സൗരോര്‍ജ്ജം വിതരണ ശൃംഖലയിലെ പ്രശ്‌നങ്ങള്‍ കെഎസ്ഇബി കെട്ടിച്ചമച്ചത്

കോഴിക്കോട്: കേരളത്തില്‍ ഉത്പാദിപ്പിക്കുന്ന സൗരോര്‍ജ്ജം വിതരണ ശൃംഖലയിലേക്ക് കയറ്റുമ്പോള്‍ പ്രശ്‌നങ്ങളുണ്ടാകുന്നെന്ന കെഎസ്ഇബി വാദം പച്ചക്കള്ളമെന്നു വിദഗ്ധര്‍. കേരളത്തിലെ വൈദ്യുതി വിതരണ ശൃംഖല നാഷണല്‍, സാര്‍ക്ക് ഗ്രിഡുകളുടെ ഭാഗം മാത്രമായതിനാല്‍ കേരളത്തിന്റെ ശരാശരി ഡിമാന്‍ഡായ 3500 മെഗാവാട്ട് മുഴുവന്‍ കയറ്റിയാലും പ്രശ്‌നമില്ലെന്നാണ് വിദഗ്ധര്‍ ചൂട്ടിക്കാട്ടുന്നത്. കാരണം, 250-300 ജിഗാവാട്ട് കൈകാര്യം ചെയ്യുന്ന വിതരണ ശൃംഖല (ഗ്രിഡ്) ആണിത്. അതു മാത്രമല്ല, ഗ്രിഡിലെ പ്രശ്‌നങ്ങള്‍ കൈകാര്യം ചെയ്യുന്നത് സെന്‍ട്രല്‍ ഇലക്ട്രിസിറ്റി റഗുലേറ്ററി കമ്മിഷന്‍ (സിഇആര്‍സി) ആണ്. കൂടാതെ ഗ്രിഡ് ഇന്ത്യ കേന്ദ്ര സര്‍ക്കാര്‍ സ്ഥാപനവുമുണ്ട്. സിഇആര്‍സി ചട്ടങ്ങള്‍ക്കനുസരിച്ച് പ്രവര്‍ത്തിക്കുക മാത്രമാണ് കെഎസ്ഇബി ചെയ്യേണ്ടത്.

സിഇആര്‍സി നിര്‍മാണ, സുരക്ഷാ മാനദണ്ഡങ്ങള്‍ പാലിക്കാതെ കേരളത്തിലെ വിതരണ ശൃംഖലാ നിര്‍മാണത്തിലെയും പരിപാലനത്തിലെയും പോരായ്‌മകളാലുണ്ടാകുന്ന പ്രശ്‌നങ്ങളെ വിതരണ ശൃംഖലാ സ്ഥിരത (ഴൃശറ േെമയശഹശ്യേ) പ്രശ്‌നങ്ങളായി തെറ്റിദ്ധരിപ്പിക്കുകയാണ് കെഎസ്ഇബി. രാവിലെ ആറു മുതല്‍ സാവധാനം ഉത്പാദനം കൂടി ഉച്ചകഴിഞ്ഞു പരമാവധി ഉത്പാദനത്തിലെത്തുന്നതാണ് സോളാര്‍ വൈദ്യുതി. ഇതില്‍ ഭൂരിഭാഗവും ലോ ടെന്‍ഷന്‍ ലൈനുകളിലുള്ള പുരപ്പുറ സൗരോര്‍ജ പ്ലാന്റുകളില്‍ നിന്നാണ്. 1000 മെഗാവാട്ടില്‍ താഴെ മാത്രമാണ് സൗരോര്‍ജ്ജ സ്ഥാപിത ശേഷി. കേരളത്തിലെ വിതരണ ശൃംഖലയില്‍ 1500 മുതല്‍ 2500 വരെ മെഗാവാട്ട് വൈദ്യുതി (ഏറ്റവും കൂടുതല്‍) കടത്തി വിടുന്ന വൈകിട്ട് ആറു മുതല്‍ ഏഴു വരെ പ്രശ്‌നങ്ങളൊന്നുമില്ലാത്തപ്പോള്‍ കേവലം 1000 മെഗാവാട്ട് പകല്‍ കടത്തി വിടുന്നത് വലിയ പ്രശ്‌നങ്ങളുണ്ടാക്കുമെന്നു പറയുന്നത് വസ്തുതകള്‍ക്കു നിരക്കാത്തതാണ്.

പകലത്തെ സൗരോര്‍ജ്ജ ഉത്പാദനം കൊണ്ട് കെഎസ്ഇബിക്ക് വലിയ നഷ്ടമുണ്ടാകുന്നെന്ന പ്രചാരണം കെഎസ്ഇബി കെട്ടിച്ചമച്ചതാണ്. കെഎസ്ഇബി വൈദ്യുതി പുറത്തുനിന്നു വാങ്ങിയാല്‍ മാത്രമാണ് ചെലവു വര്‍ധിക്കുക. സോളാര്‍ പ്രൊഡ്യൂസര്‍മാര്‍ (സൗരോര്‍ജ്ജം ഉത്പാദിപ്പിച്ചു വിതരണം ചെയ്യുന്നവര്‍) ഉത്പാദിപ്പിക്കുന്ന വൈദ്യുതി പകല്‍ ഉപയോഗിക്കാന്‍ ജല വൈദ്യുതി ഉത്പാദനം പകല്‍ വേണ്ട പോലെ ക്രമീകരിച്ച് ഈ വെള്ളം രാത്രിയിലെ ഉത്പാദനത്തിനായി മിച്ചംവച്ചാല്‍ മതി. കേരളത്തിന്റെ ജല വൈദ്യുത പദ്ധതികളില്‍ നിന്നും സോളാര്‍ പ്ലാന്റുകളില്‍ നിന്നും കാലാകാലങ്ങളില്‍ ഉത്പാദിപ്പിക്കാനാകുന്ന വൈദ്യുതിയുടെ സാധ്യതകള്‍ കൂടി കണക്കിലെടുത്ത് പവര്‍ പര്‍ച്ചേസ് പ്ലാനുകളുണ്ടാക്കാത്തതിന്റെ പ്രശ്‌നങ്ങളും കഴിവില്ലായ്‌മയും മൂലം കേരള ശൃംഖലയിലെ വൈദ്യുതിയാവശ്യം സമയ, കാലാനുസൃതമായി ശാസ്ത്രീയമായി, കൃത്യമായി നിര്‍ണയിക്കുന്നതിലെ പിഴവുകളും സോളാര്‍ പ്രൊഡ്യൂസര്‍മാരുടെ തലയില്‍ കെട്ടിവയ്‌ക്കുകയാണ്.