കൊൽക്കത്ത: മലയാളം, ഹിന്ദി ചലച്ചിത്ര രംഗത്തെ ബഹുമുഖപ്രതിഭ സഞ്ജീവ് ശിവന് പശ്ചിമബംഗാൾ ഗവർണറുടെ അതിവിശിഷ്ട പരംസമ്മാൻ. ഗവർണറുടെ സ്ക്രോൾ ഓഫ് ഓണർ, ഫലകം, ഒരുലക്ഷം രൂപ എന്നിവയുൾപ്പെട്ടതാണ് പുരസ്കാരം.
സംവിധായകൻ, തിരക്കഥാകൃത്ത് തുടങ്ങിയ നിലകളിൽ ചലച്ചിത്രമേഖലയ്ക്ക് നൽകിയ വിശിഷ്ട സേവനങ്ങൾ പരിഗണിച്ചാണ് ഈ പുരസ്കാരം. കൊൽക്കത്ത രാജ്ഭവനിൽ നടന്ന വർണാഭമായ ചടങ്ങിൽ ഗവർണർ ഡോ സി.വി ആനന്ദബോസ് പുരസ്കാരം സമ്മാനിച്ചു.
ഭാരതത്തിന്റെ തനതു ശക്തിയും സമ്പത്തും ആയുധശേഖരമല്ല, അതിന്റെ ആത്മീയ – കലാസാംകാരിക പൈതൃകമാണെന്ന് പുരസ്കാരം സമ്മാനിക്കവെ ഗവർണർ ആനന്ദബോസ് പറഞ്ഞു. ആ ‘സോഫ്റ്റ് പവ്വർ’ ലോകമെമ്പാടും പ്രചരിപ്പിക്കാനുള്ള കേന്ദ്രസർക്കാരിന്റെ പരിശ്രമം രാജ്യത്തെ ലോകത്തിന്റെ നെറുകയിലെത്തിക്കുമെന്നും അദ്ദേഹം കൂട്ടിച്ചേർത്തു.
ബോളിവുഡ് നടൻ സിക്കന്ദർ ഖേർ (വിശിഷ്ട് പരംസമ്മാൻ), ഡോ. ജ്യോതി ജാജു (അതിവിശിഷ്ട് പരംസമ്മാൻ), കൃതി മിശ്ര (വിശിഷ്ട് പരംസമ്മാൻ), അന്തര ശ്രീവാസ്തവ (പരംസമ്മാൻ), കുശാൽ ശ്രീവാസ്തവ (പരംസമ്മാൻ), ഡോ. രാജശ്രീ റായ് (പരംസമ്മാൻ), ബംഗാൾ ഫുട്ബോൾ ടീം (അതിവിശിഷ്ട് പരംസമ്മാൻ) എന്നിവർക്കാണ് ചടങ്ങിൽ ഗവർണർ പുരസ്കാരങ്ങൾ സമ്മാനിച്ചത്.
ബംഗാളി ഉൾപ്പെടെ വിവിധ ഭാഷകളിലെ ചലച്ചിത്രപ്രതിഭകൾക്കൊപ്പം മുൻപ് ശ്രീകുമാരൻ തമ്പി, ജഗതി ശ്രീകുമാർ, പ്രേംപ്രകാശ്, നടൻ ഉണ്ണി മുകുന്ദൻ, സംവിധായകൻ വിഷ്ണു മോഹൻ, എഴുത്തുകാരായ ഡോ എം.ലീലാവതി, പ്രൊഫ എം.കെ സാനു, ടി.പത്മനാഭൻ, കാനായി കുഞ്ഞിരാമൻ ഹോക്കിതാരം ശ്രീജേഷ് തുടങ്ങിയവരെയും ബംഗാൾ രാജ്ഭവൻ പുരസ്കാരം നൽകി ആദരിച്ചിരുന്നു.
ഈസ്റ്റേൺ സോണൽ കൾച്ചറൽ സെന്ററിന്റെ (EZCC) നേതൃത്വത്തിൽ
വംഗനാടിന്റെ സമ്പന്നമായ സാംസ്കാരിക പൈതൃകം വിളംബരം ചെയ്യുന്ന കലാവിരുന്നും പുരസ്കാരനിശയുടെ ഭാഗമായി നടന്നു.
