ന്യൂദല്‍ഹി: മണിപ്പൂരില്‍ രാഷ്ട്രപതി ഭരണം ഏര്‍പ്പെടുത്തിയതിന് അംഗീകാരം തേടിയുള്ള പ്രമേയം ലോക്സഭ പാസാക്കി. വഖഫ് നിയമഭേദഗതി ബില്‍ പാസാക്കിയതിന് തൊട്ടുപിന്നാലെ വ്യാഴാഴ്ച പുലര്‍ച്ചെ രണ്ട് മണിക്ക് കേന്ദ്ര ആഭ്യന്തരമന്ത്രി അമിത്ഷായാണ് പ്രമേയം അവതരിപ്പിച്ചത്. പ്രമേയാവതരണത്തില്‍ പ്രതിപക്ഷാംഗങ്ങള്‍ പ്രതിഷേധമുയര്‍ത്തിയെങ്കിലും സ്പീക്കര്‍ നടപടിയുമായി മുന്നോട്ടുപോകുകയായിരുന്നു.
ബുധനാഴ്ചയിലെ കാര്യപരിപാടിയില്‍ പതിനാലാമതായായിരുന്നു മണിപ്പൂരില്‍ രാഷ്ട്രപതി ഭരണത്തിന് അംഗീകാരംതേടിയുള്ള പ്രമേയം ഉള്‍പ്പെടുത്തിയിരുന്നത്. വഖഫ് നിയമഭേദഗതി ബില്‍ ആയിരുന്നു അതിന് തൊട്ടുമുന്നിലെ ഇനം. ബില്‍ പാസായതോടെ സ്പീക്കര്‍ ഓം ബിര്‍ള പ്രമേയാവതരണത്തിന് അമിത്ഷായെ ക്ഷണിക്കുകയായിരുന്നു. അപ്പോഴേയ്‌ക്കും സമയം രണ്ട് മണിയായി. രാവിലെ 11ന് സഭ ചേരുമ്പോള്‍ നടത്തിയാല്‍ മതിയെന്നായിരുന്നു പ്രതിപക്ഷത്തിന്റെ ആവശ്യം. എന്നാല്‍ സ്പീക്കര്‍ നടപടിയുമായി മുന്നോട്ടുപോവുകയും കോണ്‍ഗ്രസ് അംഗം ശശി തരൂരിനോട് ചര്‍ച്ചയ്‌ക്ക് തുടക്കമിടാന്‍ ആവശ്യപ്പെടുകയും ചെയ്തു.
കഴിഞ്ഞ നാല് മാസത്തിനിടെ മണിപ്പൂരില്‍ ഒരു അക്രമവും ഉണ്ടായിട്ടില്ലെന്ന് ചര്‍ച്ചയ്‌ക്ക് മറുപടിയായി കേന്ദ്ര ആഭ്യന്തര മന്ത്രി അമിത് ഷാ പറഞ്ഞു. ദുരിതാശ്വാസ ക്യാമ്പുകളില്‍ ഭക്ഷണവും മരുന്നും ഉറപ്പാക്കിയിട്ടുണ്ട്. സാങ്കേതിക, മെഡിക്കല്‍ വിദ്യാഭ്യാസത്തിനുള്ള ഓണ്‍ലൈന്‍ സൗകര്യം ഉണ്ട്, ക്യാമ്പുകളില്‍ പ്രാഥമിക വിദ്യാഭ്യാസത്തിനുള്ള സൗകര്യവും ഒരുക്കിയിട്ടുണ്ട്. സംസ്ഥാനത്ത് മുമ്പും സംഘര്‍ഷങ്ങള്‍ ഉണ്ടായിട്ടുള്ളതിനാല്‍ ഈ വിഷയത്തില്‍ രാഷ്‌ട്രീയം കളിക്കരുത്. സമാധാനപരമായ ഒരു പരിഹാരത്തിനായി മെയ്തെയ്, കുക്കി സമൂഹങ്ങള്‍ തമ്മില്‍ ചര്‍ച്ചകള്‍ നടക്കുന്നുണ്ട്. സംസ്ഥാനത്ത് സാധാരണ നില പുനഃസ്ഥാപിക്കാന്‍ സര്‍ക്കാര്‍ സാധ്യമായ എല്ലാ നടപടികളും സ്വീകരിച്ചിട്ടുണ്ടെന്നും അദ്ദേഹം പറഞ്ഞു. അംഗങ്ങള്‍ ഒറ്റക്കെട്ടായി പ്രമേയത്തെ പിന്തുണച്ചതോടെ അരമണിക്കൂര്‍ ചര്‍ച്ചയ്‌ക്കേ ശേഷം പ്രമേയം പാ
സായി.
