തിരുവനന്തപുരം:സെനറ്റ് ഹാളിലെ പരിപാടിയില്‍ ഭാരതാംബ ചിത്രം വച്ചതിന്റെ പേരില്‍ സര്‍ക്കാര്‍ പിന്തുണയോടെ ഇടതുപക്ഷം നടത്തുന്ന നീക്കങ്ങളെ നേരിട്ട് വൈസ് ചാന്‍സലര്‍. കഴിഞ്ഞ ദിവസം ഇടത് ഭൂരിപക്ഷമുളള സിന്‍ഡിക്കേറ്റ് നിയമവിരുദ്ധമായി സസ്പന്‍ഷന്‍ റദ്ദാക്കിയ രജിസ്ട്രാര്‍ ഡോ. കെഎസ് അനില്‍കുമാറിന്റെ അവധി അപേക്ഷയ്ക്ക് ,സസ്‌പെന്‍ഷനിലിരിക്കുമ്പോള്‍ അവധി അപേക്ഷയ്ക്ക് എന്ത് പ്രസക്തിയെന്ന ചോദ്യമാണ് വിസി മോഹന്‍ കുന്നുമ്മല്‍ മറുപടി നല്‍കിയത്.
ജൂലായ് ഒമ്പത് മുതല്‍ അനിശ്ചിതകാലത്തേക്കാണ് അവധിക്ക് അപേക്ഷിച്ചത്. തന്റെ ചുമതല പരീക്ഷ കണ്‍ട്രോളര്‍ക്ക് നല്‍കണമെന്നും അദ്ദേഹം ആവശ്യപ്പെട്ടിരുന്നു.ഇതിനാണ് വിസിയുടെ മറുപടി.
വിസിയുടെ മറുപടിക്ക് അധികം വൈകാതെ തന്നെ ഡോ കെഎസ് അനില്‍കുമാര്‍ മറുപടി നല്‍കി.സസ്‌പെന്‍ഷനില്‍ അല്ലെന്നും തന്റെ സസ്‌പെന്‍ഷന്‍ സിന്‍ഡിക്കേറ്റ് റദ്ദാക്കിയതാണെന്നും കെഎസ് അനില്‍കുമാര്‍ ഈ ഇമെയിലില്‍ അറിയിച്ചു.സസ്‌പെന്‍ഷന്‍ പരിശോധിക്കേണ്ടത് സിന്‍ഡിക്കേറ്റാണ്. ഹൈക്കോടതിയും ഉചിതമായ ഫോറം പരിശോധിക്കാനാണ് നിര്‍ദ്ദേശിച്ചതെന്നാണ് ഡോ കെഎസ് അനില്‍കുമാര്‍ ഇ മെയിലില്‍ പറയുന്നത്.
രജിസ്ട്രാര്‍ പദവിയില്‍ അനില്‍കുമാര്‍ തുടരുന്നത് വിലക്കി കഴിഞ്ഞ രാത്രി താത്കാലിക വി സി സിസ തോമസ് മുന്നറിയിപ്പ് നല്‍കിയിരുന്നു. ബുധനാഴ്ച സിസ തോമസിന് പകരം വിസി സ്ഥാനത്ത് മോഹന്‍ കുന്നുമ്മല്‍ അവധി കഴിഞ്ഞ് തിരിച്ചെത്തി. പിന്നാലെയായിരുന്നു കെഎസ് അനില്‍കുമാര്‍ അവധി അപേക്ഷ നല്‍കിയത്. ദേഹാസ്വാസ്ഥ്യം കാരണം ഡോക്ടര്‍മാരുടെ ഉപദേശ പ്രകാരം ഇന്ന് മുതല്‍ അനിശ്ചിതകാലത്തേക്ക് അവധി വേണമെന്നായിരുന്നു അപേക്ഷ.
