‘പാകിസ്ഥാന് ഇന്ത്യ ബ്രഹ്മോസ് വില്‍ക്കുമോ?’ പാക് ജനറലിന്റെ ചോദ്യം; ‘തീര്‍ത്തും സൗജന്യമായി നല്‍കു’മെന്ന് ഇന്ത്യന്‍ ശാസ്ത്രജ്ഞന്‍; അത് യാഥാര്‍ത്ഥ്യമായി

ന്യൂദല്‍ഹി:”പാകിസ്ഥാന് ഇന്ത്യ ബ്രഹ്മോസ് മിസൈല്‍ വില്‍ക്കുമോ?” – ഒരിയ്‌ക്കല്‍ ഇത് ചോദിച്ചത് പാകിസ്ഥാന്റെ പട്ടാള ജനറലാണ്. ഇന്ത്യയില്‍ ബ്രഹ്മോസ് മിസൈല്‍ നിര്‍മ്മാണത്തിന്റെ ചുമതലയുള്ള ശാസ്ത്രജ്ഞന്‍ ശിവതാണുപിള്ളയോടായിരുന്നു ഈ ചോദ്യം. “തീര്‍ച്ചയായും, ഒരു പൈസ പോലും വാങ്ങാതെ ഫ്രീയായി പാകിസ്ഥാന് ഇന്ത്യ ബ്രഹ്മോസ് മിസൈല്‍ നല്‍കും” – ഇതായിരുന്നു ശിവതാണുപിള്ള പാകിസ്ഥാന്റെ പട്ടാള ജനറലിന് നല്‍കിയ മറുപടി. പണ്ട് അബുദാബിയില്‍ ഒരു ആയുധപ്രദര്‍ശനപരിപാടിയില്‍ ആയിരുന്നു ഇരുവരും കണ്ടുമുട്ടിയത്. ഡോ. ശിവതാണുപിള്ളൈ തന്റെ ‘കലാമിനൊപ്പം 40 വര്‍ഷങ്ങള്‍:പറയാത്ത കഥകള്‍’ (40 Years with Abdul Kalam: Untold stroies) എന്ന പുസ്തകത്തില്‍ ഇതേക്കുറിച്ച് വിശദമായി എഴുതിയിട്ടുണ്ട്.

അന്ന് പരിഹാസരൂപേണ ശിവതാണുപിള്ളൈ പറഞ്ഞത് പക്ഷെ യാഥാര്‍ത്ഥ്യമായത് ഈയിടെയാണ്. കൃത്യമായി പറഞ്ഞാല്‍ ഓപ്പറേഷന്‍ സിന്ദൂറില്‍. പഹല്‍ഗാം കൂട്ടക്കൊലയ്‌ക്ക് മറുപടിയായി നടത്തിയ ഓപ്പറേഷന്‍ സിന്ദൂറില്‍ പാകിസ്ഥാനിലേക്ക് ഇന്ത്യ ‘സൗജന്യമായി’ അയച്ചുകൊടുത്തത് 15 ബ്രഹ്മോസ് മിസൈലുകള്‍ ആണ്. ഇന്ത്യ ‘സൗജന്യമായി’ നല്‍കിയ ബ്രഹ്മോസ് ആ രാജ്യത്തെ കൊലക്കളമാക്കി മാറ്റുകയായിരുന്നു. “ഇന്ത്യയുടെ സുഖോയ് എംകെ1ല്‍ നിന്നാണ് ഫ്രീയായുള്ള മിസൈലുകള്‍ ഇന്ത്യ പാകിസ്ഥാന്‍ മണ്ണിലേക്ക് അയച്ചത്. പക്ഷെ അത് പാകിസ്ഥാന്റെ ഒമ്പതോളം വ്യോമബേസിനെയും ഭീകരപരിശീലന കേന്ദ്രങ്ങളെയും തകര്‍ത്തു. നൂറില്‍ പരം ഭീകരരെ വധിക്കുകയും ചെയ്തു. പാകിസ്ഥാന്‍ യുദ്ധം നിര്‍ത്തൂ എന്ന് പറഞ്ഞ് ഇന്ത്യയോട് ഇരന്നതും 15 ബ്രഹ്മോസ് മിസൈലുകള്‍ നല്‍കിയ ആഘാതമായിരുന്നു.”.- കഴിഞ്ഞ ദിവസം ഒരു ടിവി ചാനലിന് നല്കിയ അഭിമുഖത്തില്‍ ശാസ്ത്രജ്ഞന്‍ ശിവം താണുപിള്ളൈ പറഞ്ഞു.

