കന്യാകുമാരി: വിവേകാനന്ദ പാറയ്ക്കും തിരുവള്ളുവര്‍ പ്രതിമയ്ക്കും മധ്യേ കണ്ണാടിപ്പാലം തുറക്കുന്നു. തമിഴ്നാട് സര്‍ക്കാരിന്റെ പുതുവര്‍ഷ സമ്മാനമായാണ് ത്രിവേണി സംഗമ തീരത്ത് കണ്ണാടിപ്പാലം എത്തുന്നത്. ഇന്ന് വൈകിട്ട് തമിഴ്നാട് മുഖ്യമന്ത്രി എം.കെ.സ്റ്റാലിന്‍ കണ്ണാടിപ്പാലം ഉദ്ഘാടനം ചെയ്യും. വിവേകാനന്ദ പാറയെയും തിരുവള്ളുവര്‍ പ്രതിമയെയും ബന്ധിപ്പിക്കുന്നതാണ് കണ്ണാടിപ്പാലം. രാജ്യത്തെ ആദ്യത്തെ ഫൈബര്‍ ഗഌസ് പാലമാണിത്
37 കോടി രൂപ ചെലവില്‍ നിര്‍മ്മിക്കുന്ന കണ്ണാടി പാലത്തിന് 77 മീറ്റര്‍ നീളവും 10 മീറ്റര്‍ വീതിയും ആണുള്ളത്.കടല്‍ക്ഷോഭത്തെയും ശക്തമായ കടല്‍ക്കാറ്റിനേയും പ്രതിരോധിക്കുവാന്‍ ഏറ്റവും പുതിയ സാങ്കേതികവിദ്യ പ്രയോജനപ്പെടുത്തിയാണ് പാലം നിര്‍മ്മിച്ചിരിക്കുന്നത്.
തിരുവള്ളുവര്‍ പ്രതിമ സ്ഥാപിച്ചതിന്റെ രജതജൂബിലി ആഘോഷത്തിന്റെ ഭാഗമായാണ് കണ്ണാടി നടപ്പാലം നിര്‍മിച്ചത്.
കണ്ണാടിപ്പാലം തുറക്കുന്നതോടെ വിവേകാനന്ദ പാറയില്‍ നിന്നു തിരുവള്ളുവര്‍ പ്രതിമയിലേക്കു നടന്ന് എത്തിച്ചേരാന്‍ സാധിക്കും. പാലത്തിന്റെ മധ്യത്തില്‍ കട്ടിയുള്ള കണ്ണാടി സ്ഥാപിച്ച് തൂക്കുപാലത്തിന്റെ മാതൃകയിലാണ് പാലം നിര്‍മ്മിച്ചിരിക്കുന്നത്.
കടല്‍പ്പാലത്തിന്റെ ഉദ്ഘാടനത്തിനു മുന്നോടിയായി ടൗണില്‍ 10 കോടി രൂപയുടെ നവീകരണ പ്രവര്‍ത്തനങ്ങള്‍ നടത്തി. റോഡുകളുടെ നവീകരണം, ബോട്ടുജെട്ടിയില്‍ ടിക്കറ്റെടുക്കാന്‍ പുതിയ കാത്തിരിപ്പു കേന്ദ്രം എന്നിവയും നവീകരണ പ്രവര്‍ത്തനത്തില്‍ ഉള്‍പ്പെടും.
വിവേകനന്ദ പാറയിലേക്ക് ലക്ഷക്കണക്കിന് ആളുകള്‍ സന്ദര്‍ശിക്കാനെത്തുമെങ്കിലും അടുത്തുള്ള തിരുവള്ളുവര്‍ പ്രതിമ കാണാന്‍ എത്തുന്നവരുടെ എണ്ണം വളരെ പരിമിതമാണ് ഇത് മറികടക്കുകയും കണ്ണാടിപ്പാലത്തിന്റെ ഉദ്ദേശ്യമാണ്. വിവേകാനന്ദപ്പാറയില്‍ എത്തുന്നവര്‍ നിര്‍ബന്ധമായും തിരുവള്ളുവര്‍ പ്രതിമയും കാണണം എന്ന രീതിയില്‍ ക്രമീകരണം ഉണ്ടാകും.
വിവേകാനന്ദപ്പാറയുടെ സമീപത്തുള്ള മറ്റൊരു പാറയില്‍ തിരുവള്ളുവര്‍ പ്രതിമ സ്ഥാപിച്ച സമയത്ത് വിവാദം ഉണ്ടായിരുന്നു. വിവേകാനന്ദന്റെ പ്രാധാന്യം കുറയക്കാനാണ് നടപടി എന്നായിരുന്നു ആക്ഷേപം
