തിരുവനന്തപുരം: സംസ്ഥാനത്തെ റേഷന് വ്യാപാരികള് അനിശ്ചിത കാലത്തേക്ക് തുടങ്ങിയ സമരം പൂര്ണ്ണമായും പിന്വലിച്ചതായി ഭക്ഷ്യ-പൊതുവിതരണ വകുപ്പ് മന്ത്രി ജി ആര് അനില് പറഞ്ഞു. വ്യാപാരികളുമായി നടത്തിയ ചര്ച്ചയുടെ അടിസ്ഥാനത്തിലാണ് സമരം ഒത്തുതീര്പ്പില് എത്തിയത്. ഓരോ മാസത്തെയും കമ്മീഷന് അടുത്ത മാസം 15ാം തീയതിക്കുള്ളില് നല്കും. ഇതിനായി ധനമന്ത്രിയുമായി ചര്ച്ച നടത്തി ധാരണയില് എത്തി. എല്ലാ മാസവും 10 മുതല് 15 തീയതിക്കുള്ളില് റേഷന് വ്യാപാരികള്ക്കുള്ള കമ്മീഷന് നല്കുന്ന രീതിയില് വ്യവസ്ഥയുണ്ടാക്കാന് സിവില് സപ്ലൈസ് ഉദ്യോഗസ്ഥര്ക്കും നിര്ദ്ദേശം നല്കിയിട്ടുണ്ടെന്ന് മന്ത്രി പറഞ്ഞു.
റേഷന് വ്യാപാരികളുടെ കമ്മീഷന് പരിഷ്ക്കരണം സംബന്ധിച്ച ചര്ച്ചകള് മാര്ച്ചില് തുടങ്ങും. അര്ഹമായ വര്ധനവ് വേഗത്തില് നടപ്പിലാക്കും. അഞ്ച് സംഘടനകളുടെ ആഭിമുഖ്യത്തില് നടന്ന ചര്ച്ചയില് വ്യാപാരികള് തീരുമാനങ്ങള് അംഗീകരിച്ചു.
