കോട്ടയം: തീര്‍ത്ഥാടന പുണ്യദിനങ്ങളിലേക്ക് മള്ളിയൂര്‍. വൈഷ്ണവ ഗണപതി മഹാഗണപതി ക്ഷേത്ര സവിധത്തിലെ വിനായകചതുര്‍ഥി ഉത്സവത്തിന് 21ന് കൊടിയേറും. 28നാണ് ആറാട്ട്. വിനായകചതുര്‍ഥിക്കുള്ള ഒരുക്കങ്ങള്‍ പൂര്‍ത്തിയായതായി മള്ളിയൂര്‍ ക്ഷേത്രം ഭാരവാഹികളായ പരമേശ്വരന്‍ നമ്പൂതിരിയും ദിവാകരന്‍ നമ്പൂതിരിയും അറിയിച്ചു.
ഉത്സവദിനങ്ങളില്‍ കെഎസ്ആര്‍ടിസി വിവിധ ഡിപ്പോകളില്‍ നിന്ന് മള്ളിയൂരിലേക്ക് ബസ് ക്രമീകരിച്ചിട്ടുണ്ട്. 27ന് വിനായകചതുര്‍ഥി, പള്ളിവേട്ട. 28ന് ആറാട്ട്. 22 മുതല്‍ 26 വരെ ദിവസവും 12.30ന് ഉത്സവബലി ദര്‍ശനം. ആറരയ്‌ക്ക് ദീപാരാധന. ഗണേശമണ്ഡപത്തില്‍ ദിവസവും വൈകിട്ട് 7ന് കലാപരിപാടികള്‍ നടക്കും.
21നു രാവിലെ ആറിന് ഗണപതിഹോമത്തോടെ തുടക്കമാകും. 10.30നു തന്ത്രി മനയത്താറ്റില്ലത്ത് ആര്യന്‍ നമ്പൂതിരിയുടെ കാര്‍മികത്വത്തില്‍ കൊടിയേറ്റ്. വൈകിട്ട് ഏഴിന് കഥകളി. 27ന് വിനായക ചതുര്‍ഥിദിനം 10,008 നാളികേര മഹാഗണപതിഹോമത്തോടെ ആരംഭിക്കും. ക്ഷേത്രമതില്‍ക്കെട്ടിനുള്ളിലെ ഹോമകുണ്ഡത്തില്‍ മള്ളിയൂര്‍ പരമേശ്വരന്‍ നമ്പൂതിരിയുടെ നേതൃത്വത്തില്‍ അഗ്‌നിജ്വലിച്ചുയരും. രാവിലെ 11ന് മഹാഗണപതിഹോമ ദര്‍ശനം.
ഉച്ചയ്‌ക്ക് 12ന് പ്രത്യക്ഷ ഗണപതിപൂജ. തുടര്‍ന്ന് ആനയൂട്ട്. കേരളത്തിലെ തലയെടുപ്പുള്ള 12 കൊമ്പന്മാര്‍ പങ്കെടുക്കും. മേളപ്രമാണി പെരുവനം കുട്ടന്മാരാരുടെ നേതൃത്വത്തില്‍ 120 ഓളം പ്രഗത്ഭ കലാകാരന്മാര്‍ അവതരിപ്പിക്കുന്ന പഞ്ചാരിമേളം. 5.30ന് കാഴ്ചശ്രീബലി, വലിയ വിളക്ക്. ചിന്നമന്നൂര്‍ വിജയ് കാര്‍ത്തികേയനും ഇടുമ്പാവനം പ്രകാശ് ഇളയരാജയും നാദസ്വരക്കച്ചേരി അവതരിപ്പിക്കും. നാങ്കൂര്‍ കെ. ശെല്‍വഗണപതി തകിലില്‍ അകമ്പടിയാകും. പത്മശ്രീ മട്ടന്നൂര്‍ ശങ്കരന്‍കുട്ടി മാരാരുടെ നേതൃത്വത്തില്‍ പാണ്ടിമേളം. തുടര്‍ന്ന് പാറമേക്കാവ് ദേവസത്തിന്റെ കുടമാറ്റം. രാത്രി 10ന് പള്ളിവേട്ട എഴുന്നള്ളിപ്പ് 28 ന് വൈകുന്നേരം 4.30ന് ആറാട്ട് പുറപ്പാട്. മള്ളിയൂര്‍ ഇല്ലത്ത് ഇറക്കിപൂജ. കലാമണ്ഡലം കണ്ണൂര്‍ രാധാകൃഷ്ണന്റെ പാണ്ടിമേളം ആറാട്ട് എഴുന്നള്ളിപ്പിന്റെ പ്രത്യേകതയാണ്. രാത്രി 7.30ന് ആറാട്ട് സദ്യ. ഇതോടെ മള്ളിയൂരിലെ വിനായകചതുര്‍ഥി തീര്‍ത്ഥാടനകാലത്തിന് സമാപ്തിയാകും.
