ന്യൂയോര്ക്ക് :പ്രശസ്ത മലയാളി സാമ്പത്തിക ശാസ്ത്രജ്ഞ അന്താരാഷ്ട്ര നാണ്യനിധി (ഐ എം എഫ്) ഫസ്റ്റ് ഡെപ്യൂട്ടി മാനേജിംഗ് ഡയറക്ടര് ഗീത ഗോപിനാഥ് പദവി രാജിവച്ചു. അധ്യാപന ജീവിതത്തിലേക്ക് മടങ്ങാനാണ് തീരുമാനം.സാമൂഹ്യ മാധ്യമ പ്ലാറ്റ് ഫോമായ എക്സിലൂടെ ഗീത ഗോപിനാഥ് തന്നെയാണ് രാജി വിവരം അറിയിച്ചത്.
2025 ഓഗസ്റ്റില് ഹാര്വഡ് സര്വകലാശാലയില് സാമ്പത്തിക ശാസ്ത്ര അധ്യാപികയായി മടങ്ങിയെത്തുമെന്നും അവര് വിവരിച്ചു. അമേരിക്കന് പൗരത്വമുള്ള ഇന്ത്യന് വംശജയായ ഗീതാ ഗോപിനാഥ് 2019 ലാണ് ഐ എം എഫിലെത്തിയത്. ചീഫ് ഇക്കണോമിസ്റ്റായി ജോലിയില് പ്രവേശിച്ച ഗീത, 2022ല് ജെഫ്രി ഒകമോട്ടോയുടെ പിന്ഗാമിയായി ഫസ്റ്റ് ഡെപ്യൂട്ടി മാനേജിംഗ് ഡയറക്ടറായി നിയമിതയായി. ഈ പദവിയിലെത്തിയ ആദ്യ വനിതയാണ്.
കൊവിഡ് മഹാമാരി കാലത്ത് ഗീതയുടെ സംഭാവനകള് വളരെ വലുതായിരുന്നുവെന്ന് ഐ എം എഫ് അറിയിച്ചിരുന്നു. യുക്രെയ്ന്, അര്ജന്റീന തുടങ്ങിയ രാജ്യങ്ങളിലെ ഐ എം എഫിന്റെ പ്രവര്ത്തനങ്ങളിലും ഗീതയുടെ സംഭാവനകള് വലിയ പ്രാധാന്യമുള്ളതായിരുന്നു. ജി 7, ജി 20 സമ്മേളനങ്ങളില് ഐ എം എഫിന്റെ നയരൂപീകരണത്തിലടക്കം പങ്കു വഹിച്ചിട്ടുണ്ട്. 2016 – 18 കാലഘട്ടത്തില് മുഖ്യമന്ത്രി പിണറായി വിജയന്റെ സാമ്പത്തിക ഉപദേഷ്ടാവായി സൗജന്യ സേവനം ചെയ്തിട്ടുണ്ട്.
