വാഷിംഗ്ടൺ ; മക്കള് രണ്ട് മതവിശ്വാസത്തിലാണ് വളരുന്നതെന്നും വലുതാകുമ്പോള് അവര്ക്ക് ഇഷ്ടമുള്ള മതം തിരഞ്ഞെടുക്കാമെന്നും അമേരിക്കയുടെ വൈസ് പ്രസിഡന്റ് ജെ.ഡി വാന്സിന്റെ ഭാര്യയും ഇന്ത്യന് വംശജയുമായ ഉഷ വാന്സ്. മേഗന് മക്കെയ്ന്റെ പോഡ്കാസ്റ്റ് ഷോയായ സിറ്റിസണ് മക്കെയ്നില് സംസാരിക്കുകയായിരുന്നു ഉഷ .
മക്കളായ ഈവന്, വിവേക്, മിരാബെല് എന്നിവർ കത്തോലിക്ക സ്കൂളിലാണ് പഠിക്കുന്നതെന്നും കത്തോലിക്കരായി ജീവിക്കണമോ എന്നത് അവരുടെ തിരഞ്ഞെടുപ്പാണെന്നും ഉഷ വ്യക്തമാക്കി. ഉഷ ഹിന്ദു മതവിശ്വാസിയും ഭര്ത്താവ് ജെ.ഡി വാന്സ് കത്തോലിക്കനുമാണ്.
“ജെഡിയെ ഞാൻ കണ്ടുമുട്ടിയ സമയത്ത്, അദ്ദേഹം കത്തോലിക്കനായിരുന്നില്ല, പിന്നീട് അദ്ദേഹം മതം മാറി, അദ്ദേഹം മതം മാറിയപ്പോൾ, അതിനെക്കുറിച്ച് ഞങ്ങൾ ധാരാളം സംസാരിച്ചു. കാരണം അത് യഥാർത്ഥത്തിൽ ഞങ്ങളുടെ ആദ്യത്തെ കുട്ടി ജനിച്ചതിനു ശേഷമായിരുന്നു. നിങ്ങൾ കത്തോലിക്കാ മതത്തിലേക്ക് പരിവർത്തനം ചെയ്യുമ്പോൾ, നിങ്ങളുടെ കുട്ടിയെ വിശ്വാസത്തിൽ വളർത്തുക തുടങ്ങിയ നിരവധി പ്രധാന ബാധ്യതകൾ ഉൾപ്പെടുന്നു.”
ഞാന് കത്തോലിക്കയല്ലെന്ന് മക്കള്ക്ക് അറിയാം. ഞങ്ങള് അവര്ക്ക് നല്കുന്ന പുസ്തകങ്ങളില്നിന്നും കാണിച്ചുകൊടുക്കുന്ന കാഴ്ച്ചകളില്നിന്നും അടുത്തിടെ നടത്തിയ ഇന്ത്യാ സന്ദര്ശനത്തില്നിന്നും ഹിന്ദു പാരമ്പര്യവുമായി ബന്ധം പുലര്ത്താനുള്ള ഒട്ടേറെ അവസരങ്ങള് മക്കള്ക്കുണ്ടായിട്ടുണ്ട്. എന്റെ കുടുംബം കടുത്ത ഹിന്ദു മത വിശ്വാസികളാണ്. എന്റെ മുത്തശ്ശി ഹിന്ദു മത വിശ്വാസിയാണ്. അവര് പതിവായി ക്ഷേത്രത്തില് പോകും. സ്വന്തമായി പൂജകള് ചെയ്യും.’- ഉഷാ വാന്സ് പറയുന്നു. അടുത്ത തവണ ഹോളി ആഘോഷം നടത്താന് പദ്ധതിയുണ്ടെന്നും അതിനായി കാത്തിരിക്കുകയാണെന്നും അവര് പറയുന്നു.