“ബ്രഹ്മോസ് വികസിപ്പിക്കുമ്പോള്‍ തന്നെ അറിയാമായിരുന്നു ഒരിയ്‌ക്കല്‍ ഇന്ത്യ ബ്രഹ്മോസ് ഉപയോഗിക്കുമെന്നും അന്നേരം അത് ഇന്ത്യയ്‌ക്ക് ഫലവത്താകുമെന്നും”- ഇന്ന് ബ്രഹ്മോസ് ശില്‍പിയായി അറിയപ്പെടുന്ന ഡിആര്‍ഡിഒ ശാസ്ത്രജ്ഞന്‍ ശിവതാണുപിള്ളൈ പറയുന്നു.

‘ലോകത്ത് ആദ്യമായി ഇന്ത്യ നിര്‍മ്മിച്ചത്’ എന്ന ബ്രാന്‍ഡോടെ ഒരു ആയുധം നിര്‍മ്മിക്കുക എന്നത് അബ്ദുള്‍ കലാമിന്റെ ഏറെക്കാലമായുള്ള സ്വപ്നമായിരുന്നു. പക്ഷെ ആ പേര് ഇന്ത്യയ്‌ക്ക് കിട്ടണമെങ്കില്‍ സ്വന്തമായ ഒരു ആയുധം ഇന്ത്യ നിര്‍മ്മിച്ചിരിക്കണം. അത് ചെയ്യണമെങ്കില്‍ താങ്കള്‍ ഹാര്‍വാഡില്‍ പോകണം എന്നാണ് അന്ന് എ.പി.ജെ. അബ്ദുള്‍ കലാം ശിവതാണുപിള്ളൈയ്‌ക്ക് നല്‍കിയ ഉപദേശം.

1991ല്‍ ശിവതാണുപിള്ളൈ കലാമിന്റെ ഉപദേശത്തോടെ ഹാര്‍വാഡില്‍ പോയി. അന്ന് ഗള്‍ഫ് യുദ്ധം നടക്കുന്ന സമയമായിരുന്നു. സ്വാഭാവികമായും ശിവതാണുപിള്ളൈയുടെ ശ്രദ്ധ ഗള്‍ഫ് യുദ്ധത്തിലായി. എന്തൊക്കെ ആയുധങ്ങളാണ് അമേരിക്ക പുറത്തെടുക്കുന്നത് എന്ന് നോക്കിക്കാണുകയായിരുന്നു ശിവതാണുപിള്ളൈ. ആ യുദ്ധത്തില്‍ ഹീറോ ആയത് അമേരിക്കയുടെ ടോമഹോക് മിസൈല്‍ ആയിരുന്നു. അത് ക്രൂയിസ് മിസൈല്‍ ആയിരുന്നു. ശത്രുവിനെ നിസ്സാഹായമാക്കണമെങ്കില്‍ ഇന്ത്യയ്‌ക്കും ഒരു ക്രൂയിസ് മിസൈല്‍ വേണം എന്ന ചിന്ത അന്നാണ് ശിവതാണുപിള്ളൈയുടെ മനസ്സില്‍ ഉണ്ടായത്. ഉടനെ ഇക്കാര്യം അദ്ദേഹം ഹാര്‍വാഡില്‍ നിന്നും അബ്ദുള്‍ കലാമിനെ വിളിച്ചുപറഞ്ഞു. ആദ്യം നിങ്ങള്‍ കോഴ്സ് പൂര്‍ത്തിയാക്കൂ എന്നിട്ട് ചര്‍ച്ച ചെയ്യാം എന്നായിരുന്നു അബ്ദുള്‍ കലാമിന്റെ നിലപാട്. ആ കോഴ്സ് കഴിഞ്ഞ് തിരിച്ചുവന്ന ശേഷമാണ് ബ്രഹ്മോസ് പൂര്‍ത്തിയാക്കിയത്.