തിരുവനന്തപുരം: ചെങ്ങന്നൂരിലെ ഭാസ്‌കര കാരണവര്‍ കൊലക്കേസിലെ ഒന്നാം പ്രതി ഷെറിനെ ജയിലില്‍ നിന്ന് മോചിപ്പിക്കാന്‍ ഇടപെട്ടത് മന്ത്രി ഗണേഷ് കുമാറാണെന്ന് കോണ്‍ഗ്രസ് നേതാവ് ജ്യോതി കുമാര്‍ ചാമക്കാല. ഷെറിനെ മോചിപ്പിക്കണമെന്ന ആവശ്യം മന്ത്രി സഭാ യോഗത്തില്‍ അവതരിപ്പിച്ചതും അനുകൂല തീരുമാനം ഉണ്ടായതിനും പിന്നില്‍ ഗണേഷ് കുമാറാണ്.
മുമ്പ് ഷെറിന് പരോള്‍ കിട്ടുമ്പോള്‍ പൊലീസ് സ്റ്റേഷനില്‍ ഒപ്പുവയ്‌ക്കാന്‍ ഒപ്പം പോയിരുന്നത് ഗണേഷ് കുമാറിന്റെ സന്തത സഹചാരി പ്രദീപ് കോട്ടാത്തലയാണെന്നും ജ്യോതികുമാര്‍ ചാമക്കാല പറഞ്ഞു. താന്‍ പറയുന്നത് ശരിയല്ലെങ്കില്‍ ഗണേഷ് കുമാര്‍ കേസ് കൊടുക്കട്ടെയെന്നും അദ്ദേഹം പറഞ്ഞു.
ഭാസ്‌കര കാരണവര്‍ കൊലക്കേസിലെ പ്രതി ഷെറിന് പത്തനാപുരം സ്വദേശിയാണ്. ജയിലില്‍ സഹതടവുകാരുമായി പല വട്ടം പ്രശ്‌നമുണ്ടാക്കിയ ഷെറിനെ വിവിധ ജയിലുകളിലേക്ക് മാറ്റിപ്പാര്‍പ്പിച്ചിരുന്നു. കണ്ണൂര്‍ സെന്‍ട്രല്‍ ജയിലില്‍ കഴിയവെയാണ് ഇപ്പോള്‍ മോചിപ്പിക്കാന്‍ ജയില്‍ ഉപദേശക സമിതി ശുപാര്‍ശ ചെയ്തതും മന്ത്രി സഭ അനുമതി നല്‍കിയതും.
ജീവപര്യന്തം തടവിന് ശിക്ഷിക്കപ്പെട്ട ഷെറിന്റെ ശിക്ഷ 14 വര്‍ഷം പൂര്‍ത്തിയായെന്നും സ്ത്രീയെന്നതും കണക്കിലെടുത്താണ് ജയില്‍ മോചനം. ഷെറിന് മാനസാന്തരം വന്നുവെന്നും ജയില്‍ ഉപദേശക സമിതി അംഗം പറഞ്ഞിരുന്നു..എന്നാല്‍ 20 വര്‍ഷത്തിലേറെയായി ജയിലില്‍ കഴിയുന്നവരുളളപ്പോഴാണ് ഷെറിനെ മോചിപ്പിക്കുന്നത്.ജയിലില്‍ കഴിയുമ്പോഴും
നിരവധി തവണ പരോള്‍ കിട്ടിയിരുന്നു ഷെറിന്.
ഭാസ്‌കര കാരണവരുടെ ഇളയ മകന്റെ ഭാര്യയായിരുന്ന ഷെറിന്റെ വഴി വിട്ട ബന്ധം അദ്ദേഹം കണ്ടെത്തുകയും സ്വത്ത് നല്‍കില്ലെന്നതും വ്യക്തമായതോടെയാണ് കാമുകന്‍ ബാസിത് അലിയുമായി ചേര്‍ന്ന് ഷെറിന് കൊലപാതകം നടത്തിയത്. കാമുകന്‍ ബാസിത് അലി ഇപ്പോള്‍ നെട്ടുകാല്‍ത്തേരി തുറന്ന ജയിലിലാണ്. ഇയാളെ മോചിപ്പിക്കാന്‍ ശുപാര്‍ശ ഉണ്ടായിട്ടില്ല.
ഷെറിനെ മോചിപ്പിക്കാനുളള മന്ത്രി സഭയുടെ തീരുമാനം ഗവര്‍ണര്‍ ഒപ്പുവയ്‌ക്കേണ്ടതുണ്ട്.
പ്രതികരിക്കാൻ ഇവിടെ എഴുതുക: