ചണ്ഡീഗഡ്: ഹരിയാന മുഖ്യമന്ത്രി നയാബ് സിംഗ് സൈനി ബുധനാഴ്ച യമുന നദിയിൽ നിന്ന് വെള്ളം കുടിച്ചുകൊണ്ട് ആം ആദ്മി പാർട്ടിയെ ആക്രമിച്ചു. തന്റെ സംസ്ഥാനത്ത് നിന്ന് ദൽഹിയിലേക്ക് വരുന്ന വെള്ളത്തിൽ വിഷം ഇല്ലെന്നും അദ്ദേഹം പറഞ്ഞു.
എഎപി നേതാക്കളുടെ മനസ്സിൽ തീർച്ചയായും വിഷം നിറഞ്ഞിരിക്കുന്നുവെന്ന് അദ്ദേഹം ആരോപിച്ചു. ഹരിയാനയിലെ ഭരണകക്ഷിയായ ബിജെപി മനഃപൂർവ്വം വ്യാവസായിക മാലിന്യങ്ങൾ യമുനയിലേക്ക് ഒഴുക്കിവിടുകയാണെന്ന് എഎപി തിങ്കളാഴ്ച ആരോപിച്ചിരുന്നു. നദിയിൽ വിഷം കലർത്തി ആളുകളെ കൊല്ലാൻ ശ്രമിക്കുകയാണെന്നാണ് എഎപി കൺവീനർ അരവിന്ദ് കെജ്രിവാൾ ആരോപിച്ചത്.
ഡൽഹി നിയമസഭാ തെരഞ്ഞെടുപ്പിന് ദിവസങ്ങൾ ബാക്കി നിൽക്കെ കെജ്രിവാളിന്റെ യമുനയിൽ വിഷം എന്ന പരാമർശത്തിൽ ബിജെപി നേതൃത്വം
കടുത്ത പ്രതിഷേധം രേഖപ്പെടുത്തിയിട്ടുണ്ട്. എഎപിക്ക് മറുപടിയായി ഡൽഹി-ഹരിയാന അതിർത്തിയിലുള്ള ദഹിസ്ര ഗ്രാമത്തിനടുത്തുള്ള യമുന നദീതടത്തിൽ സൈനി സന്ദർശിക്കുകയും യമുനയിൽ നിന്ന് രണ്ട് തവണ അദ്ദേഹം വെള്ളം കുടിക്കുകയും ചെയ്തു. കൂടാതെ ഹരിയാന അതിർത്തിയിൽ നിന്ന് ഡൽഹിയിലേക്ക് പ്രവേശിക്കുന്ന യമുന ജലം, മാനദണ്ഡങ്ങൾ പാലിക്കുന്നുണ്ടെന്നും തെറ്റായ പ്രസ്താവനയ്ക്ക് കെജ്രിവാൾ ഡൽഹിയിലെയും ഹരിയാനയിലെയും ജനങ്ങളോട് മാപ്പ് പറയണമെന്നും അദ്ദേഹം ആവശ്യപ്പെട്ടു.
രാഷ്ട്രീയ സ്വാർത്ഥതയ്ക്ക് വേണ്ടി കെജ്രിവാൾ നൽകിയ പ്രസ്താവന നിർഭാഗ്യകരമാണ് എന്ന് സൈനി പറഞ്ഞു. നദീതീര സന്ദർശനത്തിന് തൊട്ടുമുമ്പ് ഡൽഹി മുഖ്യമന്ത്രി അതിഷിയുടെ എക്സിലെ ഒരു പോസ്റ്റിനും സൈനി ശക്തമായ മറുപടി നൽകി. അതിഷിയെ അദ്ദേഹം ഡമ്മി മുഖ്യമന്ത്രി എന്നാണ് വിളിച്ചത്. “ആം ആദ്മി പാർട്ടിയുടെ ‘ഖഡൗ’ മുഖ്യമന്ത്രി അതിഷി മർലേന ജി, പല്ലയിലെ യമുനയുടെ തീരത്തേക്ക് (അദ്ദേഹം സന്ദർശിച്ച ഘട്ട്) നിങ്ങളെ സ്വാഗതം ചെയ്യുന്നു. ഹരിയാനയിൽ നിന്ന് ഡൽഹിയിലേക്ക് വരുന്ന വെള്ളത്തിൽ വിഷമില്ല, പക്ഷേ നിങ്ങളുടെ മനസ്സ് തീർച്ചയായും വിഷം കൊണ്ട് നിറഞ്ഞിരിക്കുന്നു,” – സൈനി എക്സിലെ ഹിന്ദിയിലുള്ള ഒരു പോസ്റ്റിൽ പറഞ്ഞു.
കൂടാതെ എല്ലാവരുടെയും മുന്നിൽ വെച്ച് ഞങ്ങൾ അമോണിയയുടെ അളവ് അളക്കും. ഹരിയാനക്കാർ ഡൽഹിയിലെ ജനങ്ങൾക്ക് വിഷവെള്ളം അയയ്ക്കുന്നില്ലെന്ന് എല്ലാവരും അറിയണമെന്നും സൈനി പറഞ്ഞു.
ഇതിനു പുറമെ ഒരു മടിയും കൂടാതെയാണ് ഞാൻ ഹരിയാനയുടെ അതിർത്തിയിലുള്ള വിശുദ്ധ യമുനയിലെ വെള്ളം കുടിച്ചത്. എന്നാൽ അതിഷി വന്നില്ല. അവർ ഒരു പുതിയ നുണ തയ്യാറാക്കുകയായിരിക്കണം. നുണകൾക്ക് കാലുകളില്ല. അതുകൊണ്ടാണ് അവരുടെ നുണകൾ പ്രവർത്തിക്കാത്തതെന്നും അദ്ദേഹം പറഞ്ഞു.
