ആലുവ: മുസ്ലിം ലീഗിന് മുന്നില് ഇടത് സര്ക്കാര് മുട്ടിലിഴയുന്നുവെന്ന് കുറ്റപ്പെടുത്തി എസ് എന് ഡി പി യോഗം ജനറല് സെക്രട്ടറി വെള്ളാപ്പള്ളി നടേശന്. ആലുവ അദ്വൈതാശ്രമത്തില് നടന്ന പരിപാടിയില് സംസാരിക്കുകയായിരുന്നു അദ്ദേഹം.
ഇടതും വലതുമെല്ലാം മുസ്ലീം ലീഗും കേരള കോണ്ഗ്രസും പറഞ്ഞാല് മിണ്ടുമോയെന്ന് വെള്ളാപ്പള്ളി ചോദിച്ചു. നിയമസഭാ തെരഞ്ഞെടുപ്പില് മുസ്ലിം ലീഗ് കൂടുതല് സീറ്റുകള് ചോദിക്കുമെന്നും അദ്ദേഹം പറഞ്ഞു. മുഖ്യമന്ത്രി സ്ഥാനം മുന്നില് കണ്ടാണ് മുസ്ലിം ലീഗ് മുന്നോട്ട് പോകുന്നതെന്നും വെളളാപ്പളളി ചൂണ്ടിക്കാട്ടി.
നേരത്തേ മുസ്ലീം സമുദായം സംഘടിതമായി അനധികൃതമായി ആനുകൂല്യങ്ങള് നേടുന്നുണ്ടെന്ന് വെളളാപ്പളളി പറഞ്ഞിരുന്നു. ഇത് വലിയ വിവാദം സൃഷ്ടിച്ചിരിക്കെയാണ് വീണ്ടും സമാന പരാമര്ശങ്ങള് അദ്ദേഹം നടത്തിയത്. സത്യം പറയുമ്പോള് വര്ഗീയ വാദിയാക്കുകയാണെന്നും വെളളാപ്പളളി പറഞ്ഞു.
കാന്തപുരം കുന്തവുമായി വന്നാലും പറയാനുളളത് താന് പറയുമെന്നാണ് നേരത്തേ വെള്ളാപ്പളളി നടേശന് പ്രസംഗിച്ചത്. അതേസമയം,വെള്ളാപ്പള്ളിയുടെ വര്ഗീയ പരാമര്ശങ്ങള്ക്ക് പിന്നില് മുഖ്യമന്ത്രി പിണറായി വിജയനാണെന്ന് പ്രതിപക്ഷ നേതാവ് വി ഡി സതീശന് പറഞ്ഞു.
വെള്ളാപ്പള്ളി നടേശന്റെ വര്ഗീയ പരാമര്ശത്തെ പേര് എടുത്ത് പറയാതെ സിപിഎം ഇന്ന് തള്ളിയിരുന്നു. എസ്എന്ഡിപി മുന്നോട്ട് പോകേണ്ടത് മതനിരപേക്ഷ നിലപാട് ഉയര്ത്തിപ്പിടിച്ചാണ്. ഏതൊരു ജനവിഭാഗത്തിന്റെയും പ്രശ്നങ്ങള് അവതരിപ്പിക്കാം. അത് മതവൈര്യമുണ്ടാക്കുന്ന തരത്തിലാക്കരുതെന്നും സിപിഎം വ്യക്തമാക്കുന്നു. മതനിരപേക്ഷ സംസ്കാരത്തിന് പോറലേല്പ്പിക്കുന്ന ഇടപെല് ആരുടെ ഭാഗത്ത് നിന്ന് ഉണ്ടായാലും ജാഗ്രത പാലിക്കണമെന്നും സിപിഎം സംസ്ഥാന സെക്രട്ടേറിയേറ്റ് പ്രസ്താവനയില് പറഞ്ഞു.
