കരുനാഗപ്പള്ളി: അക്കാദമിക- ഗവേഷണ രംഗത്ത് സഹകരിച്ച് പ്രവര്ത്തിക്കാന് അമൃത വിശ്വവിദ്യാപീഠവും യുകെയിലെ യൂണിവേഴ്സിറ്റി ഓഫ് ബാത്തും ധാരണയായി. ഇതു സംബന്ധിച്ച ധാരണാപത്രത്തില് ഇരു സര്വകലാശാലകളും ഒപ്പുവച്ചു. അമൃത വിശ്വവിദ്യാപീഠം അമൃതപുരി ക്യാമ്പസിലെ അമൃത സ്കൂള് ഓഫ് ബയോടെക്നോളജി വിഭാഗം ഡീന് ഡോ. ബിപിന് ജി. നായര്, ബാത്ത് സര്വകലാശാലയിലെ സയന്സ് വിഭാഗം ഡീന് പ്രൊഫ. ഡങ്കന് ക്രെയ്ഗ്, അസോ. ഡീന് (ഇന്റര്നാഷണല്) പ്രൊഫ. മൊമ്ന ഹെജ്മാദി എന്നിവര് ചേര്ന്ന് ധാരണാപത്രം കൈമാറി.
ഗവേഷണം, അക്കാദമിക് കൈമാറ്റം, ബയോടെക്നോളജി രംഗത്തെ ഉയര്ന്ന നിലവാരത്തിലുള്ള പഠനാവസരങ്ങള് എന്നീ മേഖലകളിലാണ് രണ്ടു സര്വകലാശാലകളും സഹകരിച്ച് പ്രവര്ത്തിക്കുക. ധാരണാപത്രം പ്രകാരം അമൃത വിശ്വവിദ്യാപീഠത്തിലെ വിദ്യാര്ത്ഥികള്ക്ക് ഭാരതത്തില്നിന്ന് ഒരു മാസ്റ്റേഴ്സ് ബിരുദം പൂര്ത്തിയാക്കി ബാത്ത് സര്വകലാശാലയില് ബയോടെക്നോളജി വിഷയത്തില് മാസ്റ്റേഴ്സ് പഠനം തുടരാം. ഇരു സ്ഥാപനങ്ങളുടെയും അടിസ്ഥാനസൗകര്യങ്ങളും വൈദഗ്ധ്യവും പ്രയോജനപ്പെടുത്തിക്കൊണ്ട് ലോകോത്തര അദ്ധ്യാപനവും ആധുനിക ഗവേഷണവും വൈവിധ്യമാര്ന്ന അക്കാദമിക് അനുഭവങ്ങളും വിദ്യാര്ത്ഥികള്ക്ക് ലഭ്യമാക്കുകയാണ് പദ്ധതിയുടെ ലക്ഷ്യം. അമൃത വിശ്വവിദ്യാപീഠവുമായി ധാരണാപത്രത്തില് ഒപ്പുവെക്കുന്നതില് ഒരുപാട് ആവേശഭരിതരാണെന്നും ഭാവിതലമുറയിലെ ലീഡര്മാരെ വളര്ത്തുന്നത് പോലെയുള്ള ലക്ഷ്യങ്ങള് ഇരു സര്വകലാശാലകള്ക്കും ഒരുപോലെയാണെന്നും ബാത്ത് സര്വകലാശാലയിലെ സയന്സ് വിഭാഗം ഡീന് പ്രൊഫ. ഡങ്കന് ക്രെയ്ഗ് അഭിപ്രായപ്പെട്ടു.
ഈയൊരു ധാരണാപത്രത്തില് ഒപ്പ് വെക്കുന്നതിലൂടെ സ്ഥാപിക്കുന്ന ബന്ധം ഇരുസര്വകലാശാലകള്ക്കും ഗുണകരമാകുമെന്നും അദ്ദേഹം കൂട്ടിച്ചേര്ത്തു. ഇരുകൂട്ടര്ക്കും ലഭിച്ച വിജയകരമായ അവസരമാണിതെന്ന് ഡോ. ബിപിന് ജി. നായര് അഭിപ്രായപ്പെട്ടു. ബാത്തിലെ അന്താരാഷ്ട്ര പ്രശസ്തരായ അദ്ധ്യാപകരുടെ അറിവും അമൃതയിലെ പരിചയസമ്പന്നരായ അധ്യാപകരുടെ കഴിവുകളും വിദ്യാര്ത്ഥികള്ക്ക് ഇരട്ടഗുണം നല്കുമെന്നും അദ്ദേഹം വ്യക്തമാക്കി. 2025-26 അക്കാദമിക് വര്ഷം മുതല് അമൃതയിലെ ആദ്യ ബാച്ച് വിദ്യാര്ത്ഥികളെ ബാത്ത് സര്വകലാശാല സ്വീകരിക്കും. ഇരു സര്വകലാശാലകളും ദീര്ഘകാലത്തേക്കുള്ള സഹകരണത്തിനാണ് ധാരണയായത്.
