മുംബൈ: ജപ്പാനിലെ ബാങ്കായ സുമിടോമോ മിത് സൂയി ഇന്ത്യയിലെ യെസ് ബാങ്കിന്റെ 20 ശതമാനം ഓഹരി ഏറ്റെടുത്താല് അത് ഇന്ത്യയിലെ ബാങ്കിംഗിന്റെ മുഖച്ഛായ മാറുന്നതിന് തുടക്കമാവും. 2047ല് ഇന്ത്യയെ ലോകത്തിലെ മൂന്നാമത്തെ സാമ്പത്തിക ശക്തിയാക്കി മാറ്റാന് മോദി സര്ക്കാര് ഒരുങ്ങുമ്പോള് ഇന്ത്യയുടെ ബാങ്കിംഗ് രംഗവും മാറിയേ തീരൂ.
അവിടേക്ക് ശരിക്കും ബഹുരാഷ്ട്രസാന്നിധ്യമുള്ള ബാങ്കുകള് എത്തുന്നതോടെ കൂടുതല് നിക്ഷേപകരെ ആകര്ഷിക്കാന് സാധിക്കും എന്നാണ് കണക്ക് കൂട്ടല്. ഉദാഹരണത്തിന് ജപ്പാനിലെ സുമിടോമോ മിത് സൂയി ബാങ്ക് എത്തുമ്പോള് ഇന്ത്യയില് പണം നിക്ഷേപിക്കാന് ഉറ്റുനോക്കുന്ന വമ്പന് നിക്ഷേപകരെ ഇന്ത്യയിലേക്ക് ആകര്ഷിക്കാന് സാധിക്കും. വിശ്വാസ്യതയുള്ള ബാങ്കിംഗ് സ്ഥാപനങ്ങള് എത്തുന്നതോടെ ഏഷ്യയിലേയും മിഡില് ഈസ്റ്റിലേയും വമ്പന് നിക്ഷേപകരെ ആകര്ഷിക്കാന് കഴിയുമെന്നാണ് ഇന്ത്യ കണക്കുകൂട്ടുന്നത്.
സുമിടോമോ മിത്സൂയി ഫിനാന്ഷ്യല് കോര്പറേഷന്റെ നിയന്ത്രണത്തിലുള്ള ബഹുരാഷ്ട്ര ബാങ്കാണ് സുമിടോമോ മിത് സൂയി ബാങ്ക്. ഇതിനെ എസ് എംബിസി ഗ്രൂപ്പ് എന്നും വിളിക്കും. ജപ്പാനിലെ ടോക്യോയിലെ ചിയോഡയിലാണ് എസ്എംബിസിയുടെ ആസ്ഥാനം. ജപ്പാനിലെ രണ്ടാമത്തെ ഏറ്റവും വലിയ ബാങ്കിംഗ് ഗ്രൂപ്പായ എസ് എംബിസിയ്ക്ക് 2024 ഡിസംബറിലെ കണക്ക് പ്രകാരം 2 ലക്ഷം കോടി ഡോളര് ആസ്തിയുണ്ട്.
യെസ് ബാങ്ക് സാമ്പത്തിക പ്രതിസന്ധിയില് അകപ്പെട്ടപ്പോള്, സ്റ്റേറ്റ് ബാങ്ക് ഓഫ് ഇന്ത്യയും മറ്റ് ഏഴ് ബാങ്കുകളും യെസ് ബാങ്കിന്റെ 20 ശതമാനത്തോളം ഓഹരികള് വാങ്ങിയിരുന്നു. ഒരു ബാങ്കും ഇന്ത്യയില് പരാജയപ്പെടരുത് എന്ന ദൃഢതീരുമാനം മോദി സര്ക്കാരിനുണ്ട്. കാരണം ബാങ്ക് പരാജയപ്പെട്ടാല് ഇന്ത്യയുടെ ബാങ്കിംഗ് ഘടനയുടെ ദൗര്ബല്യം ലോകമാകെ വെളിപ്പെടും. അത് ഒഴിവാക്കാന് എന്ത് വിട്ടുവീഴ്ചയും ചെയ്യാന് കേന്ദ്രസര്ക്കാരും റിസര്വ്വ് ബാങ്കും ഒരുക്കമാണ്. ബാങ്കുകളില് പണലഭ്യത കുറഞ്ഞപ്പോള് കോടികളുടെ ഇന്ത്യന് കറന്സി ഈയിടെ റിസര്വ്വ് ബാങ്ക് പമ്പ് ചെയ്തത് ബാങ്കുകളെ ശക്തിപ്പെടുത്താനാണ്.
