ന്യൂദല്ഹി:ജമ്മു കശ്മീരിന്റെ സംസ്ഥാന പദവി പുനഃസ്ഥാപിക്കുമെന്ന വാഗ്ദാനം പാലിക്കാന് കേന്ദ്ര സര്ക്കാരിനോട് നിര്ദ്ദേശിക്കണമെന്ന ഹര്ജിയില് പഹല്ഗാം ഭീകരാക്രമണം പോലുള്ള അടിസ്ഥാന യാഥാര്ത്ഥ്യങ്ങളെക്കുറിച്ച് എന്തുകൊണ്ടു മനസിലാക്കുന്നില്ലെന്ന് സുപ്രീം കോടതി ആരാഞ്ഞു. ‘നിങ്ങള് അടിസ്ഥാന യാഥാര്ത്ഥ്യങ്ങള് കണക്കിലെടുക്കണം. പഹല്ഗാമില് എന്താണ് സംഭവിച്ചതെന്ന് ഓര്ക്കുക’ എന്ന് ഹര്ജിക്കാരായ സഹൂര് അഹമ്മദ് ഭട്ട്, ആക്ടിവിസ്റ്റ് ഖുര്ഷിദ് അഹമ്മദ് മാലിക് എന്നിവരോട് ചീഫ് ജസ്റ്റിസ് ബി ആര് ഗവായി പറഞ്ഞു.
മുതിര്ന്ന അഭിഭാഷകരായ ഗോപാല് ശങ്കരനാരായണനും മേനക ഗുരുസ്വാമിയുമാണ് ഹര്ജിക്കാര്ക്കുവേണ്ടി ഹാജരായത്.
ജമ്മു കശ്മീരില് തിരഞ്ഞെടുപ്പ് നടത്തുമെന്ന് കേന്ദ്രം കോടതിയില് ഉറപ്പ് നല്കിയിരുന്നെന്ന് കേന്ദ്രസര്ക്കാരിനു വേണ്ടി ഹാജരായ സോളിസിറ്റര് ജനറല് തുഷാര് മേത്ത പറഞ്ഞു. ‘അത് നിറവേറ്റി, എന്നാല് സംസ്ഥാന പദവി പുനഃസ്ഥാപിക്കുന്നതിന് നിരവധി പരിഗണനകള് നോക്കേണ്ടതുണ്ട്’ അദ്ദേഹം ചൂണ്ടിക്കാട്ടി. ഹര്ജിക്കാര് ഈ ഘട്ടത്തില് എത്തിയത് സംശയാസ്പദമാണെന്ന് തുഷാര് മേത്ത പറഞ്ഞു. രാജ്യത്തിന്റെ ആ ഭാഗത്തെ ‘വെള്ളം കലക്കുക’ എന്നതാണോ അവരുടെ ഉദ്ദേശ്യമെന്ന് തുഷാര് ആശ്ചര്യപ്പെട്ടു. കേന്ദ്രസര്ക്കാരില് നിന്നുള്ള പ്രതികരണം തേടിയ കോടതി കേസ് എട്ട് ആഴ്ചയ്ക്ക് ശേഷം വാദം കേള്ക്കാന് മാറ്റി.
