ന്യൂദല്ഹി: നാഷണല് ഹെറാള്ഡുമായി ബന്ധപ്പട്ട സാമ്പത്തിക ക്രമക്കേട് കേസില് വിചാരണക്കോടതി ഈ മാസം 29നു വിധി പറയും. സോണിയാ ഗാന്ധി, രാഹുല് ഗാന്ധി തുടങ്ങിയ കോണ്ഗ്രസ് നേതാക്കള്ക്കെതിരായ ഇ ഡിയുടെ കുറ്റപത്രം ഫയലില് സ്വീകരിക്കുന്നത് സംബന്ധിച്ചാണ് വിധി. ദല്ഹി റോസ് അവന്യൂ കോടതിയിലെ പ്രത്യേക ജഡ്ജി വിശാല് ഗോഗ്നെയാണ് കേസ് പരിഗണിക്കുന്നത്.
നാഷണല് ഹെറാള്ഡ് പത്രം പ്രസിദ്ധീകരിക്കുന്ന അസോസിയേറ്റഡ് ജേര്ണലിനെ യങ് ഇന്ത്യ എന്ന കമ്പനി ഏറ്റെടുത്തതിന് പിന്നില് കള്ളപ്പണം വെളുപ്പിക്കലാണെന്നാണ് ആരോപണം. 50 ലക്ഷം രൂപ മുടക്കിയാണ് അസോസിയേറ്റഡ് ജേര്ണലിനെ യങ് ഇന്ത്യ ഏറ്റെടുക്കുന്നത്. യങ് ഇന്ത്യയിലെ 76 ശതമാനം ഓഹരികള് സോണിയയുടേയും രാഹുലിന്റേയുമാണ്. ഏറ്റെടുക്കലിന് പിന്നില് വലിയ ക്രിമിനല് ഗൂഢാലോചന നടന്നിട്ടുണ്ടെന്നും എഐസിസിക്കും ഇതില് പങ്കുണ്ടെന്നുമാണ് ഇ ഡിയുടെ ആരോപണം. സോണിയയേയും രാഹുലിനേയും കൂടാതെ സുമന് ദുബൈ, സാം പിത്രോഡ, അന്തരിച്ച നേതാക്കളായ മോത്തിലാല് വോറ, ഓസ്കര് ഫെര്ണാണ്ടന് എന്നിവരും കേസിലെ പ്രതികളാണ്.
