ആലപ്പുഴ: ഗൂഗിള് പേ വഴി കൈക്കൂലി വാങ്ങിയ ഹരിപ്പാട് വില്ലേജ് ഓഫീസര് പി കെ പ്രീതയെ വിജിലന്സ് പിടികൂടി. കേന്ദ്രസര്ക്കാരിന്റെ സ്റ്റാക്ക് പോര്ട്ടലില് രജിസ്റ്റര് ചെയ്യുന്നതു വഴി കൃഷി ആനുകൂല്യം ലഭിക്കുന്നതിന് സ്വന്തം വസ്തുവിന്റെ പഴയ സര്വ്വേ നമ്പര് ആവശ്യപ്പെട്ട ഹരിപ്പാട് സ്വദേശിയായ കര്ഷകനോട് രേഖകള് വാട്ട്സ് ആപ്പ് ചെയ്യാനും ഇതിനൊപ്പം ആയിരം രൂപ ഗൂഗിള് പേ വഴി നല്കാനും ആവശ്യപ്പെടുകയായിരുന്നു. ഇക്കാര്യം വിജിലന്സിനെ അറിയിച്ചപ്പോള് അവരുടെ നിര്ദേശപ്രകാരം പണം അയച്ചു നല്കി. തുടര്ന്നാണ് വിജിലന്സ് സംഘം വില്ലേജ് ഓഫീസിന് സമീപത്തെ പാര്ക്കിങ് ഗ്രൗണ്ടില് നിന്ന് വില്ലേജ് ഓഫീസറെ പിടികൂടിയത്. 1000 രൂപ ഗൂഗിള് പേ വഴി സ്വീകരിച്ചതായി ഫോണ് പരിശോധിച്ചതില് നിന്ന് വിജിലന്സിനു വ്യക്തമായി. പ്രീതയെ കോട്ടയം വിജിലന്സ് കോടതിയില് ഹാജരാക്കി.
