പ്രധാനമന്ത്രി കിസാന് സമ്പദാ യോജനയ്ക്ക് 1920 കോടി രൂപയുടെ അധിക വിഹിതത്തോടെ 6520 കോടി രൂപ നീക്കിവെക്കാനുള്ള കേന്ദ്ര മന്ത്രിസഭയുടെ തീരുമാനം രാജ്യത്തെ കര്ഷകര്ക്കുള്ള കരുത്താര്ന്ന കൈത്താങ്ങാണ്. കാര്ഷികോത്പന്നങ്ങളുടെ ഭക്ഷ്യ സംസ്കരണത്തിനായി ആധുനികമായ അടിസ്ഥാന സൗകര്യങ്ങളുടെ ശൃംഖല സൃഷ്ടിക്കുക എന്ന ലക്ഷ്യത്തോടെയാണ് 2017-ല് കേന്ദ്ര സര്ക്കാര് പിഎം കിസാന് സമ്പദാ യോജന എന്ന പദ്ധതി ആരംഭിച്ചത്. വിളവെടുപ്പിന് ശേഷമുള്ള കര്ഷകരുടെ നഷ്ടം കുറയ്ക്കുക എന്നതായിരുന്നു പ്രധാന ലക്ഷ്യം. ഈ പദ്ധതിക്ക് കീഴില് ഭക്ഷ്യസംസ്കരണ മന്ത്രാലയം ഓപറേഷന് ഗ്രീന്സ് എന്ന ഒരു കേന്ദ്ര പദ്ധതി നടപ്പാക്കി വരുന്നുണ്ട്.
തക്കാളി, ഉള്ളി, ഉരുളക്കിഴങ്ങ് എന്നീ മൂന്ന് വിളകളായിരുന്നു തുടക്കത്തില് ഈ പദ്ധതിയില് ഉള്പ്പെടുത്തിയിരുന്നത്. പിന്നീട് മാങ്ങ, വാഴപ്പഴം തുടങ്ങിയ പഴവര്ഗങ്ങളും മത്തങ്ങ, ബീന്സ്, ഇഞ്ചി തുടങ്ങിയ പച്ചക്കറികളും ഉള്പ്പെടെ 22 ഇനങ്ങളെ കൂടി പദ്ധതിയില് പെടുത്തി. 14-ാം ധനകാര്യ കമ്മിഷന് ഈ പദ്ധതിക്ക് നീക്കിവച്ച സാമ്പത്തിക വിഹിതം 6000 കോടി രൂപയും 15-ാം ധനകാര്യ കമ്മിഷന്റെ വിഹിതം 4600 കോടി രൂപയുമായിരുന്നു. കിസാന് സമ്പദാ യോജനയുടെ കീഴില് കഴിഞ്ഞ ബജറ്റില് ധനകാര്യ മന്ത്രാലയം അനുമതി നല്കിയത് 1646 ഭക്ഷ്യ സംസ്കരണ പദ്ധതികള്ക്കാണ്. ഇത് രാജ്യത്തെ 51.24 ലക്ഷം കര്ഷകര്ക്ക് നേരിട്ട് പ്രയോജനപ്രദമായി.
ഇപ്പോള് പദ്ധതിക്കായി നീക്കിവെക്കുന്ന 6520 കോടി രൂപയില് 1,000 കോടി രൂപ ഇന്റഗ്രേറ്റഡ് കോള്ഡ് ചെയിന് ആന്ഡ് വാല്യൂ അഡിഷന് ഇന്ഫ്രാസ്ട്രക്ചര് ഘടകത്തിന് കീഴില് 50 മള്ട്ടി-പ്രൊഡക്റ്റ് ഫുഡ് ഇറേഡിയേഷന് യൂണിറ്റുകള് സ്ഥാപിക്കുന്നതിനായിരിക്കും. ഈ യൂണിറ്റുകള് ഭക്ഷ്യോത്പന്നങ്ങള് സംരക്ഷിക്കാനും മാലിന്യം കുറയ്ക്കാനും പ്രയോജനപ്പെടുത്തും. ഫുഡ് സേഫ്റ്റി ആന്ഡ് ക്വാളിറ്റി അഷ്വറന്സ് ഇന്ഫ്രാസ്ട്രക്ചര് സ്കീമിന് കീഴില് 100 ഫുഡ് ടെസ്റ്റിങ് ലബോറട്ടറികള് സ്ഥാപിക്കുന്നതിനായി മറ്റൊരു 920 കോടി രൂപ ഉപയോഗിക്കും. ഈ ലബോറട്ടറികള് എന്എബില് മാനദണ്ഡങ്ങള് പാലിക്കുന്നവയായിരിക്കും. പരിശോധനാ ശേഷി വര്ദ്ധിപ്പിക്കുന്നതിനും ഭക്ഷ്യ സുരക്ഷ ഉറപ്പാക്കുന്നതിനുമായി സ്വകാര്യ മേഖലയിലാണ് ഇവ പ്രധാനമായും നിര്മിക്കുക. പച്ചക്കറികള്, പാലുല്പ്പന്നങ്ങള്, മത്സ്യ ഉല്പ്പന്നങ്ങള് എന്നിവ കൂടുതല് കാലം പുതുമയോടെ സൂക്ഷിക്കാനും വിളവെടുപ്പിനു ശേഷമുള്ള നഷ്ടം കുറയ്ക്കാനും
സഹായിക്കുന്ന തരത്തിലാണ് പദ്ധതിയുടെ നടത്തിപ്പ്. ഭക്ഷ്യവസ്തുക്കള് പാഴാകുന്നത് കുറയ്ക്കുക എന്ന ലക്ഷ്യം പരമാവധി കൈവരിക്കാന് കിസാന് സമ്പദാ യോജനക്ക് ഇതുവരെ സാധിച്ചിട്ടുണ്ട് എന്നാണ് നബാര്ഡ് പോലുള്ള ഏജന്സികള് നടത്തിയ പഠനത്തില് നിന്ന് മനസ്സിലാകുന്നത്.
കര്ഷകരക്ഷ മുന്നിര്ത്തി കേന്ദ്ര സര്ക്കാര് കഴിഞ്ഞ രണ്ട് പതിറ്റാണ്ടിലേറെക്കാലമായി നടപ്പാക്കി വരുന്ന വിവിധ പദ്ധതികളില് ഏറെ പ്രാധാന്യമുള്ളതാണ് പ്രധാനമന്ത്രി കിസാന് സമ്പദാ യോജന. ഈ പദ്ധതിക്ക് കൂടുതല് കരുതലും സാമ്പത്തിക വിഹിതവും നല്കാനുള്ള തീരുമാനം തീര്ച്ചയായും വികസിത ഭാരതം എന്ന ലക്ഷ്യത്തിലേക്കുള്ള രാജ്യത്തിന്റെ മുന്നേറ്റത്തില് സുപ്രധാന കാല്വയ്പാണ്.
