കൊച്ചി: ആര്‍എസ്എസ് മുന്‍ പ്രാന്ത പ്രചാരക് കെ. ഭാസ്‌കര്‍ റാവുവിന്റെ ഓര്‍മകള്‍ നിറഞ്ഞ് കൊച്ചിയില്‍ നടന്ന സ്മൃതി ദിനാചരണം. പരിചയപ്പെടുന്നവരുമായി ആഴത്തിലുള്ള വ്യക്തി ബന്ധം സൂക്ഷിച്ചിരുന്നയാളായിരുന്നു ഭാസ്‌കര്‍ റാവുജിയെന്ന് ജന്മഭൂമി മുന്‍ മുഖ്യപത്രാധിപര്‍ പി. നാരായണന്‍ പറഞ്ഞു. ഭാസ്‌കര്‍റാവു സ്മാരക സമിതി എളമക്കര ഭാസ്‌ക്കരീയം കണ്‍വെന്‍ഷന്‍ സെന്ററില്‍ സംഘടിപ്പിച്ച യോഗത്തില്‍ അനുസ്മരണ പ്രഭാഷണം നടത്തുകയായിരുന്നു അദ്ദേഹം.
സാധിക്കുന്ന സമയത്തെല്ലാം സ്വയം സേവകരുടെ വീടുകളില്‍ പോകും. മലയാളം വശമില്ലെങ്കിലും കഴിയുന്നത് പോലെ അവരുമായി ആശയവിനിമയം നടത്തും. ഏത്രദൂരം ഇതിനായി നടക്കാനും മടിയില്ലായിരുന്നുവെന്നും അദ്ദേഹം അനുസ്മരിച്ചു.
എല്ലാവരേയും ഒപ്പം കൂട്ടി നടത്താനാണ് ഭാസ്‌കര്‍ജി ശ്രമിച്ചിരുന്നത്. മുന്നില്‍ നടക്കാതെ ഒപ്പം നടക്കുന്ന ഈ പ്രത്യേകയാണ് അദ്ദേഹത്തെ ഏവര്‍ക്കും പ്രിയപ്പെട്ടവനാക്കിയത്, പി. നാരായണന്‍ പറഞ്ഞു. പരിചയപ്പെട്ടത് മുതലുള്ള നിരവധി ഓര്‍മകളും പി. നാരായണന്‍ യോഗത്തില്‍ പങ്കുവെച്ചു.
കാസര്‍കോട് സെന്‍ട്രല്‍ യൂണിവേഴ്സിറ്റി ഓഫ് കേരള പ്രൊഫ. ആന്‍ഡ് ഡീന്‍ ഡോ. കെ. ജയപ്രസാദ് മുഖ്യപ്രഭാഷണം നടത്തി. കേരളത്തിലെ ആര്‍എസ്എസ് പ്രവര്‍ത്തനത്തിന് വിശാലമായ മാനം നല്‍കിയത് ഭാസകര്‍ജി ഉള്‍പ്പെടുന്ന മുതിര്‍ന്ന കാര്യകര്‍ത്താക്കളാണെന്നും ഡോ. കെ. ജയപ്രസാദ് പറഞ്ഞു. മുതിര്‍ന്ന അഭിഭാഷകന്‍ അഡ്വ. കെ. രാംകുമാര്‍ അധ്യക്ഷനായി. ആര്‍എസ്എസ് ജില്ലാ കാര്യവാഹ് വി.എസ്. രമേഷ്, എം. മോഹനന്‍ എന്നിവര്‍ സംസാരിച്ചു.
പ്രതികരിക്കാൻ ഇവിടെ എഴുതുക: