ന്യൂദല്ഹി: തന്റെ കൈയില് ആറ്റംബോംബുണ്ടെന്നും അത് പൊട്ടിച്ചാല് വലിയ പ്രത്യാഘാതമാകും ഉണ്ടാവുകയെന്നുമാണ് രാഹുല് പറഞ്ഞതെങ്കിലും ആ ആറ്റം ബോംബ് വെറും ചീറ്റിയ പടക്കമായി മാറിയെന്ന് ബിജെപി. നിരാശയില് നിന്നുള്ളതാണ് ഇത്തരം ജല്പനങ്ങള്. തെരഞ്ഞെടുപ്പ് കമ്മിഷനെ ഇങ്ങനെ നിരന്തരം വിമര്ശിക്കുകയാണ്. തങ്ങള് വിജയിച്ച ഒരു സംസ്ഥാനത്തും രാഹുലും കോണ്ഗ്രസും ഇങ്ങനെ വാര്ത്താസമ്മേളനം നടത്തി തെര. കമ്മിഷനെ വിമര്ശിച്ചിട്ടില്ല, വക്താവ് സമ്പിത് പത്ര വാര്ത്താസമ്മേളനത്തില് പറഞ്ഞു.
99 സീറ്റുകളിലെ ജയം ആഘോഷിച്ചവരാണ് ഇപ്പോള് തെര. കമ്മിഷനെ കുറ്റം പറയുന്നത്. ഇത്തരം തെരഞ്ഞെടുത്ത പ്രതിഷേധങ്ങള് ജനങ്ങള് കാണുന്നുണ്ട്, അദ്ദേഹം പറഞ്ഞു. തെലങ്കാന, ഹിമാചല്പ്രദേശ് തെരഞ്ഞെടുപ്പ് ഫലങ്ങളെ രാഹുല് എന്തുകൊണ്ടാണ് എതിര്ക്കാത്തത്? തന്റെ വാര്ത്താ സമ്മേളനത്തോട് പ്രതികരിച്ചില്ലെങ്കില് ഗുരുതരമായ പ്രത്യാഘാതം ഉണ്ടാകുമെന്നാണ് രാഹുല് തെരഞ്ഞെടുപ്പ് കമ്മിഷനെ ഭീഷണിപ്പെടുത്തുന്നത്. തങ്ങള് അധികാരത്തില് വന്നാല് തെരഞ്ഞെടുപ്പ് കമ്മിഷന് ഉദ്യോഗസ്ഥര്ക്ക് എതിരെ നടപടി എടുക്കുമെന്നാണ് ഭീഷണി. പ്രതിപക്ഷ നേതാവ് ഉപയോഗിക്കേണ്ട ഭാഷയാണോ ഇത്? അദ്ദേഹം ചോദിച്ചു.
വീര സര്ക്കര്ക്കറെ പറ്റി പറഞ്ഞതിന് രാഹുലിന് മാപ്പു ചോദിക്കേണ്ടിവന്നു. ചൈനയുമായി ബന്ധപ്പെട്ട് നടത്തിയ പരാമര്ശത്തിന് മാപ്പു പറയേണ്ടി വന്നു. രാഹുല്, എവിടെയാണ് നിങ്ങളുടെ വിശ്വാസ്യത? രാഹുലിന്റെ വാക്കുകള്ക്ക് യാതൊരു അര്ഥവുമില്ല. രാഹുല് തെരഞ്ഞെടുപ്പ് കമ്മിഷന് സത്യവാങ്മൂലം നല്കട്ടെ. എന്നിട്ട് അന്വേഷിച്ച് സത്യം കണ്ടെത്തട്ടെ. നിങ്ങള് ഭാരതീയനാണോയെന്ന് സുപ്രീംകോടതി പോലും രാഹുലിനോട് ചോദിച്ചിരിക്കുന്നു. ഇതേ പാതയില് തുടര്ന്നാല് ജനങ്ങള് നിങ്ങളെ ചതിയനെന്ന് വിളിക്കും, ഓര്ത്തോളുക.. സമ്പിത് പത്ര പറഞ്ഞു.
