ന്യൂദല്‍ഹി: മഹാകുംഭമേളക്കാലത്ത് യൂട്യൂബിലും സമൂഹമാധ്യമങ്ങളിലും സുലഭമായി വീണ്ടും മഹാവതാര്‍ ബാബയെക്കുറിച്ചും ലാഹിരി മഹാശയനെക്കുറിച്ചും ചര്‍ച്ചകള്‍ നടക്കുകയാണ്. ഹിമാലയത്തില്‍ താമസിച്ച ഒരു യോഗിയും ഗുരുവുമാണ് മഹാവതാര്‍ ബാബാജി. ഇദ്ദേഹത്തിന് മരണമില്ല എന്നും 2000 വയസ്സുള്ള ഇദ്ദേഹം ഇന്നും മരണമില്ലാതെ ഹിമാലയസാനുക്കളില്‍ ജീവിക്കുന്നുണ്ടെന്നും വിശ്വസിക്കപ്പെടുന്നു. ക്രിയായോഗ എന്ന സവിശേഷയമായ ധ്യാനം കണ്ടുപിടിച്ചയാളാണ് മഹാവതാര്‍ ബാബാജി. പ്രാണായാമത്തിലൂടെയും ധ്യാനത്തിലൂടെയും ആത്മീയത ഉണര്‍ത്തുന്ന രീതിയാണ് ക്രിയായോഗ. പിന്നീട് അദ്ദേഹം ശിഷ്യനായ ലാഹിരി മഹാശയനെ ക്രിയായോഗ പഠിപ്പിച്ചു. ഈ രണ്ട് ഗുരുക്കന്മാരെക്കുറിച്ചും ലോകത്തിന് അറിവായത് പരമഹംസ യോഗാനന്ദ എഴുതിയ ‘ദി ഓട്ടോബയോഗ്രഫി ഓഫ് എ യോഗി’ എന്ന പുസ്തകത്തിലൂടെയാണ്. പരമഹംസ യോഗാനന്ദയുടെ ഗുരുവായ സ്വാമി യുക്തേശ്വര്‍ ഗിരിയുടെ ഗുരു കൂടിയായിരുന്നു ലാഹിരി മാഹാശയ്.
തന്റെ ഗുരു മഹാവതാര്‍ ബാബാജി തന്നെ ജീവിതത്തിലെ ഒരു പ്രധാനപാഠം പഠിപ്പിച്ചുതന്നത് ഒരു കുംഭമേളക്കാലത്താണെന്ന് ഒരു കഥയിലൂടെയാണ് ലാഹിരി മഹാശയ് ശിഷ്യര്‍ക്ക് വിവരിച്ചുകൊടുക്കുന്നത്. പരമഹംസ യോഗാനന്ദ രചിച്ച ‘ദി ഓട്ടോ ബോയഗ്രഫി ഓഫ് എ യോഗി’ എന്ന പുസ്തകത്തിലാണ് ഈ കഥ വിവരിച്ചത്. അലഹബാദിലെ കുംഭമേള നടക്കുമ്പോഴാണ് ഈ അനുഭവം ഉണ്ടായത്. ലാഹിരി മഹാശയ് ശിഷ്യന്‍മാരോട് ആ കഥ വിവരിക്കുന്നത് ഇങ്ങിനെ:”ഓഫീസ് ഡ്യൂട്ടിയ്‌ക്കിടെ കുറച്ചു ദിവസത്തേക്കാണ് ഞാന്‍ കുംഭമേള നടക്കുന്ന സ്ഥലത്ത് പോയത്. കുംഭമേളയില്‍ പങ്കെടുക്കാന്‍ എത്തിയ നിരവധി സന്യാസിമാരുടെയും സാധുക്കളുടെയും ഇടയിലൂടെ ഞാന്‍ ചുറ്റിത്തിരിയുകയാണ്. ഒരു ഭിക്ഷാപാത്രവും പിടിച്ച് നെറ്റിയാകെ ഭസ്മം പൂശിയ ഒരു സാധുവിനെ ഞാന്‍ കണ്ടു. ഇയാള്‍ ഒരു തട്ടിപ്പുകാരനാണെന്നാണ് ഒറ്റനോട്ടത്തില്‍ എനിക്ക് തോന്നിയത്. ഉള്ളില്‍ യാതൊരു ആത്മീയതയുമില്ലാതെ, വെറുതെ പുറത്ത് ഭസ്മം പൂശി ആളുകളെ പറ്റിക്കാനിരിക്കുന്ന ആളാണ് ഇതെന്ന് എനിക്ക് തോന്നി. ഈ കള്ളസന്യാസിയ്‌ക്ക് മുന്‍പിലൂടെ പോകുന്നതിനിടയിലാണ് ഞാന്‍ ഗുരു മഹാവതാര്‍ ബാബാജിയെ കണ്ടത്. ജട പിടിച്ച മുടിയുമായി ഇരിക്കുന്ന ആ തട്ടിപ്പുകാരന്‍ സന്യാസിയുടെ പിന്നിലായിരുന്നു ബാബാജി ഇരുന്നിരുന്നത്. “ഗുരോ…” എന്ന് വിളിച്ച് ഞാന്‍ ഓടിച്ചെന്നു. ഗുരു എന്താണ് ഇവിടെ ചെയ്യുന്നതെന്ന് ചോദിച്ച് ഞാന്‍ അദ്ദേഹത്തിന്റെ പാദങ്ങള്‍ കഴുകുകയും ഭക്ഷണം വെയ്‌ക്കാനുള്ള പാത്രങ്ങള്‍ കഴുകിക്കൊടുക്കുകയും ചെയ്തു. അപ്പോള്‍ ഒരു ശിശുവിന്റെ പുഞ്ചിരിയോടെ ഗുരു എന്റെ നേരെ നോക്കി. ആരെയും വിമര്‍ശിക്കരുതെന്ന സന്ദേശം എന്നിലേക്കെത്തിക്കാനാണ് ഈ നോട്ടമെന്ന് എനിക്ക് തോന്നി. നെറ്റിയില്‍ ഭസ്മം പൂശി ഭിക്ഷാപാത്രവുമായി ഇരിക്കുന്ന സാധുവിനെ കള്ളനാണെന്ന് ഞാന്‍ ഉള്ളില്‍ വിചാരിച്ചത് ഗുരുവിന് ഇഷ്ടപ്പെട്ടില്ല. എല്ലാ ശരീരത്തിലും ദൈവം ഒരു പോലെ കുടികൊള്ളുന്നു എന്നാണ് ബാബാജി എന്നെ മനസ്സിലാക്കിത്തരാന്‍ ശ്രമിച്ചത്. ബാബാജി എന്നോട് പറഞ്ഞു:”അറിവുള്ളവരും അറിവില്ലാത്തവരുമായ എല്ലാ സാധുക്കളേയും ഒരു പോലെ സേവിക്കുക വഴി, ദൈവത്തെ സന്തോഷിപ്പിക്കുന്ന ഏറ്റവും വലിയ നന്മ എന്താണെന്ന് ഞാന്‍ മനസ്സിലാക്കി- അത് വിനയമാണ്. വിനയത്തോടെ, താഴ്മയോടെ ഭേദവിചാരമില്ലാതെ എല്ലാവരേയും സേവിക്കുക അതാണ് മുഖ്യം.”. ഗുരു മഹാവതാര്‍ ബാബാജി ഇത് പറഞ്ഞപ്പോള്‍ എനിക്ക് കാര്യങ്ങള്‍ മനസ്സിലായി. അങ്ങിനെ അലഹബാദ് കുംഭമേളയിലെ ഒരു അനുഭവത്തിലൂടെ വലിയൊരു പാഠമാണ് മഹാവതാര്‍ ബാബാജി തനിക്ക് നല്‍കിയതെന്ന് ലാഹിരി മഹാശയ് ശിഷ്യരോട് പറഞ്ഞു.
പ്രതികരിക്കാൻ ഇവിടെ എഴുതുക: