ചേര്ത്തല: ആശമാര് നടത്തുന്ന സമരത്തിന് പൂര്ണ പിന്തുണയുമായി എന്ഡിഎ. ചേര്ത്തലയില് നടന്ന എന്ഡിഎ നേതൃയോഗമാണ് നിര്ണായക തീരുമാനം എടുത്തത്. യോഗം അംഗീകരിച്ച രാഷ്ട്രീയ പ്രമേയത്തില് ആശാ വിഷയത്തില് സംസ്ഥാന സര്ക്കാരിനെതിരെ രൂക്ഷവിമര്ശനമാണുയര്ത്തിയത്. മുഖ്യമന്ത്രി പിണറായി വിജയന്റെ ധാര്ഷ്ട്യവും സ്ത്രീവിരുദ്ധ നിലപാടുകളുമാണ് സമരം പരിഹാരമാകാത്തതിനു പിന്നിലെന്നും കോടികള് പലപേരുകളില് ധൂര്ത്തടിക്കുമ്പോഴാണ് ആശമാര്ക്കുനേരേ സര്ക്കാര് മുഖം തിരിക്കുന്നത്. വികസിത കേരളം എന്ന മുദ്രാവാക്യമുയര്ത്തി ജനങ്ങളിലേക്കിറങ്ങുന്നതിനും യോഗം തീരുമാനിച്ചു. പരിഷ്കൃത സമൂഹത്തിനു ചേരാത്ത കാടന് നയങ്ങളാണ് കേരളത്തെ തകര്ക്കുന്നത്. ഇതുമൂലം സംരംഭകര് കേരളത്തില് നിന്നകലുന്നു. ഇതിനു പരിഹാരമായി കേന്ദ്രത്തിനൊപ്പം കേരളവും വികസിക്കേണ്ടതുണ്ടെന്ന മുദ്രാവാക്യമുയര്ത്തി. പുതിയതലമുറയ്ക്ക് ആത്മവിശ്വാസം നല്കി രംഗത്തിറങ്ങണം.
സര്ക്കാരിനു ഓശാനപാടി കേന്ദ്രത്തെ എതിര്ക്കുന്ന സംസ്ഥാനത്തെ പ്രതിപക്ഷത്തിനു സര്ക്കാരിനെ നേരിടാനുള്ള കരുത്തില്ലെന്നും സമ്പൂര്ണ പരാജയമാണെന്നും രാഷ്ട്രീയ പ്രമേയത്തില് പറയുന്നു. തീരദേശ ജനതയുടെ ദുരിതമകറ്റാന് കഴിയാത്ത സര്ക്കാരും പ്രതിപക്ഷവും ഇപ്പോള് കടല്മണല് ഖനനം ഉയര്ത്തി തെറ്റിദ്ധരിപ്പിക്കാനാണ് ശ്രമിക്കുന്നത്. ഇവരുടെ പ്രശ്നങ്ങള് പരിഹരിക്കാന് എന്ഡിഎ രംഗത്തിറങ്ങും.
വഖഫ് ഭേദഗതി ബില്ലിലെ നിലപാടില് സംസ്ഥാനത്തെ ഭരണപ്രതിപക്ഷ പാര്ട്ടികള് തീരദേശജനതയെ വഞ്ചിച്ചിരിക്കുകയാണെന്ന് മറ്റൊരു പ്രമേയത്തില് പറയുന്നു. മത്സ്യത്തൊഴിലാളികള് ഉള്പ്പെടെ നിസ്സഹായരായ ലക്ഷങ്ങള്ക്കു രക്ഷയൊരുക്കുന്ന ബില്കൊണ്ടുവന്ന കേന്ദ്രസര്ക്കാരിനെ യോഗം അഭിനന്ദിച്ചു. ബില് വായിച്ചുപോലും നോക്കാതെയാണ് മുസ്ലിം വിരുദ്ധമെന്ന പ്രചരണം നടത്തുന്നത്. എല്ലാ വിഭാഗം ജനങ്ങളെയും ചേര്ത്തുനിര്ത്തുന്നതാണ് പ്രമേയം.പ്രമേയത്തില് തീരദേശ മത്സ്യതൊഴിലാളികള്ക്കുണ്ടായ നേട്ടങ്ങള് ഉയര്ത്തി അവര്ക്കിടയിലേക്കിറങ്ങുന്നതിനും യോഗം തീരുമാനിച്ചു. 10-ന് മുനമ്പത്ത് പ്രത്യേക സമ്മേളനം നടത്തും.
ബിജെപി സംസ്ഥാന അധ്യക്ഷനായി ചുമതലയേറ്റ രാജീവ്ചന്ദ്രശേഖറിനു യോഗത്തില് സ്വീകരണം നല്കി. കണ്വീനര് തുഷാര് വെള്ളാപ്പള്ളി, നേതാക്കളായ വി.മുരളീധരന്, കുമ്മനം രാജശേഖരന്, പി. കെ.കൃഷ്ണദാസ്, കെ. പത്മകുമാര്, കെ.എ.ഉണ്ണികൃഷ്ണന്, സംഗീത വിശ്വനാഥന്,നിയാസ് വൈദ്യരാഗം,പിഎച്ച്.രാമചന്ദ്രന്, കുരുവിള മാത്യു, വി.വി.രാജേന്ദ്രന്, വിഷ്ണുപുരം ചന്ദ്രശേഖരന്, പേരൂര്ക്കട ഹരികുമാര് തുടങ്ങിയവര് പങ്കെടുത്തു.
