തിരുവനന്തപുരം: കേരള തീരത്ത് 28 ന് രാത്രി 8.30 വരെ 3.5 മുതല് 4.0 മീറ്റര് വരെ ഉയര്ന്ന തിരമാലയ്ക്കും കടലാക്രമണത്തിനും സാധ്യതയുണ്ടെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രം അറിയിച്ചു. തിരുവനന്തപുരം കാപ്പില് മുതല് പൊഴിയൂര് വരെ, കൊല്ലം ആലപ്പാട് മുതല് ഇടവ വരെ, ആലപ്പുഴ ചെല്ലാനം മുതല് അഴീക്കല് ജെട്ടി വരെ, എറണാകുളം മുനമ്പം മുതല് മറുവക്കാട് വരെ, തൃശൂര് ആറ്റുപുറം മുതല് കൊടുങ്ങല്ലൂര് വരെ, മലപ്പുറം കടലുണ്ടി നഗരം മുതല് പാലപ്പെട്ടി വരെ, കോഴിക്കോട് ചോമ്പാല മുതല് രാമനാട്ടുകര വരെ, കണ്ണൂര് വളപട്ടണം മുതല് ന്യൂമാഹി വരെ, കാസര്ഗോഡ് കുഞ്ചത്തൂര് മുതല് കോട്ടക്കുന്ന് വരെയും കന്യാകുമാരി ജില്ലയിലെ നീരോടി മുതല് ആരോക്യപുരം വരെയുള്ള തീരങ്ങളില് റെഡ് അലര്ട്ട് പ്രഖ്യാപിച്ചു.
മത്സ്യത്തൊഴിലാളികളും തീരദേശവാസികളും അതീവ ജാഗ്രത പാലിക്കണം. മുന്നറിയിപ്പ് പിന്വലിക്കുന്നത് വരെ ബീച്ചുകള് കേന്ദ്രീകരിച്ചുള്ള വിനോദസഞ്ചാരമുള്പ്പെടെയുള്ള എല്ലാ പ്രവര്ത്തനങ്ങളും പൂര്ണ്ണമായി ഒഴിവാക്കണമെന്നും ദേശീയ സമുദ്രസ്ഥിതിപഠന ഗവേഷണ കേന്ദ്രം അറിയിച്ചു.
മോശം കാലാവസ്ഥയ്ക്കും മണിക്കൂറില് 60 കിലോമീറ്റര് വരെ ശക്തമായ കാറ്റിനും സാധ്യതയുള്ളതിനാല് കേരള – കര്ണാടക – ലക്ഷദ്വീപ് തീരങ്ങളില് മെയ് 31 വരെ മത്സ്യബന്ധനത്തിന് പോകാന് പാടില്ലെന്ന് കേന്ദ്ര കാലാവസ്ഥാ വകുപ്പ് അറിയിച്ചു.
