എന്താണ് ഈ ഇസ്രയേല്‍ ക്ലോക്ക്? ഖമേനി എന്തിന് ഇങ്ങിനെ ഒരു ക്ലോക്ക് സ്ഥാപിച്ചു?

ടെഹ് റാന്‍:  ജൂണ്‍ 23 തിങ്കളാഴ്ച 50ഓളം ഇസ്രയേല്‍ യുദ്ധവിമാനങ്ങള്‍ ഇറാന്‍ തലസ്ഥാനമായ ടെഹ്റാനില്‍ സംഹാരതാണ്ഡവമാടുന്നതിനിടെ അവര്‍ മനപൂര്‍വ്വം ഇറാന്‍ ടെഹ്റാനില്‍ സ്ഥാപിച്ച ‘ഇസ്രയേല്‍ ക്ലോക്കും’ തകര്‍ത്തു. ഖമേനി ഭരണത്തിന്റെ ഓര്‍മ്മകളും അധികാരശ്രേണികളും തുടച്ചുനീക്കുന്നതിന്റെ ഭാഗമായി ബസീജ് സേനയുടെ ആസ്ഥാനവും ആയത്തൊള്ള ഖമേനി രാഷ്‌ട്രീയ എതിരാളികളെ തടവിലാക്കാന്‍ ഉപയോഗിച്ചിരുന്ന കുപ്രസിദ്ധമായ എവിന്‍ ജയിലും ഇസ്രയേല്‍ തകര്‍ത്തിരുന്നു.

എന്താണ് ഇസ്രയേല്‍ ക്ലോക്ക്?

ഇറാന്‍ എന്തിനാണ് തലസ്ഥാനമായ ടെഹ്റാനില്‍ ഇസ്രയേലിന്റെ പേരില്‍ ഒരു ക്ലോക്ക് സ്ഥാപിച്ചത് ? നിരവധി പേരാണ് എന്താണ് ഇറാന്റെ തലസ്ഥാനത്തുള്ള ഇസ്രയേല്‍ ക്ലോക്ക് എന്നത് അറിയാന്‍ ഗൂഗിളില്‍ തിരച്ചില്‍ നടത്തിയത്.

എന്താണ് ഈ ഇസ്രയേല്‍ ക്ലോക്കിന്റെ പ്രത്യേകത? എന്തിനാണ് ഇസ്രയേല്‍ യുദ്ധവിമാനങ്ങള്‍ ഇത് ബോംബിട്ട് തകര്‍ത്തത്.? 2015ല്‍ ആയത്തൊള്ള ഖമേനി ഒരു പ്രസംഗത്തിനിടെ നടത്തിയ പ്രസംഗത്തിന്റെ അടിസ്ഥാനത്തിലാണ് ഈ ക്ലോക്ക് ഇറാന്‍ സ്ഥാപിച്ചത്. അടുത്ത 25 വര്‍ഷത്തിനുള്ളില്‍ ഇസ്രയേല്‍ ഇല്ലാതാകും എന്നായിരുന്നു ആയത്തൊള്ള ഖമേനിയുടെ പ്രസംഗം. ഖമേനിയുടെ ഈ പ്രവചനത്തിന്റെ അടിസ്ഥാനത്തിലാണ്, 2017ല്‍ ആയത്തൊള്ള ഖമേനി ഇറാന്‍ തലസ്ഥാനമായ ടെഹ്റാനിലെ പലസ്തീന്‍ സ്ക്വയറില്‍ ഇസ്രയേല്‍ ക്ലോക്ക് എന്ന പേരില്‍ ഈ ഡിജിറ്റല്‍ ക്ലോക്ക് സ്ഥാപിച്ചത്. ഇസ്രയേല്‍ എന്ന രാജ്യത്തിന്റെ തന്നെ അന്ത്യവിധിദിനം തന്നെ പ്രവചിക്കുന്നതാണ് ഈ ക്ലോക്ക്. ഇസ്രയേല്‍ ക്ലോക്ക് എന്ന് വിളിക്കപ്പെടുന്ന ഈ ക്ലോക്ക് കൊല്ലവര്‍ഷം 2040ല്‍ പ്രവര്‍ത്തനം അവസാനിപ്പിക്കുന്ന രീതിയിലാണ് സെറ്റ് ചെയ്തിരിക്കുന്നത്. 2040 ആകുമ്പോഴേക്ക് ഇസ്രയേല്‍ എന്ന രാജ്യത്തെ തന്നെ തുടച്ചുനീക്കുക എന്നതായിരുന്നു ആയത്തൊള്ള ഖമേനിയുടെ ലക്ഷ്യം. ഇറാന്റെ ആധിപത്യത്തിന്റെ പ്രതീകമായതിനാലും ഇസ്രയേലിന്റെ അന്ത്യവിധിദിനം പ്രവചിക്കുന്നതിനാലുമാണ് ഇസ്രയേല്‍ യുദ്ധവിമാനങ്ങള്‍ ബോംബാക്രമണത്തില്‍ ഈ ഇസ്രയേല്‍ ക്ലോക്ക് തകര്‍ത്തത്.

ഇറാന്റെ പ്രവചനപ്രകാരം ഇസ്രയേല്‍ തകരാന്‍ ഇനി 15 വര്‍ഷം കൂടി മാത്രം ബാക്കിനില്‍ക്കെയാണ് ആയത്തൊള്ള ഖമേനിയുടെ ഇറാനെ ബോംബാക്രമണത്തില്‍ ഇസ്രയേല്‍ നശിപ്പിച്ചത്. ഇറാന്റെ മൂന്ന് ആണവകേന്ദ്രങ്ങളും തകര്‍ത്തു. ഇനി ആയത്തൊള്ള ഖമേനിയെ അധികാരത്തില്‍ നിന്നും മാറ്റാനാണ് ഇസ്രയേല്‍ ശ്രമം.