കോഴിക്കോട്: പ്രധാനമന്ത്രി നരേന്ദ്രമോദിയുടെ സ്വാതന്ത്ര്യദിന പ്രഖ്യാപനം വികസിത ഭാരതത്തിന്റെ രൂപരേഖയാണെന്ന് ബിജെപി ദേശീയ നിര്വാഹകസമിതി അംഗം കുമ്മനം രാജശേഖരന്. കോഴിക്കോട് സിറ്റി ജില്ല നേതൃയോഗം ഉദ്ഘാടനം ചെയ്യുകയായിരുന്നു അദ്ദേഹം. രാഷ്ട്രം നേരിടുന്ന അടിസ്ഥാന പ്രശ്നങ്ങള് പരിഹരിക്കുന്നതിനുള്ള മാര്ഗരേഖയാണത്. ജിഎസ്ടിയുടെ പുനക്രമീകരണം, യുവാക്കള്ക്കുള്ള തൊഴിലവസരം എന്നിവ ഇതിന് വഴിയൊരുക്കും. ഊര്ജ്ജ സ്വാശ്രയത്വത്തിനുള്ള ഐതിഹാസിക നടപടികള് ഭാരതത്തിന്റെ സാമ്പത്തിക സ്വാശ്രയത്വത്തിലേക്കുള്ള വഴിതുറക്കും.
രാഷ്ട്രം ഇത്തരത്തില് മുന്നേറുമ്പോള് കേരളത്തിലെ ജനജീവിതം ദുസ്സഹമാവുകയാണ്. സര്വ്വരംഗത്തും പരാജയപ്പെട്ട പിണറായി സര്ക്കാര് ജനശ്രദ്ധ തിരിച്ച് വിടാന് വ്യാജ പ്രചരണങ്ങള് നടത്തുകയാണ്. തദ്ദേശസ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിന് തയാറാക്കിയ വോട്ടര്പട്ടിക അടിമുടി ക്രമക്കേടുകള് നിറഞ്ഞതാണ്. മാറാട് ഒരു കെട്ടിട നമ്പറില് 327 വോട്ടുകള് ചേര്ത്തത് എങ്ങനെയെന്ന് വിശദമാക്കണം. സുരേഷ്ഗോപിയുടെ ഐതിഹാസിക വിജയത്തെ അംഗീകരിക്കാന് കഴിയാത്തവരാണ് സുരേഷ്ഗോപിക്കെതിരെ കള്ള പ്രചാരണം നടത്തുന്നത്. സൂര്യനെ പാഴ്മുറംകൊണ്ട് മറയ്ക്കാനാവില്ല അദ്ദേഹം പറഞ്ഞു.
എ.ബി. വാജ്പേയി സ്മൃതിദിനത്തോടനുബന്ധിച്ച് വാജ്പേയിയുടെ ഛായാചിത്രത്തില് നേതാക്കള് പുഷ്പാര്ച്ചന നടത്തി.
സിറ്റി ജില്ലാ പ്രസിഡന്റ് അഡ്വ.കെ.പി. പ്രകാശ്ബാബു അദ്ധ്യക്ഷത വഹിച്ചു. സംസ്ഥാന സെക്രട്ടറി കെ. രഞ്ജിത്ത്, ദേശീയ കൗണ്സില് അംഗം കെ.പി. ശ്രീശന്, ജില്ലാ ജനറല് സെക്രട്ടറി ടി.വി. ഉണ്ണികൃഷ്ണന്, മേഖലാ ജനറല് സെക്രട്ടറി അജയ്കെ. നെല്ലിക്കോട്, ജില്ലാ വൈസ് പ്രസിഡന്റ് ജോയ് വളവില് എന്നിവര് സംസാരിച്ചു.
