തിരുവനന്തപുരം: മുണ്ടക്കൈ, ചൂരല്മല ഉരുള്പൊട്ടല് ദുരന്തത്തില് സംസ്ഥാന സര്ക്കാര് കൃത്യമായ റിപ്പോര്ട്ട് നല്കിയിരുന്നുവെങ്കില് കേന്ദ്രം സഹായം അനുവദിച്ചേനെയെന്ന് ഗവര്ണര് ആരിഫ് മുഹമ്മദ് ഖാന്. പുനരധിവാസത്തിനായി സര്ക്കാരിതര സംഘടനകളും വ്യക്തികളും സഹായങ്ങള് വാഗ്ദാനം ചെയ്തു. എന്നാല് അവര്ക്ക് വേണ്ട സ്ഥലം നല്കാന് പോലും സംസ്ഥാന സര്ക്കാരിന് കഴിഞ്ഞിട്ടില്ലെന്നും ഗവര്ണര് വെളിപ്പെടുത്തി.
കേന്ദ്ര സഹായവുമായി ബന്ധപ്പെട്ട ചോദ്യത്തോട് പ്രതികരിക്കുകയായിരുന്നു ഗവര്ണര്.വയനാടിന് പ്രധാനമന്ത്രി തന്നെ നേരിട്ട് സഹായം വാഗ്ദാനം നല്കിയിട്ടുണ്ടെന്നും അത് പാലിക്കുമെന്നും അദ്ദേഹം വ്യക്തമാക്കി.
വ്യോമ സേന രക്ഷാ പ്രവര്ത്തന ദൗത്യങ്ങള്ക്ക് ഒരിക്കലും പണമീടാക്കാറില്ലെന്ന് ഗവര്ണര് വ്യക്തമാക്കി. ഇപ്പോള് സംസ്ഥാനം പണം നല്കണമെന്ന തരത്തില് വരുന്ന വാര്ത്തകള് മറ്റെന്തെങ്കിലും വിഷയവുമായി ബന്ധപ്പെട്ടായിരിക്കാം എന്നും അദ്ദേഹം പറഞ്ഞു. ചില നിയമങ്ങള് ഇതുമായി ബന്ധപ്പെട്ട് പാലിക്കേണ്ടി വരുമെന്നും ഗവര്ണര് പറഞ്ഞു.
