തിരുവനന്തപുരം: ബലാത്സംഗക്കേസില്‍ നടന്‍ സിദ്ദിഖിന് ഉപാധികളോടെ ജാമ്യം. കേരളം വിടാന്‍ പാടില്ല, ഒരു ലക്ഷം രൂപ കെട്ടിവയ്‌ക്കണം എന്നീ ഉപാധികളോടെയാണ് തിരുവനന്തപുരം ജില്ലാ മജിസ്‌ട്രേറ്റ് കോടതി ജാമ്യം അനുവദിച്ചത്.
അന്വേഷണത്തോടു സഹകരിക്കണം, ഉദ്യോഗസ്ഥന്‍ ആവശ്യപ്പെടുമ്പോള്‍ ഹാജരാകണം, പാസ്‌പോര്‍ട്ട് കോടതിയില്‍ കെട്ടിവയ്‌ക്കണം, കേസുമായി ബന്ധപ്പെട്ട് പരാതിക്കാരിയെയോ പരാതിക്കാരിയുടെ ബന്ധുക്കളെയോ സമീപിക്കരുത്, തെളിവുകള്‍ നശിപ്പിക്കരുത് എന്നിങ്ങനെ നിബന്ധനകളും കോടതി മുന്നോട്ട് വച്ചിട്ടുണ്ട്.
കേസില്‍ രാവിലെ നാര്‍ക്കോട്ടിക് സെല്‍ അസിസ്റ്റന്റ് കമ്മീഷണര്‍ അജി ചന്ദ്രന്‍ മുന്‍പാകെ താരം ഹാജരായിരുന്നു. ചോദ്യംചെയ്യലിനു ശേഷം സിദ്ദിഖിനെ അറസ്റ്റ് ചെയ്തു കോടതിയില്‍ ഹാജരാക്കുകയായിരുന്നു. കേസില്‍ സുപ്രീംകോടതി നേരത്തെ സിദ്ദിഖിന് മുന്‍കൂര്‍ ജാമ്യം അനുവദിച്ചസാഹചര്യത്തിലാണ് അദ്ദേഹത്തെ വിട്ടയച്ചത്.
അതിനിടെ സിദ്ദിഖ് അന്വേഷണത്തോട് സഹകരിക്കുന്നില്ലെന്ന് വീണ്ടും പൊലീസ് കോടതിയെ അറിയിച്ചു. അന്വേഷണ സംഘത്തെ തെറ്റിദ്ധരിപ്പിക്കാന്‍ താരം ശ്രമിച്ചുവെന്നും കര്‍ശന ജാമ്യവ്യവസ്ഥകള്‍ വേണമെന്നും പ്രോസിക്യൂഷന്‍ കോടതിയില്‍ ആവശ്യപ്പെട്ടിരുന്നു.
