വേറിട്ട പ്രവര്‍ത്തനങ്ങളുമായി ഗുരുധര്‍മ്മ പ്രചാരകന്‍

ആലപ്പുഴ: ഗുരുധര്‍മ്മ പ്രചാരണത്തില്‍ നിസ്വാര്‍ത്ഥ സേവകനായ മുഹമ്മ സ്വദേശി ബേബി പാപ്പാളിയുടെ വേറിട്ട പ്രവര്‍ത്തനങ്ങള്‍ അംഗീകാര നിറവില്‍. 26 വര്‍ഷമായി പ്രതിമാസ ചതയദിന പ്രാര്‍ത്ഥന മുടങ്ങാതെ നടത്തിയ ബേബിപാപ്പാളിയുടെ ചതയദിന, ഷ്ഷഠി വ്രത കലണ്ടറുകളും ശ്രദ്ധേയമായി. തന്റെ ആശയത്തില്‍ ഉരുത്തിരിഞ്ഞ ചതയദിന, ഷഷ്ഠിവ്രത കലണ്ടറുകള്‍ 25 വര്‍ഷമായി സൗജന്യമായി വിതരണം ചെയ്യുകയാണ് അദ്ദേഹം.

ഓരോ മാസത്തെയും ചതയം, ഷഷ്ഠിവ്രത ദിനങ്ങള്‍ പെട്ടെന്ന് അറിയാന്‍ സാധിക്കുമെന്നതാണ് പ്രത്യേകത. ക്ഷേത്രങ്ങള്‍, ഗുരുദേവ മന്ദിരങ്ങള്‍, എസ്എന്‍ഡിപി യൂണിയനുകള്‍, ശാഖകള്‍, കുടുംബയൂണിറ്റുകള്‍ എന്നിവടങ്ങളില്‍ സൗജന്യമായി വിതരണം ചെയ്യുന്നു. തപാലിലൂടെയും, നേരിട്ടുമാണ് ഈ അറുപത്തിയാറുകാരന്‍ കലണ്ടര്‍ എത്തിക്കുന്നത്. തപാല്‍ ചാര്‍ജും സ്വന്തമായി വഹിക്കുന്നു. ഇതില്‍ നിന്ന് പ്രചോദനം ഉള്‍ക്കൊണ്ട് ഇപ്പോള്‍ പല ക്ഷേത്രങ്ങളും, എസ്എന്‍ഡിപി ശാഖകളും ഇത്തരത്തിലുള്ള കലണ്ടര്‍ പ്രസിദ്ധീകരിച്ചു തുടങ്ങി. ദിവസവും നാഴികയും പക്കങ്ങളുമൊക്കെ പഞ്ചാംഗത്തിന്റെ സഹായത്തോടെ രേഖപ്പെടുത്തി പ്രമുഖ ജ്യോതിഷ പണ്ഡിതനില്‍ നിന്ന് സംശയനിവൃത്തി വരുത്തിയാണ് കലണ്ടര്‍ തയാറാക്കുന്നത്.

ഗുരുധര്‍മ്മ പ്രചാരണ രംഗത്തെ മികച്ച സേവനത്തിന് 2015 ജനുവരി ഒന്നിന് ശിവഗിരി തീര്‍ത്ഥാടന സമ്മേളന വേദിയില്‍(ദൈവദശകം രചനാ ശതാബ്ദി ആഘോഷ സമാപനം) ബേബി പാപ്പാളിയെ ശിവഗിരി മഠം ഉപഹാരം നല്‍കി ആദരിച്ചിരുന്നു. കലവൂര്‍ ഗോപിനാഥ് പുരസ്‌കാരം, നിരവധി ക്ഷേത്രങ്ങളുടെ പുരസ്‌കാരങ്ങള്‍ തുടങ്ങിയവയും അദ്ദേഹത്തെ തേടിയെത്തി. കണിച്ചുകുളങ്ങര ദേവസ്വം ചതയദിന പ്രാര്‍ത്ഥനയുടെ പത്താം വാര്‍ഷികത്തിലും, ഇരുപത്തിയാറാം വാര്‍ഷികം പ്രമാണിച്ചും ആദരിച്ചു.

സംസ്ഥാനത്ത് ആദ്യമായി എസ്എന്‍ഡിപി യോഗം കുടുംബയൂണിറ്റ് പ്രാര്‍ത്ഥനയ്‌ക്ക് തുടക്കം കുറിച്ചതും ബേബി പാപ്പാളിയാണ്. ഇതിനകം ആറായിരത്തോളം വേദികളില്‍ പ്രാര്‍ത്ഥനാ ചടങ്ങുകള്‍ക്ക് നേതൃത്വം നല്‍കി. ഗുരുദേവ സംബന്ധമായ ലഘുലേഖകകള്‍, ചിത്രങ്ങള്‍, ചിത്രകാര്‍ഡുകള്‍ എന്നിവ വിതരണം ചെയ്യുന്നുണ്ട്. ഗുരുദേവ സൗരഭം, ഗുരുദേവ വന്ദനം
എന്നീ പ്രാര്‍ത്ഥനാ പുസ്തകങ്ങളും പ്രസിദ്ധീകരിച്ചിട്ടുണ്ട്. ശിവഗിരി തീര്‍ത്ഥാടനം കൊടിക്കയര്‍ പദയാത്രയില്‍ തുടര്‍ച്ചയായി മൂന്നു വര്‍ഷവും, ശിവഗിരിയിയില്‍ എല്ലാ വര്‍ഷവും നടക്കുന്ന ശ്രീനാരായണ ധര്‍മ്മമീമാംസ പരിഷത്തില്‍ 20 വര്‍ഷവും പങ്കെടുത്തു.

ഗുരുദേവന്റെ ആദ്യ ക്ഷേത്ര പ്രതിഷ്ഠയായ അരുവിപ്പുറം പ്രതിഷ്ഠയുടെ ശതാബ്ദി ആഘോഷ ചടങ്ങിലും ഗുരുവിന്റെ അവസാനത്തെ പ്രതിഷ്ഠയായ ഉല്ലല ഓംകാരേശ്വരം ക്ഷേത്രത്തിലെ നവതി ആഘോഷത്തിലും ശിവഗിരി ശാരദ പ്രതിഷ്ഠയുടെ 110-ാം വാര്‍ഷിക ചടങ്ങിലും പങ്കെടുക്കാന്‍ ഭാഗ്യം ലഭിച്ചു. ആത്മിയ രംഗത്തെ മികച്ച സേവനത്തിന് പ്രാര്‍ത്ഥനാ രത്‌നം ബഹുമതിയും ലഭിച്ചിട്ടുണ്ട്. ഗുരുധര്‍മ്മ പ്രചാരണത്തിനായി സര്‍വസ്വവും സമര്‍പ്പിക്കുന്ന ഈ ഗുരുഭക്തന്‍ ശിവഗിരി മഠത്തിന്റെ ഉത്തമ ബന്ധുക്കളില്‍ അത്യുത്തമനെന്ന് വിശേഷിപ്പിക്കാവുന്ന വ്യക്തിത്വമാണ്.