തെരഞ്ഞെടുപ്പ് കമ്മിഷന് വ്യാപകമായി വോട്ടര് പട്ടികയില് കൃത്രിമം കാണിക്കുന്നുവെന്ന ആരോപണം ഉന്നയിച്ച കോണ്ഗ്രസ് നേതാവ് രാഹുലിന് മുഖ്യ തെരഞ്ഞെടുപ്പ് കമ്മിഷണര് ഗ്യാനേഷ് കുമാര് വ്യക്തമായ മറുപടി നല്കിയിരിക്കുകയാണ്. രാഹുല് ഉന്നയിച്ചതും, ചില മാധ്യമങ്ങള് ആവേശത്തോടെ പ്രചരിപ്പിച്ചതുമായ ആരോപണങ്ങള് അടിസ്ഥാനരഹിതമാണെന്ന് മുഖ്യ തെരഞ്ഞെടുപ്പ് കമ്മിഷണര് വ്യക്തമാക്കിയിരിക്കുന്നു. വീട്ടു നമ്പര് ഇല്ലാത്തവര്ക്കും വോട്ട് ചെയ്യാമെന്നും, സ്വന്തമായി വീടില്ലാത്തവരുടെ പേരുകള് വോട്ടര്പട്ടികയില് ഉണ്ടാവുമെന്നും കമ്മിഷന് പറഞ്ഞു. പൂജ്യം എന്ന വീട്ടുനമ്പറില് വോട്ടര്മാരെ ചേര്ത്തിരിക്കുന്നു എന്നായിരുന്നുവല്ലോ രാഹുലിന്റെ മുഖ്യ ആരോപണം. വോട്ടര്പട്ടികയില് ഒന്നിലേറെ സ്ഥലങ്ങളില് പേരുണ്ടെങ്കിലും ഒരിടത്തു മാത്രമേ വോട്ടുചെയ്യാനാവൂ എന്നും, വോട്ടര് പട്ടികയും വോട്ടിങ്ങും രണ്ടാണെന്നും കമ്മിഷന് ചൂണ്ടിക്കാണിച്ചു. വോട്ട് ചെയ്യുന്നതിന്റെ മെഷീന് റീഡിങ് അനുവദിക്കാനാവില്ലെന്നും, ഇങ്ങനെ ചെയ്യുന്നത് സ്വകാര്യതയുടെ ലംഘനമാണെന്ന് സുപ്രീം
കോടതി വിധിയുണ്ടെന്നും കമ്മിഷന് കോണ്ഗ്രസിന്റെ ആവശ്യത്തിന് മറുപടി നല്കിയിരിക്കുന്നു. മഹാരാഷ്ട്ര നിയമസഭാ തെരഞ്ഞെടുപ്പില് ഫലം വന്ന് കാലങ്ങള്ക്കു ശേഷം ആരോപണം ഉന്നയിക്കുന്നത് അടിസ്ഥാനരഹിതവും നിലനി
ല്ക്കാത്തതും ആണെന്ന് കമ്മിഷന് വ്യക്തമാക്കിയിരിക്കുകയാണ്.
തെരഞ്ഞെടുപ്പ് കമ്മീഷനെ അപകീര്ത്തിപ്പെടുത്താനും, ജനങ്ങളെ തെറ്റിദ്ധരിപ്പിക്കാനും അടിസ്ഥാനരഹിതമായ കാര്യങ്ങള് പ്രചരിപ്പിച്ച രാഹുല് ആരോപണങ്ങളില് ഉറച്ചുനില്ക്കുന്നുവെങ്കില് ഒരാഴ്ചയ്ക്കകം പരാതി നല്കണമെന്നും, അല്ലാത്തപക്ഷം രാജ്യത്തോട് മാപ്പ് പറയണമെന്നും മുഖ്യ തെരഞ്ഞെടുപ്പ് കമ്മിഷണര് ആവശ്യപ്പെട്ടിരിക്കുകയാണ്. സ്വന്തം പരാജയം മൂടി വയ്ക്കാന് തെറ്റായ കാര്യങ്ങള് പ്രചരിപ്പിച്ചാല് അന്വേഷണമോ നടപടിയോ ഉണ്ടാവില്ലെന്നും, സമ്മര്ദ്ദത്തിനും ഭീഷണിക്കും കമ്മിഷന് വഴങ്ങില്ലെന്നും മുഖ്യ തെരഞ്ഞെടുപ്പ് കമ്മിഷണര് പറഞ്ഞത് കോണ്ഗ്രസിനും പ്രതിപക്ഷത്തിനും കനത്ത പ്രഹരമാണ്. അനര്ഹരായ വോട്ടര്മാരെ നീക്കം ചെയ്യാന് ഇപ്പോള് ബീഹാറില് തുടക്കമിട്ടിരിക്കുന്ന എസ്ഐആര് തുടരുമെന്നും, പശ്ചിമ ബംഗാളില് ഉള്പ്പെടെ ഉചിതസമയത്ത് ഇത് നടത്തുമെന്നും കമ്മിഷന് പ്രഖ്യാപിച്ചിരിക്കുന്നത് പ്രതിപക്ഷത്തിന് വലിയ തിരിച്ചടിയാണ്. നിയമസഭാ തെരഞ്ഞെടുപ്പ് നടക്കാനിരിക്കുന്ന ബീഹാറില് ബംഗ്ലാദേശികളുടെ പോലും വോട്ടു നേടാനാണ് എസ്ഐആര്നെതിരെ കോണ്ഗ്രസും ഇന്ഡി സഖ്യവും രംഗത്തുവന്നത്. ഈ വ്യാമോഹം തകര്ന്നിരിക്കുന്നു. പ്രതിപക്ഷത്തിന്റെ ആവശ്യം തള്ളി എസ്ഐആറിന് സുപ്രീംകോടതിയുടെയും അനുമതിയും ലഭിച്ചിരിക്കുന്നു.
തെരഞ്ഞെടുപ്പ് കമ്മിഷനെതിരായ ആരോപണങ്ങള് തെളിയിക്കുന്ന സത്യവാങ്മൂലം സമര്പ്പിക്കുകയോ, രാജ്യത്തോട് മാപ്പ് പറയുകയോ ചെയ്യണമെന്ന് മുഖ്യ തെരഞ്ഞെടുപ്പ് കമ്മിഷണര് രാഹുലിനോട് ആവശ്യപ്പെട്ടതതോടെ കോണ്ഗ്രസും ഇന്ഡി സഖ്യവും പ്രതിക്കൂട്ടിലായിരിക്കുകയാണ്. ബിജെപിയും മറ്റും ഈ ആവശ്യം നേരത്തെ ഉന്നയിച്ചിരുന്നതാണെങ്കിലും തെരഞ്ഞെടുപ്പ് കമ്മിഷന് തന്നെ ഔദ്യോഗികമായി ഇക്കാര്യം പറഞ്ഞതോടെ കോണ്ഗ്രസിന് ഉത്തരം മുട്ടിയിരിക്കുകയാണ്. ഇതോടെ മുഖ്യ തെരഞ്ഞെടുപ്പ് കമ്മിഷണര് ഗ്യാനേഷ് കുമാറിനെതിരെ ഇംപീച്ച്മെന്റ് പ്രമേയം കൊണ്ടുവരാന് ഇന്ഡി സഖ്യം ആലോചിക്കുകയാണത്രേ. മുഖ്യ തെരഞ്ഞെടുപ്പ് കമ്മിഷണറെ ഇംപീച്ച് ചെയ്യണമെന്നുണ്ടെങ്കില് ആദ്യം ലോക്സഭയിലും രാജ്യസഭയിലും മൂന്നില് രണ്ടു ഭൂരിപക്ഷത്തില് പ്രമേയം പാസാക്കണം. പിന്നീട് ഈ പ്രമേയം രാഷ്ട്രപതി അംഗീകരിക്കണം. ഇതിനുള്ള അംഗബലം ഒന്നും പ്രതിപക്ഷത്തിന് ഇല്ലെന്ന് ആര്ക്കാണ് അറിഞ്ഞുകൂടാത്തത്. എന്നിട്ടും ജനങ്ങളെ തെറ്റിദ്ധരിപ്പിക്കാന് പരിഹാസ്യമായ ഓരോരോ കാര്യങ്ങള് ചെയ്യുകയാണ്. ഒരു നുണ പൊളിയുമ്പോള് മറ്റൊരു നുണയുമായി രംഗത്തുവരിക എന്നതാണ് കോണ്ഗ്രസിന്റെ തന്ത്രം. ഇത് വിലപ്പോവില്ലെന്നാണ് തെരഞ്ഞെടുപ്പ് കമ്മിഷന്റെ വിശദീകരണത്തിലൂടെ തെളിഞ്ഞിരിക്കുന്നത്.
