തിരുവനന്തപുരം: സ്കൂള് സമയം മാറ്റുന്നതില് സര്ക്കാരിന് കടുംപിടുത്തമില്ലെന്ന് വിദ്യാഭ്യാസ വകുപ്പ് മന്ത്രി വി ശിവന്കുട്ടി. സമസ്തയുടെ എതിര്പ്പിനെ തുടര്ന്നാണ് പ്രതികരണം. സമയ ക്രമീകരണത്തില് ഏതെങ്കിലും വിഭാഗത്തിന് ബുദ്ധിമുട്ടുണ്ടായെങ്കില് ചര്ച്ച നടത്തുമെന്ന് മന്ത്രി പറഞ്ഞു.
ഹൈക്കോടതി അംഗീകാരം ഉണ്ടെങ്കില് സ്കൂള് സമയം കൂട്ടിയ ഉത്തരവ് പിന്വലിക്കാം. ആര്ക്കും ബുദ്ധിമുട്ടില്ലാത്ത ക്രമീകരണം നടത്താം. ഇതുവരെ പരാതി ആരും നല്കിയിട്ടില്ലെന്നും പരാതി ലഭിച്ചാല് ചര്ച്ച ചെയ്യുമെന്നും മന്ത്രി വ്യക്തമാക്കി.
സ്കൂള് സമയമാറ്റത്തെ വിമര്ശിച്ച് സമസ്ത അധ്യക്ഷന് ജിഫ്രി മുത്തുകോയ തങ്ങള് രംഗത്തെത്തിയിരുന്നു. സ്കൂള് സമയമാറ്റം മതപഠനം നടത്തുന്ന കുട്ടികളെ ബാധിക്കുമെന്നും ബുദ്ധിമുട്ട് മനസിലാക്കിയുള്ള മാറ്റം ഉണ്ടാകുമെന്ന് പ്രതീക്ഷിക്കുന്നുവെന്നും ജിഫ്രി തങ്ങള് പറഞ്ഞു. സമസ്ത ചരിത്രം- കോഫി ടേബിള് പുസ്തകത്തിന്റെ പ്രകാശന പരിപാടിയില് സംസാരിക്കുമ്പോഴാണ് ജിഫ്രി മുത്തുകോയ തങ്ങള് ഇങ്ങനെ പറഞ്ഞത്.
