ന്യൂദല്ഹി: ഭാരതത്തിന്റെ സമുദ്രപരിധിക്കുള്ളില് വന്ധാതുനിക്ഷേപം ഉണ്ടാകാനുള്ള സാധ്യതയുണ്ടെന്ന് കണ്ടെത്തല്. നാഷണല് ഇന്സ്റ്റിറ്റിയൂട്ട് ഓഫ് ഓഷ്യന് ടെക്നോളജി (എന്ഐഒടി), നാഷണല് സെന്റര് ഫോര് പോളാര് ഓഷ്യന് റിസര്ച്ച് (എന്സിപിഒആര്) എന്നീ സ്ഥാപനങ്ങളില് നിന്നുള്ള വിദഗ്ധ സംഘം സംയുക്തമായി നടത്തിയ സമുദ്രാന്തര്ഭാഗ പര്യവേക്ഷണത്തിലാണ് ധാതുനിക്ഷേപ സാധ്യത കണ്ടെത്തിയത്.
ഇന്ത്യന് മഹാസമുദ്രത്തില് ഭാരതത്തിന്റെ എക്സ്ക്ലൂസിവ് എക്കണോമിക് സോണില് വരുന്ന മേഖലയിലായിരുന്നു പര്യവേക്ഷണം. സമുദ്രത്തിനടിയില് 4500 മീറ്റര് താഴ്ചയിലായിരുന്നു പരിശോധന. എന്ഐഒടി വികസിപ്പിച്ച ഓഷ്യന് മിനറല് എക്സ്പ്ലോറര് എന്ന ആളില്ല അന്തര്വാഹിനി ഉപയോഗിച്ചായിരുന്നു പര്യവേക്ഷണം. സമുദ്രാന്തര്ഭാഗത്തുനിന്നുള്ള വിശദമായ വിവരങ്ങള് ഈ അന്തര്വാഹിനി വഴി ശേഖരിച്ചിട്ടുണ്ട്. ഇത് വിശകലനം ചെയ്തപ്പോള് ഹൈഡ്രോതെര്മല് സള്ഫൈഡ് ശേഖരം കണ്ടെത്തി. ധാതുനിക്ഷേപങ്ങള് ധാരാളമുള്ള സ്ഥലങ്ങളിലാണ് ഹൈഡ്രോതെര്മല് സള്ഫൈഡുകള് കാണപ്പെടുക.
സ്വര്ണം, വെള്ളി, കോപ്പര് തുടങ്ങിയ അമൂല്യ ലോഹധാതുക്കള് ഇത്തരം ഇടങ്ങളില് ഉണ്ടാകാനുള്ള സാധ്യത വളരെ കൂടുതലാണ്.’
ആഴക്കടല് പര്യവേക്ഷണം നടത്തി ധാതു, വാതക നിക്ഷേപങ്ങള് കണ്ടെത്താനുള്ള രാജ്യത്തിന്റെ പദ്ധതി പ്രകാരമാണ് സമുദ്രത്തില് പര്യവേക്ഷണം നടത്തിയത്. സമുദ്രാന്തര പര്യവേക്ഷണം നടത്താനുള്ള സാങ്കേതിക വിദ്യ വിജയമായതോടെ ഇനിയും കൂടുതല് ഗവേഷണങ്ങള് ഉണ്ടാകും. ഭാരതത്തിന്റെ ആഴക്കടല് പര്യവേക്ഷണ പദ്ധതിയായ സമുദ്രയാന്റെ ഭാഗമായി 6000 മീറ്റര് താഴ്ചയിലാകും ഇനി പര്യവേക്ഷണമെന്നും ഔദ്യോഗിക വൃത്തങ്ങള് അറിയിച്ചു.
