ന്യൂദല്‍ഹി: ജവഹർലാൽ നെഹ്റു സർവകലാശാല വിദ്യാർത്ഥി യൂണിയൻ തെരഞ്ഞെടുപ്പ് നടപടികൾ നിർത്തിവെക്കാനുള്ള ശ്രമം അപലപനീയമാണ് എന്നും തെരഞ്ഞെടുപ്പ് കമ്മിറ്റി ഇടത് വിദ്യാർത്ഥി സംഘടനകളുടെ കളിപ്പാവയായി മാറിയിരിക്കുന്നു എന്നും അഖില ഭാരതീയ വിദ്യാർത്ഥി പരിഷത്ത് ആരോപിച്ചു.
തെരഞ്ഞെടുപ്പ് നടപടികളെ സ്വാർത്ഥ താല്പര്യങ്ങൾക്ക് വേണ്ടി അട്ടിമറിക്കാൻ ഇടത് സംഘടനകൾ വലിയ ഗൂഢാലോചനയാണ് നടത്തിയത്. നാമനിർദ്ദേശ പത്രിക പിൻവലിക്കാനുള്ള സമയം തങ്ങളുടെ ആവശ്യാനുസരണം മാറ്റിയത് ഇതിന്റെ തെളിവാണ് എന്ന് എബിവിപി ആരോപിച്ചു.
തെരഞ്ഞെടുപ്പ് വിജ്ഞാപനം അനുസരിച്ച് നാമനിർദ്ദേശ പത്രിക പിൻവലിക്കാനുള്ള അവസാന തീയതി ഏപ്രിൽ 16 ആയിരുന്നു എന്നാൽ ഇത് 17 ലേക്ക് മാറ്റിയത് അസാധാരണമാണ്.
ഇന്നലെ നാമനിർദ്ദേശ പത്രിക പിൻവലിക്കാനുള്ള അവസാന ദിവസമായിരുന്നു.
എന്നാൽ സമയം അവസാനിച്ചതിനുശേഷവും പ്രക്രിയ തുടരാൻ തെരഞ്ഞെടുപ്പ് കമ്മിറ്റി ശ്രമം നടത്തി. ഇടത് വിദ്യാർത്ഥി സംഘടനകളുടെ രാഷ്‌ട്രീയ നാടകങ്ങൾക്ക് അവസരം ഒരുക്കുന്നതിന് വെള്ളിയാഴ്ച വൈകിട്ട് വരെ സമയം നീട്ടി നൽകി എന്നും എബിവിപി ആരോപിച്ചു.
ഇതിനെതിരെ വിദ്യാർത്ഥികളുടെ ഭാഗത്ത് നിന്നും ശക്തമായ പ്രതിഷേധം ഉയർന്നു. ഈ പ്രതികൂല സാഹചര്യത്തെ മറികടക്കാൻ ഉണ്ടാക്കിയ ഗൂഢാലോചനയുടെ ഭാഗമാണ് തെരഞ്ഞെടുപ്പ് നടപടികൾ നിർത്തിവെച്ചത്. ഇത് അപലപനീയമാണ്. ജനാധിപത്യത്തെ കശാപ്പ് ചെയ്യുന്ന തെരഞ്ഞെടുപ്പ് കമ്മിറ്റി നടപടികൾക്ക് എതിരെ ശക്തമായി നിലകൊള്ളുമെന്നും എബിവിപി വ്യക്തമാക്കി.
പ്രതികരിക്കാൻ ഇവിടെ എഴുതുക: