ന്യൂഡല്ഹി:മുന് പ്രധാനമന്ത്രി ഡോ. മന്മോഹന് സിംഗിന്റെ നിര്യാണത്തില് കേന്ദ്ര മന്ത്രിസഭ അനുശോചനം രേഖപ്പെടുത്തി. പ്രധാനമന്ത്രി നരേന്ദ്ര മോദിയുടെ അധ്യക്ഷതയില് ചേര്ന്ന യോഗത്തില് അദ്ദേഹത്തോടുള്ള ആദരസൂചകമായി രണ്ട് മിനിറ്റ് മൗനം ആചരിച്ചു.
ഡോ. മന്മോഹന് സിംഗിന്റെ മരണത്തെ തുടര്ന്ന് ജനുവരി 1 വരെ ഏഴ് ദിവസത്തേക്ക് ദേശീയ ദുഃഖാചരണം പ്രഖ്യാപിച്ചിരിക്കുകയാണ്. ഈ കാലയളവില് രാജ്യത്തുടനീളം ദേശീയ പതാക പകുതി താഴ്ത്തിക്കെട്ടും. അതുപോലെ വിദേശത്തുള്ള എല്ലാ ഇന്ത്യന് ദൗത്യസംഘങ്ങളുടെ ആസ്ഥാനങ്ങളിലും ദേശീയ പതാക പകുതി താഴ്ത്തും.
മുന് പ്രധാനമന്ത്രിക്ക് ഔദ്യോഗിക ബഹുമതികളോടെ സംസ്കാരം നടത്തും. സംസ്കാര ദിനത്തില് എല്ലാ കേന്ദ്ര സര്ക്കാര് ഓഫീസുകള്ക്കും കേന്ദ്ര പൊതുമേഖലാ സ്ഥാപനങ്ങള്ക്കും പകുതി ദിവസം അവധി നല്കുമെന്ന് മന്ത്രിസഭ തീരുമാനിച്ചു.
1932 സെപ്തംബര് 26ന് അഖണ്ഡ ഇന്ത്യയിലെ പഞ്ചാബ് പ്രവിശ്യയിലെ ഗാഹ് ഗ്രാമത്തില് ജനിച്ച ഡോ. മന്മോഹന് സിംഗ്, വിദ്യാഭ്യാസത്തിന്റെയും സേവനത്തിന്റെയും രംഗത്ത് അതുല്യമായ സംഭാവനകളാണ് നല്കിയിരിക്കുന്നത്. 1954ല് പഞ്ചാബ് സര്വ്വകലാശാലയില് നിന്ന് സാമ്പത്തികശാസ്ത്രത്തില് ബിരുദാനന്തര ബിരുദം നേടിയ അദ്ദേഹം, 1957ല് കേംബ്രിഡ്ജ് സര്വ്വകലാശാലയില് നിന്ന് ട്രിപ്പോസ് ബഹുമതികളോടെ ബിരുദം നേടി. ഓക്സ്ഫോര്ഡ് സര്വകലാശാലയില് നിന്ന് 1962ല് ഡോക്ടറേറ്റ് കരസ്ഥമാക്കിയ അദ്ദേഹം പിന്നീട് അക്കാദമിക് ലോകത്തും ആസ്ഥാന സ്ഥാപനങ്ങളിലും നിര്ണ്ണായക സ്ഥാനങ്ങള് അലങ്കരിച്ചു.
ഡോ. സിംഗിന്റെ ഔദ്യോഗിക ജീവിതം 1971ല് വിദേശ വ്യാപാര മന്ത്രാലയത്തിലെ സാമ്പത്തിക ഉപദേഷ്ടാവായി ആരംഭിച്ചു. ധനമന്ത്രാലയത്തിലെ മുഖ്യ സാമ്പത്തിക ഉപദേഷ്ടാവ്, റിസര്വ് ബാങ്ക് ഗവര്ണര്, ആസൂത്രണ കമ്മീഷന് മെമ്പര് സെക്രട്ടറി തുടങ്ങിയ നിലകളില് അദ്ദേഹം പ്രവര്ത്തിച്ചു. 1991ല് ധനമന്ത്രിയായി നിയമിതനായതോടെ ഇന്ത്യന് സാമ്പത്തിക പരിഷ്കരണങ്ങള്ക്കുള്ള വഴി തുറന്നു.
2004ല് ഇന്ത്യയുടെ പ്രധാനമന്ത്രിയായി ചുമതലയേറ്റ ഡോ. മന്മോഹന് സിംഗ്, 2014 വരെ ഈ സ്ഥാനത്ത് തുടര്ന്നു. അദ്ദേഹത്തിന്റെ നേതൃത്വത്തില് ഇന്ത്യ ആഗോള സാമ്പത്തിക വേദികളില് ശക്തമായ സ്ഥാനം ഉറപ്പിച്ചു.
പത്മവിഭൂഷണ് ഉള്പ്പെടെ വിവിധ പുരസ്കാരങ്ങള്ക്കും ബഹുമതികള്ക്കും അര്ഹനായ അദ്ദേഹം, സമര്പ്പിതനായ ഒരു നേതാവും രാജ്യസ്നേഹിയുമായിരുന്നു.
ഡോ. മന്മോഹന് സിംഗിന്റെ വേര്പാട് രാഷ്ട്രത്തിനുള്ള വലിയ നഷ്ടമാണെന്ന് കേന്ദ്ര മന്ത്രിസഭ അനുശോചന പ്രമേയത്തില് രേഖപ്പെടുത്തി. അദ്ദേഹത്തിന്റെ കുടുംബത്തിനും ബന്ധുമിത്രാദികള്ക്കും ഹൃദയപൂര്വ്വമായ അനുശോചനം മന്ത്രിസഭ രേഖപ്പെടുത്തി.
