ബെയ് ജിംഗ് :ജാക് മായെ അറിയില്ലേ? ബിസിനസില് പല തവണ പരാജയപ്പെട്ടിട്ടും ഒടുവില് ആലിബാബ എന്ന ലോകത്തിലെ ഏറ്റവും വലിയ ഇ-കൊമേഴ്സ് കമ്പനി കെട്ടിപ്പൊക്കിയ ബിസിനസുകാരന്. ഇപ്പോള് ഇദ്ദേഹത്തിന്റെ ഇന്ത്യയ്ക്കനുകൂലമായ വാക്കുകള് ലോകശ്രദ്ധ നേടുകയാണ്.
അമേരിക്കയുടെ ഇന്ത്യയ്ക്കെതിരെ പിഴത്തീരുവ അടിച്ചേല്പിച്ച തീരുമാനം വലിയ അബദ്ധമായിരുന്നുവെന്ന് ജാക് മാ പറയുന്നു. മാത്രമല്ല, ബിസിനസ് ലോകത്തില് അമേരിക്ക നിരന്തരമായി തകര്ന്നുകൊണ്ടിരിക്കുകയാണെന്നും ഇന്ത്യ വിജയിച്ച് മുന്നേറുകയാണെന്നും ജാക് മാ പറയുന്നു.
അധികം വൈകാതെ ഇന്ത്യ ആഗോളതലത്തില് തന്നെ രാജാവായി മാറും. ഇത്രയും കാലം അമേരിക്കയായിരുന്നു കിംഗ് മേക്കര്. അവരുടെ ചെസ് കരുനീക്കങ്ങള്ക്ക് അനുസരിച്ചായിരുന്നു ലോകം ഇതുവരെ നീങ്ങിയിരുന്നത്. പക്ഷെ നിശ്ശബ്ദമായി ഇന്ത്യ അമേരിക്ക പ്രതീക്ഷിക്കാത്ത ഒരു നിലവാരത്തിലേക്ക് ഉയരുകയാണ്. അമേരിക്ക അത് അനുവദിച്ചുകൊടുത്തതുകൊണ്ടല്ല ഇത് സംഭവിച്ചത്. അമേരിക്ക അതിലേക്ക് ഇന്ത്യയെ തള്ളിനീക്കുകയായിരുന്നു. ഒരാളെ നിങ്ങള് കുറെക്കാലം ഒതുക്കാന് ശ്രമിച്ചാല് അയാള് പുതിയൊരു വഴി കണ്ടെത്തും. അതാണ് ഇന്ത്യ ചെയ്തത്. – ജാക് മാ പറയുന്നു.
കഴിഞ്ഞ 10 വര്ഷം നോക്കൂ. അമേരിക്കയുടെ സാങ്കേതിക വിദ്യയെയാണ് ഇന്ത്യ ആശ്രയിച്ചിരുന്നത്. അമേരിക്കയുടെ പണം, അമേരിക്കയുടെ സ്വാധീനം…പക്ഷെ ഇന്ന് ഇന്ത്യ സ്വന്തമായ ടെക്നോളജി കെട്ടിപ്പൊക്കുകയാണ്. ഇന്ത്യ സ്വന്തമായ ഡിജിറ്റല് ശൃംഖല, സ്വന്തം മുന്നണികളും കെട്ടിപ്പൊക്കുകയാണ്. പണ്ട് ബ്രിട്ടന് ചെയ്ത അതേ തെറ്റാണ് അമേരിക്ക ഇപ്പോള് ചെയ്തത്. സ്വന്തം കരുത്തിനെ ഉള്ളതിനേക്കാള് ഊതിപ്പെരുപ്പിച്ച് കാണല്. മറ്റ് രാജ്യങ്ങളുടെ കഴിവുകളെ അവര് വില കുറച്ചു കണ്ടു. 140 കോടി ജനങ്ങളുള്ള ഒരു രാജ്യത്തിന്റെ വളരാനുള്ള ദാഹം വളരെ വലുതാണ്. ഇന്ത്യയിലെ ബിസിനുകാര് 18 മണിക്കൂര് നേരം വരെ ജോലി ചെയ്യുന്നു. അടുത്ത 100 കോടി ഡോളര് ആശയം മുംബൈയില് പിറക്കുമെന്ന് അവര് സ്വപ്നം കണ്ടു. സിലിക്കണ് വാലിയില് അല്ല. മുംബൈയില്. അമേരിക്ക ബജറ്റിനെക്കുറിച്ച് തര്ക്കിക്കുമ്പോള് ഇന്ത്യയിലെ ശാസ്ത്രജ്ഞര് ചൊവ്വയില് പോകുന്നതിനെക്കുറിച്ച് ചിന്തിക്കുന്നു. ഇന്ത്യയുടെ ഇത്രയും വലിയ ജനസംഖ്യയുടെ കരുത്ത് ഇന്ത്യയെ ഒരു വികസ്വരരാജ്യമായി കാണാന് ഇഷ്ടപ്പെടുന്നില്ല. ഇന്ത്യയെ ലോകനേതാവായി കാണാനാണ് ഇഷ്ടപ്പെടുന്നത്. – ജാക് മാ പറയുന്നു. ജാക് മായുടെ മാ യുന് മോട്ടിവേഷന് എന്ന യൂട്യൂബ് ചാനലിലാണ് ഈ വീഡിയോ പങ്കുവെച്ചിരിക്കുന്നത്.
ഇന്ത്യയുടെ ജിഡിപി വളര്ച്ച ആകര്ഷകമാണ്. അത് ടെക്നോളജി വരെ വിദേശത്തേക്ക് കയറ്റുമതി ചെയ്യുന്നു. ആയുധങ്ങളുടെ കാര്യത്തില് ഇന്ത്യ അമേരിക്കയെ ആശ്രയിക്കുന്നില്ല. ഇപ്പോള് ഇന്ത്യക്കാര് സിലിക്കണ് വാലിയിലേക്ക് പോകുന്നലില്ല. പകരം സിലിക്കണ് വാലി ഇന്ത്യയെ തേടി വരികയാണ്. ഇങ്ങിനെയാണ് സാമ്രാജ്യങ്ങള് വീഴുന്നത്. ഒരു ദിവസം കൊണ്ടല്ല, സാവധാനത്തില് കുറെശ്ശേയായി അത് വീഴുന്നു.-ജാക് മാ പറയുന്നു.