ജപ്പാന് ബാങ്ക് എത്തിയാല് കൂടുതല് നിക്ഷേപം ഇന്ത്യയില് ഒഴുകിയെത്തുമെന്ന് ഫിച്ച്
യെസ് ബാങ്കിന്റെ കൂടുതല് ഓഹരികള് ഏറ്റെടുക്കലിന് ലഭ്യമാണെങ്കിലും വെറും 20 ശതമാനം ഓഹരികള് മാത്രമേ ജപ്പാന് ബാങ്കായ എസ് എംബിസി ഇപ്പോള് വാങ്ങുന്നുള്ളൂ. ഇതിനായി ഇപ്പോള് കോംപറ്റീഷന് കമ്മീഷന് ഓഫ് ഇന്ത്യയുടെ അനുമതി തേടിയിരിക്കുകയാണ്. ഈ ഏറ്റെടുക്കലിന് പിന്നില് മത്സരക്ഷമതയോ, മറ്റേതെങ്കിലും ഇന്ത്യന് ബാങ്കുകളുടെ താല്പര്യങ്ങള് ഹനിക്കപ്പെടുകയോ ഇല്ലെന്ന് കോംപറ്റീഷന് കമ്മീഷന് ഓഫ് ഇന്ത്യ സര്ട്ടിഫിക്കറ്റ് നല്കിയാല് ഏറ്റെടുക്കല് നടക്കും. ഈ ഡീല് നടന്നാല് ഇന്ത്യയിലേക്ക് കൂടുതല് വിദേശനിക്ഷേപങ്ങള് ഒഴുകിയെത്തുമെന്ന് അന്താരാഷ്ട്ര റേറ്റിംഗ് ഏജന്സിയായ ഫിച്ച് പറയുന്നു. 20 ശതമാനം ഓഹരികള് 13,482 കോടി രൂപയ്ക്ക് ഏറ്റെടുക്കുക എന്നത് ഇന്ത്യയ്ക്ക് പുറത്തുനിന്നുള്ള ഒരു ധനകാര്യസ്ഥാപനം നടത്തുന്ന ഏറ്റവും വലിയ ധനകാര്യ ഏറ്റെടുക്കല് ഇടപാടാണ്. ബാങ്കുകളില് 26 ശതമാനം നിക്ഷേപമുള്ളവര്ക്ക് മാത്രമാണ് വോട്ടിംഗ് അവകാശം ലഭിക്കുകയുള്ളൂ എന്നതാണ് ഇന്ത്യയുടെ വിദേശനിക്ഷേപകരുടെ മേലുള്ള നയം. അതുപോലെ ധനകാര്യസ്ഥാപനങ്ങള് ഇന്ത്യന് ബാങ്കില് 15 ശതമാനം ഓഹരികള് വാങ്ങിയാലും അവര്ക്ക് വോട്ടിംഗ് അവകാശം ലഭിക്കും.
യെസ് ബാങ്കില് 20 ശതമാനം മാത്രമാണ് ഇപ്പോള് സുമിതോമോ മിത് സൂയി ബാങ്ക് വാങ്ങാന് ഉദ്ദേശിക്കുന്നത്. ഇതിന് ശേഷം അവര് ഓപ്പണ് ഓഫറിലൂടെ കൂടുതല് യെസ് ബാങ്ക് ഓഹരികള് വാങ്ങിയേക്കും. ഓഹരി 26 ശതമാനമായി ഉയര്ത്തിയാല് വോട്ടവകാശം ലഭിക്കുമെന്നതിനാലാണിത്. ഈ സ്ഥിതി വന്നാല് കൂടുതല് ധനകാര്യമേഖലയിലെ നിക്ഷേപകര് ഇന്ത്യയിലെ ബാങ്കിംഗ് മേഖലയിലേക്ക് കടന്നുവരാന് സാധ്യതയുണ്ടെന്ന് ഫിച്ച് റേറ്റിംഗ്സ് വിലയിരുത്തുന്നു. ഇതോടെ ഇന്ത്യയുടെ മധ്യനിര ബാങ്കുകളില് നിക്ഷപിക്കാന് കൂടുതല് വിദേശസ്ഥാപനങ്ങള് എത്താന് സാധ്യതയുണ്ട്. നല്ല പ്രകടനവും മാനേജ്മെന്റും ഉള്ള സുതാര്യമായ വിദേശകമ്പനികള് ഇന്ത്യയുടെ ബാങ്കിംഗ് മേഖലയിലേക്ക് കടന്നുവരുന്നതില് റിസര്വ്വ് ബാങ്കിന് സന്തോഷമാണുള്ളത്. കാരണം അത് ഇന്ത്യയുടെ ധനകാര്യമേഖലയെ കൂടുതല് ശക്തവും ആകര്ഷകവും ആക്കിമാറ്റും.
ജന്മഭൂമി ഓണ്ലൈന്