന് എന്നിവര് വെളിപ്പെടുത്തുന്ന രഹസ്യങ്ങളും, ഭാസ്കരീയം മുതലായ ഗ്രന്ഥങ്ങളില് പലേടത്തും കാണുന്ന ഗവേഷണങ്ങളും ആശ്ചര്യജനകമാണ്’ (ടി ആര് സോമശേഖരന്, ‘ഭാരതത്തിന്റെ ശാസ്ത്ര പാരമ്പര്യം’).
പല ശാസ്ത്രങ്ങളുടെയും വേരുകള് അന്വേഷിച്ചു ചെന്നാല് നാമെത്തുന്നത് വേദങ്ങളിലായിരിക്കും. ആയിരത്തോളം ഔഷധ ചെടികളെക്കുറിച്ചു ഋഗ്വേദത്തില് പരാമര്ശമുണ്ടെന്നു പറയുന്നു.രോഗലക്ഷണങ്ങളെക്കുറിച്ചും, രോഗ കാരണങ്ങളെക്കുറിച്ചും, സൂക്ഷ്മജീവികളെ കുറിച്ചും, നൂറു തരത്തിലുള്ള ക്ഷയ രോഗങ്ങളെ കുറിച്ചും അഥര്വ വേദത്തില് പറയുന്നു. ഗര്ഭോപനിഷത് ഭ്രുണവിജ്ഞാനവും, സുബലോപനിഷത് പ്രപഞ്ച വിജ്ഞാനവും കൈകാര്യം ചെയ്യുന്നു. നൗകകളും, സമുദ്രയാനവും, പല തരത്തിലുള്ള റോഡുകളും ഒക്കെ വേദങ്ങളില് വിഷയങ്ങളാണ്. ഒപ്പം തന്നെ ഉപവേദങ്ങളാകുന്ന ആയുര്വേദം (വൈദ്യശാസ്ത്രം), ധനുര്വേദം (ആയുധ ശാസ്ത്രം) ഗന്ധര്വവേദം (സൗന്ദര്യശാസ്ത്രം), സ്ഥാപത്യവേദം (വാസ്തു ശാസ്ത്രം) മുതലായവയും വികസിച്ചു വന്നു.
ഈ ലൗകിക – ഭൗതിക അറിവുകള് ഇഹലോക ജീവിതത്തിനു വേണ്ടിയായിരുന്നെങ്കിലും ഇവക്കെല്ലാം ഒരു ദൈവിക തലമുണ്ട് എന്നുള്ളത് ഭാരതത്തിന്റെ മാത്രം പ്രത്യേകതയാണ്. ആയുര്വേദത്തിനും, ആയോധനകലക്കും , ശില്പ്പ ശാസ്ത്രത്തിനുമൊക്കെയുള്ള പ്രത്യേകം പ്രത്യേകം ദേവതകളും, ഉപാസനാക്രമങ്ങളും മുഖേന പ്രപഞ്ച ശക്തിയുമായി ബന്ധം പുലര്ത്തിയിരുന്നു. കൂടുതല് വ്യക്തമായി പറഞ്ഞാല്, ഭാരതത്തില് നിലനിന്നിരുന്ന ചാര്വാക സിദ്ധാന്തമൊഴിച്ചുള്ള എല്ലാ വേദാനുബന്ധ ചിന്തകളും അടിസ്ഥാനപരമായി ആധ്യാത്മികതയിലേക്കുള്ള ആദ്യപടിയാണ്.
ജന്മഭൂമി ഓണ്ലൈന്