കൊച്ചി: മലപ്പുറം ജില്ലയിലെ വിദ്യാഭ്യാസ സ്ഥാപനങ്ങള് സംബന്ധിച്ച് സത്യം പറഞ്ഞപ്പോള് തന്നെ എല്ലാവരും വര്ഗീയവാദിയാക്കിയെന്ന് എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന്. മലപ്പുറം ജില്ലയില് ഒറ്റ സ്കൂളുകള് പോലും സമുദായത്തിനില്ലെന്ന ദു:ഖം തുറന്നു പറയേണ്ടതുണ്ട്. ആ അനീതിയാണ് തുറന്നു കാണിച്ചത്. തെറ്റുചൂണ്ടിക്കാണിച്ചപ്പോള് എല്ലാവരും വളഞ്ഞിട്ട് ആക്രമിക്കുകയായിരുന്നുവെന്നും മന്ത്രി കെ.എന്. ബാലഗോപാല് വേദിയിലിക്കെ വെള്ളാപ്പള്ളി പറഞ്ഞു.
പതിനൊന്ന് എയ്ഡഡ് കോളജുകളാണ് മുസ്ലിം സമുദായത്തിനുള്ളത്. ഇതില് ആറെണ്ണം അറബി കോളജുകളാണ്. ഒറ്റയെണ്ണം പോലും പിന്നാക്കക്കാര്ക്കില്ലെന്നും അദ്ദേഹം പറഞ്ഞു. എസ്എന്ഡിപി യോഗത്തിന്റെയും എസ്എന് ട്രസ്റ്റിന്റെയും സാരഥ്യത്തില് മൂന്നു പതിറ്റാണ്ടു പൂര്ത്തിയാക്കിയ വെള്ളാപ്പള്ളി നടേശനെ ആദരിക്കാന് കണയന്നൂര് യൂണിയന്റെ ആഭിമുഖ്യത്തില് എറണാകുളം ടൗണ് ഹാളില് സംഘടിപ്പിച്ച മഹാസമ്മേളനത്തില് സംസാരിക്കുകയായിരുന്നു അദ്ദേഹം.
മലപ്പുറം മൊത്തം മുസ്ലിങ്ങളുടേതല്ല. ഈഴവരും ഹിന്ദുക്കളും അവിടെ പഠിക്കുന്നുണ്ട്. കേരളത്തിലെ ഒന്പത് രാജ്യസഭാ എംപിമാരില് ഒരാള് പോലും പിന്നാക്കക്കാരില്നിന്നില്ല. ശ്രീനാരായണ ഓപ്പണ് സര്വകലാശാലയില് വൈസ് ചാന്സലറായി ഗുരുദേവനെക്കുറിച്ച് അറിയാത്ത മുസ്ലിമിനെ നിയമിച്ചപ്പോള് വിമര്ശിച്ചിരുന്നു. അപ്പോഴും മുസ്ലിങ്ങള്ക്കായി വളഞ്ഞിട്ടാക്രമിക്കുകയായിരുന്നു. പാര്ലമെന്റില് പോകാന് താത്പര്യമില്ലാത്തതുകൊണ്ടാണ് ഇക്കാര്യങ്ങളെല്ലാം തുറന്നടിക്കുന്നത്. ഗുരുദേവനെക്കുറിച്ച് പുസ്തകം എഴുതിയിട്ടുണ്ടെങ്കിലും എസ്എന്ഡിപി യോഗത്തെക്കുറിച്ച് ഒന്നും അറിയാത്തയാളാണ് എം.കെ. സാനു. അദ്ദേഹമാണ് യോഗത്തിനെതിരെ കേസ് കൊടുത്തിരിക്കുന്നതെന്നും വെള്ളാപ്പള്ളി പറഞ്ഞു.
ചടങ്ങില് മന്ത്രി പി.രാജീവ് അധ്യക്ഷത വഹിച്ചു. മന്ത്രി കെ.എന്. ബാലഗോപാല് യോഗം ഉദ്ഘാടനം ചെയ്തു. ഹൈബി ഈഡന് എംപി, എംഎല്എമാരായ കെ. ബാബു, ടി.ജെ. വിനോദ്, മുന്മന്ത്രി ഡൊമിനിക് പ്രസന്റേഷന്, യുണിയന് ചെയര്മാന് മഹാരാജ ശിവാനന്ദന്, കണ്വീനര് എം.ഡി. അഭിലാഷ് എന്നിവര് സംസാരിച്ചു. പ്രീതി നടേശന് സംബന്ധിച്ചു.
