കൊച്ചി: പാലിയേക്കരയിലെ ടോള് പിരിവ് ഹൈക്കോടതി നാലാഴ്ചത്തേക്ക് തടഞ്ഞു. ഇടപ്പള്ളി-മണ്ണുത്തി ദേശീയ പാതയിലെ ഗതാഗതക്കുരുക്ക് കണക്കിലെടുത്താണ് ഇടക്കാല ഉത്തരവ്. നാലാഴ്ചയ്ക്കുള്ളില് ദേശീയപാത അതോറിറ്റി ഗതാഗത കുരുക്കിന് പരിഹാരം കാണണമെന്നും നിര്ദേശം നല്കി. ജസ്റ്റിസ് മുഹമ്മദ് മുഷ്താഖ്, ജസ്റ്റിസ് ഹരിശങ്കര് വി. മേനോന് എന്നിവരുള്പ്പെട്ട ഡിവിഷന് ബെഞ്ചിൻ്റേതാണ് വിധി.
ദേശീയപാതയില് ഇടപ്പള്ളി-മണ്ണുത്തി മേഖലയിലെ ഗതാഗതക്കുരുക്കിന് പരിഹാരം കാണാനാകാത്ത സാഹചര്യത്തില് പാലിയേക്കരയില് ടോള് പിരിക്കുന്നത് താത്കാലികമായി തടയണമെന്നാവശ്യപ്പെടുന്ന ഹര്ജികളിലാണ് ഹൈക്കോടതി ഉത്തരവ്. അടിപ്പാതകളുടെയും സർവീസ് റോഡുകളുടെയും നിർമാണം പൂർത്തിയാക്കാതെയാണ് ടോൾ പിരിക്കുന്നതെന്നും മേഖലയിൽ വലിയ ഗതാഗതക്കുരുക്കാണ് നേരിടുന്നതെന്നുമാണ് ഹർജിയിൽ ചൂണ്ടിക്കാട്ടിയിരുന്നത്. അതിനാൽ ടോൾ പിരിവ് തടയണമെന്നും ഹർജിയിൽ ആവശ്യപ്പെട്ടിരുന്നു.
ഏതാനും കിലോമീറ്റര് മാത്രമാണ് ഗതാഗതക്കുരുക്കുള്ളതെന്നും ഇവിടെ സര്വീസ് റോഡിലൂടെ ഗതാഗതം തിരിച്ചുവിട്ടിരിക്കുകയാണെന്നും ദേശീയപാത അതോറിറ്റിക്കായി ഹാജരായ അഡീഷണല് സോളിസിറ്റര് ജനറല് എ.ആര്.എല്. സുന്ദരേശന് അറിയിച്ചു. ഗതാഗതക്കുരുക്ക് പരിഹരിക്കാനുള്ള നടപടികള് ഉണ്ടാകുന്നുണ്ടെന്ന് സര്ക്കാരിനായി ഹാജരായ സ്റ്റേറ്റ് അറ്റോര്ണി എന്. മനോജ് കുമാറും വിശദീകരിച്ചു.
ജനങ്ങൾക്ക് ബുദ്ധിമുട്ടുണ്ടാക്കരുതെന്നും ഗതാഗതക്കുരുക്ക് പരിഹരിക്കണമെന്നും കോടതി നിർദേശിച്ചിട്ടുണ്ട്. കരാര്പ്രകാരമുള്ള സൗകര്യങ്ങള് നല്കാതെ ടോള്നിരക്ക് വര്ധിപ്പിക്കുന്നതിനെയടക്കമാണ് ഹര്ജിക്കാര് ചോദ്യം ചെയ്തിരുന്നത്.
