പത്തനംതിട്ട: കണ്ണൂര് എഡിഎം നവീന് ബാബുവിന്റെ മരണത്തില് കൂടുതല് അന്വേഷണം ആവശ്യപ്പെട്ട് ഭാര്യ മഞ്ജുഷ കണ്ണൂര് ഒന്നാം ക്ലാസ് മജിസ്ട്രേറ്റ് കോടതിയില് ഹര്ജി ഫയല് ചെയ്തു. പ്രത്യേക അന്വേഷണ സംഘത്തിന്റെ നടപടികളില് അതൃപ്തി രേഖപ്പെടുത്തിയുള്ള ഹര്ജിയില്, മുന്വിധിയോടെയായിരുന്നു അന്വേഷണം നടന്നതെന്നും വ്യക്തമാക്കുന്നു. കേസുമായി ബന്ധപ്പെട്ട സുപ്രധാന മേഖലകളിലേക്ക് അന്വേഷണം പോയില്ല. അതിനാല് നവീന് ബാബുവിന്റെ മരണത്തില് കൂടുതല് അന്വേഷണം നടത്തണം, മഞ്ജുഷ ആവശ്യപ്പെട്ടു.
നവീന് ബാബു കൈക്കൂലി വാങ്ങിയെന്ന് തെളിയിക്കാന് പ്രത്യേക അന്വേഷണ സംഘം കൃത്രിമ തെളിവുകളുണ്ടാക്കിയെന്നും അന്വേഷണ വിധേയമാക്കേണ്ട പല കാര്യങ്ങളും കണ്ടില്ലെന്നു നടിച്ചെന്നും ഹര്ജിയില് പറയുന്നു. ഹര്ജി ഫയലില് സ്വീകരിച്ച കോടതി പ്രോസിക്യൂഷന് നിലപാടു തേടി.
മഞ്ജുഷയും കുടുംബവും പറഞ്ഞ കാര്യങ്ങളൊന്നും എസ്ഐടി അന്വേഷിച്ചില്ല. പെട്രോള് പമ്പുമായി ബന്ധപ്പെട്ട ബിനാമി ഇടപാടുകളിലേക്ക് അന്വേഷണം നീങ്ങിയില്ല. ഇതും സംശയത്തിനിട നല്കുന്നു. ആരോ എഴുതിയ തിരക്കഥയ്ക്കനുസരിച്ചായിരുന്നു എസ്ഐടി അന്വേഷണമെന്ന് സംശയിക്കേണ്ട സാഹചര്യമാണിപ്പോള്.
കണ്ണൂര് ജില്ലാ പഞ്ചായത്ത് മുന് പ്രസിഡന്റ് പി.പി. ദിവ്യയും പ്രശാന്തനുമായുള്ള ഫോണ് കോള് രേഖകള്, ചാറ്റുകള് എന്നിവ പരിശോധിച്ചില്ല. അത് കേസിന്റെ ശരിയായ അന്വേഷണത്തിന് ആവശ്യമാണ്. പി.പി. ദിവ്യയുടെ ഡിലീറ്റ് ചെയ്ത ചാറ്റുകള് വീണ്ടെടുക്കണം. എന്തുകൊണ്ട് ഇതിന് ശ്രമിച്ചില്ലെന്ന കാര്യം ദുരൂഹമാണ്. പ്രതിയുടെ ഫോണ് ഫോറന്സിക് പരിശോധനയ്ക്ക് വിധേയമാക്കണം. നവീന് ബാബു കൈക്കൂലി വാങ്ങിയിട്ടില്ലെന്ന് ലാന്ഡ് റവന്യൂ കമ്മിഷണറുടെ അന്വേഷണ റിപ്പോര്ട്ടില് വ്യക്തമാക്കിയിരുന്നു. എന്നാല് ഇതിന് വിപരീതമായ റിപ്പോര്ട്ട് തയാറാക്കുകയെന്ന ലക്ഷ്യത്തോടെ ചിലര് കരുക്കള് നീക്കുകയാണ്. കളക്ടറുടെ മൊഴിയിലും ഒരുപാട് വൈരുധ്യങ്ങള് പ്രകടമാണ്. ഇക്കാര്യങ്ങളെല്ലാം അന്വേഷണ പരിധിയില് വരണം.
എസ്ഐടി റിപ്പോര്ട്ടില് ഇക്കാര്യങ്ങളൊന്നും പറയുന്നില്ല. ഗൂഢാലോചനയടക്കം പുറത്തുവരാന് പുതിയ അന്വേഷണം വേണം. എസ്ഐടി അന്വേഷണത്തിലെ വീഴ്ചകള് എണ്ണിപ്പറഞ്ഞാണ് പുതിയ ഹര്ജിയുമായി മഞ്ജുഷ കോടതിയെ സമീപിച്ചത്.
