തിരുവനന്തപുരം: രാജ്ഭവനെ ജനങ്ങള്ക്കു കൂടുതല് പ്രാപ്യമായ സ്ഥാപനമാക്കി മാറ്റുന്നതിനുള്ള വിവിധ പദ്ധതികളുമായി ഗവര്ണര് രാജേന്ദ്ര വിശ്വനാഥ് ആര്ലേക്കര്. പ്രതിമാസ പ്രഭാഷണങ്ങളും സാംസ്കാരിക പരിപാടികളും രാജ്ഭവനിലെ പ്രധാന ഓഡിറ്റോറിയത്തില് നടത്താനുള്ള തീരുമാനം അതിന്റെ ഭാഗമാണ്.
ഇതിനോടൊപ്പം, രാജ്ഭവനു ചുറ്റുമുള്ള ഏകദേശം 50 ഏക്കര് ഭൂമിയില് കൃഷി ആരംഭിക്കുന്നതിന് ക്രമീകരണങ്ങള് പൂര്ത്തിയാകുകയാണ്. കൃഷിവകുപ്പില് നിന്നുള്ള സൂപ്പര്വൈസറെ മേല്നോട്ടത്തിനായി നിയോഗിച്ചു. നിലവിലുള്ള പൂന്തോട്ട ജീവനക്കാരെ ഉപയോഗിച്ചാണ് കൃഷിത്തോട്ടം ഒരുക്കുന്നത്. ഓണത്തിന് മുന്പായി രാജ്ഭവന് ജീവനക്കാര്ക്ക് ഇവിടെനിന്നുള്ള പച്ചക്കറികളോടെ കിറ്റുകള് നല്കണമെന്നായിരുന്നു ഗവര്ണറുടെ ആദ്യ ലക്ഷ്യങ്ങളിലൊന്ന്. ഇതിനായി പടവലം, ചീര, മുരിങ്ങ, നെയ്ക്കുമ്പളം, മത്തന്, നീളപ്പയര് തുടങ്ങിയവ നട്ടുകഴിഞ്ഞു. മഴ അനുകൂലമായാല്, ഓണസദ്യക്കാവശ്യമായ പച്ചക്കറികള് മുഴുവനും സ്വന്തമായി രാജ്ഭവനില്നിന്ന് ലഭ്യമാക്കാനാകും.
ഏകദേശം 150 ഏത്തവാഴ തൈകള്, അതില് പാളയന്കോടന്, രസകഥളി എന്നിവ ഉള്പ്പെടുന്നു. വിത്ത് കല്ലാര് കൃഷിഭവനില് നിന്നാണ്. മധുരക്കിഴങ്ങ്, കപ്പ തുടങ്ങിയവയും വളരുന്നു. പാലോട് ട്രോപ്പിക്കല് ബൊട്ടാണിക്കല് ഗാര്ഡന് നേരത്തെ രാജ്ഭവനില് ഔഷധ ഉദ്യാനം ഒരുക്കിയിരുന്നു. 200 ല് അധികം ചെടികള് നട്ടെങ്കിലും വേണ്ടത്ര പരിചരണം നല്കാത്തതിനാല് പലതും നശിച്ചു. ഗവര്ണര് ടിബിജിആര്എ ഡയറക്ടറെ വിളിച്ച് പ്രത്യേക നിര്ദ്ദേശം നല്കി. പുതിയ ഔഷധച്ചെടികള് നടുന്നതിനും സംരക്ഷണ പരിശീലനം നല്കുന്നതിനും ടിബിജിആര്എ തയ്യാറാണ്. ചെറിയ ഒരു ഇല്ലിമുളത്തോട്ടം ഒരുക്കാനുള്ള പദ്ധതിക്കും അംഗീകാരം നേടി.
രാജ്ഭവന് വളപ്പില് നിലവില് നാല് കുളങ്ങളുണ്ട്. ഇവയില് മത്സ്യകൃഷിക്ക് മത്സ്യഫെഡിന്റെ അഭിപ്രായം തേടിയിട്ടുണ്ട്. ഗോശാലയില് വെച്ചൂര് പശു ഉള്പ്പെടെ നാല് പശുക്കളും നാല് കാളകളും ഉണ്ട്. ആടുകള്ക്കും പ്രത്യേകം കൂടും നിലവിലുണ്ട്. രാജ്ഭവനാവശ്യമായ പാല് ഇവിടെനിന്നു തന്നെ ലഭ്യമാക്കുന്നു. ഗവര്ണറുടെ ലക്ഷ്യം ഓണക്കിറ്റ് വിതരണം മാത്രമല്ല. രാജ്ഭവനില് നിന്ന് തേന്, ചിപ്സ് തുടങ്ങിയ ‘മെയ്ഡ് ഇന് രാജ്ഭവന്’ ഉല്പന്നങ്ങളും പുറത്തിറക്കാന് പദ്ധതിയുണ്ട്. ഏത്തവാഴക്ക് പുറമെ രാജ്ഭവന് വളപ്പിലെ പ്ലാവിലെ ചക്കകളും ഉപ്പേരിയാക്കി മാറ്റും.
‘ആവശ്യമായ കാര്ഷിക ഉല്പന്നങ്ങള് സംഭരിക്കുന്നതിനായി ചെറിയൊരു സംഭരണശാലയും വിതരണ സംവിധാനവും ഒരുക്കും’, രാജ്ഭവനിലെ കൃഷിസ്ഥലങ്ങള് പരിശോധിച്ച ശേഷം ഗവര്ണര് ആര്ലേക്കര് തന്റെ ആഗ്രഹങ്ങള് വ്യക്തമാക്കി. ബീഹാറില് ഗവര്ണറായി സേവനമനുഷ്ഠിച്ച കാലത്തെ വിജയാനുഭവമാണ് ഈ സംരംഭങ്ങള്ക്ക് പ്രചോദനം.
