ന്യൂദല്‍ഹി: ഭരണഘടനയുടെ പകര്‍പ്പ് തലയില്‍ വച്ചിരുന്നവര്‍ ഭരണഘടനയുടെ ആത്മാവിനെ ചവിട്ടിമെതിച്ചുവെന്ന് പ്രധാനമന്ത്രി നരേന്ദ്രമോദി. ഭരണഘടനയുടെ മുഖ്യശില്‍പിയായ ബി.ആര്‍. അംബേദ്കറുടെ ആശയങ്ങളെ ഇവര്‍ ഒറ്റിക്കൊടുത്തുവെന്നും അദ്ദേഹം പറഞ്ഞു. ദല്‍ഹിയില്‍ വിവിധ വികസന പദ്ധതികള്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ബിജെപിയെ ദല്‍ഹിയിലെ ജനങ്ങള്‍ അനുഗ്രഹിച്ചു. എന്നാല്‍ ഇത് ചില രാഷ്‌ട്രീയ പാര്‍ട്ടികള്‍ക്ക് ദഹിക്കുന്നില്ല. രാജ്യത്തെ എല്ലാ പൗരന്മാരും തദ്ദേശീയ വ്യവസായങ്ങളെ പ്രോ
ത്സാഹിപ്പിക്കണം. ഭാരതത്തില്‍ നിര്‍മിച്ച ഉത്പന്നങ്ങളില്‍ വിശ്വസിക്കണമെന്ന് എല്ലാവരോടും ഞാന്‍ അഭ്യര്‍ത്ഥിക്കുകയാണെന്നും പ്രധാനമന്ത്രി പറഞ്ഞു. വികസിത ഭാരതത്തിന്റെ തലസ്ഥാനമാണെന്ന് തോന്നിക്കുന്ന തരത്തില്‍ ദല്‍ഹിയെ വികസിപ്പിക്കണമെന്നും രാജ്യതലസ്ഥാനത്തെ മികച്ച നഗരമാക്കണമെന്നത് തന്റെ പ്രതിജ്ഞയാണെന്നും പ്രധാനമന്ത്രി കൂട്ടിച്ചേര്‍ത്തു. ദല്‍ഹിയിലെ നമ്മുടെ ശുചിത്വ തൊഴിലാളികള്‍ വലിയ ഉത്തരവാദിത്തങ്ങള്‍ ചെയ്യുന്നു. മുന്‍ സര്‍ക്കാരുകള്‍ അവരെ അടിമകളെ പോലെയാണ് കണ്ടിരുന്നത്. മുന്‍കൂട്ടി അറിയിക്കാതെ ജോലിക്ക് വരാതിരുന്നാല്‍ അവരെ ഒരു മാസം തടവിലാക്കും. ഇതിനൊരു വ്യവസ്ഥയും ഉണ്ടാക്കിയിട്ടുണ്ട്. ഒരു ചെറിയ തെറ്റിന് അവരെ ജയിലിടയ്‌ക്കുന്നു. സാമൂഹിക നീതിയെക്കുറിച്ച് ഇപ്പോള്‍ വലിയ കാര്യങ്ങള്‍ പറയുന്ന പ്രതിപക്ഷ പാര്‍ട്ടികള്‍ രാജ്യത്ത് ഇത്തരം നിരവധി നിയമങ്ങള്‍ നടപ്പിലാക്കിയിട്ടുണ്ടെന്നും അദ്ദേഹം പറഞ്ഞു.
ദല്‍ഹിയില്‍ പ്രധാന ഹൈവേ പദ്ധതികള്‍ ഉദ്ഘാടനം ചെയ്ത പ്രധാനമന്ത്രി രാജ്യതലസ്ഥാനത്തെ അടിസ്ഥാനസൗകര്യ വികസന പദ്ധതികള്‍ക്കും തുടക്കമിട്ടു.
ചടങ്ങില്‍ വിവിധ സാമ്പത്തിക പ്രഖ്യാപനവും പ്രധാനമന്ത്രി നടത്തി. ജിഎസ്ടിയില്‍ കൂടുതല്‍ പരിഷ്‌കരണം വരുന്നുവെന്ന് പ്രധാനമന്ത്രി പറഞ്ഞു. വരുന്ന ദീപാവലിക്ക് ജിഎസ്ടി പരിഷ്‌കരണത്തില്‍ നിന്ന് കൂടുതല്‍ ബോണസ് ലഭിക്കും. മൊബൈല്‍ ഫോണിലും കളിപ്പാട്ട നിര്‍മാണത്തിലും ഭാരത വിപണി കുതിച്ചുയര്‍ന്നു. സ്വാശ്രയ ഭാരതത്തെ കൂടുതല്‍ ശക്തമാക്കുന്നതിനുള്ള വോക്കല്‍ ഫോര്‍ ലോക്കല്‍, മെയ്ഡ് ഇന്‍ ഇന്ത്യ തുടങ്ങിയ സംരംഭങ്ങളെ കുറിച്ചും പ്രധാനമന്ത്രി സംസാരിച്ചു.
