നാഗ്പൂര്: ലോകത്തിന്റെയാകെ ക്ഷേമത്തിന് വേണ്ടി ചിന്തിക്കുകയും എല്ലാവരുടെയും സന്തോഷം ആഗ്രഹിക്കുകയും ചെയ്യുക എന്നതാണ് അടിസ്ഥാന ഹിന്ദു ആശയമെന്ന് രാഷ്ട്ര സേവികാ സമിതി പ്രമുഖ് സഞ്ചാലിക വി. ശാന്തകുമാരി (ശാന്തക്ക). ഭാരതത്തിന്റെ മഹത്തായ ചരിത്രവും പാരമ്പര്യവും ഇതിന് തെളിവാണ്. ഈ ആശയത്തിന്റെ വെളിച്ചത്തില് ജീവിതത്തെ രൂപപ്പെടുത്തണമെന്ന് അവര് പറഞ്ഞു. രേശിംബാഗ് സ്മൃതി മന്ദിറില് സേവിക സമിതി അഖില ഭാരതീയ കാര്യകാരിണി ബൈഠക്കില് സമാപന പ്രഭാഷണം നടത്തുകയായിരുന്നു ശാന്തക്ക.
2026 ല്, രാഷ്ട്ര സേവിക സമിതി സ്ഥാപിതമായതിന്റെ 90-ാം വര്ഷമാണ്. സംഘം ഈ വര്ഷം ശതാബ്ദിയിലെത്തുന്നു. സമിതിയുടെ നവതിയും സംഘത്തിന്റെ ശതാബ്ദിയും മുന്നിര്ത്തി സംഘടനാ വികാസത്തിനായുള്ള കാര്യക്രമങ്ങള്ക്ക് പ്രതിനിധി സഭ രൂപം നല്കി.
യുവാക്കള്ക്കിടയില് മയക്കുമരുന്ന് ആസക്തി വര്ദ്ധിക്കുന്നത് ഗുരുതരമായ പ്രതിസന്ധിയാണെന്ന് പ്രതിനിധി സഭ അംഗീകരിച്ച പ്രമേയം അഭിപ്രായപ്പെട്ടു. സര്ക്കാരും വിദ്യാഭ്യാസ, സാമൂഹിക സ്ഥാപനങ്ങളും അവരുടെ പദ്ധതികളില് ലഹരിവിമുക്ത പരിപാടികള് നിര്ബന്ധമായും ഉള്പ്പെടുത്തണമെന്ന് പ്രമേയം ആവശ്യപ്പെട്ടു. ‘ഓപ്പറേഷന് സിന്ദൂര്’ വിജയകരമായി നടത്തിയതിന് സൈന്യത്തിനെയും സര്ക്കാരിനെയും പ്രതിനിധി സഭ അഭിനന്ദിച്ചു.
