വെള്ളാപ്പള്ളി നടേശൻ പ്രീണനരാഷ്‌ട്രീയത്തിന്റെ കാലത്ത് സമുദായത്തിന് വേണ്ടി ധൈര്യത്തോടെ മുന്നിൽ നിന്ന നേതാവ്: രാജീവ് ചന്ദ്രശേഖർ

കൊച്ചി: പ്രീണനരാഷ്‌ട്രീയത്തിന്റെ കാലത്ത് സമുദായത്തിന്റെ അവകാശങ്ങൾക്ക് വേണ്ടി ധൈര്യത്തോടെ മുന്നിൽ നിന്ന നേതാവാണ് എസ് എൻ ഡി പി യോഗം ജനറൽ സെക്രട്ടറി വെള്ളാപ്പള്ളി നടേശനെന്ന് ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖ‍ർ പറഞ്ഞു. കേരള സമൂഹത്തിന് വേണ്ടി അദ്ദേഹം നൽകിയ സംഭാവനകളും നിസ്തുലമാണ്. ഇനിയും ഏറെ വർഷങ്ങൾ അദ്ദേഹത്തിന് പൊതു സേവന രം​ഗത്ത് തുടരാനാകട്ടെയെന്ന് പ്രാ‍ർത്ഥിക്കുന്നതായും രാജീവ് ചന്ദ്രശേഖർ പറഞ്ഞു.

എസ്എൻഡിപി യോഗം ജനറൽ സെക്രട്ടറിയെന്ന നിലയിൽ, 30 വർഷം പൂർത്തിയാക്കിയ വെള്ളാപ്പള്ളി നടേശനെ ബിജെപി സംസ്ഥാന അധ്യക്ഷൻ ശ്രീ. രാജീവ് ചന്ദ്രശേഖർ ആദരിച്ചു. ചടങ്ങിൽ മുഖ്യാതിഥിയായി പങ്കെടുത്ത അദ്ദേഹം പ്രധാനമന്ത്രി നരേന്ദ്ര മോദി ജിയുടെയും സംസ്ഥാന ബിജെപിയുടെയും പേരിൽ ശ്രീ വെള്ളാപ്പള്ളി നടേശന് ആശംസകൾ നേ‍രുകയും ചെയ്തു.

പള്ളുരുത്തിൽ എസ്.എൻ ഹാളിൽ രാവിലെ പത്തിന് നടക്കുന്ന പരിപാടി മന്ത്രി വി.എൻ. വാസവൻ ഉദ്ഘാടനം ചെയ്തു. മന്ത്രി പി. രാജീവ് മുഖ്യപ്രഭാഷണം നടത്തി. മേയർ എം. അനിൽകുമാർ, ഹൈബി ഈഡൻ എം.പി, എം.എൽ.എമാരായ കെ. ബാബു, കെ.ജെ. മാക്സി, ബി​ഡിജെഎസ് സംസ്ഥാന പ്രസിഡന്റ് തുഷാർ വെള്ളാപ്പള്ളി തുടങ്ങിയവർ പ​ങ്കെടുത്തു. യൂണിയന് കീഴിലെ വിവിധ സംഘടനാ ഭാരവാഹികൾ യോഗം ജനറൽ സെക്രട്ടറിക്ക് വേദിയിൽ ആദരവ് നൽകി.