ഇന്നത്തെ യുവ തലമുറ റൊമാൻ്റിക്കാണ്;’മിസ് യു’ ട്രെയിലർ ലോഞ്ചിൽ കാർത്തി

സാധാരണയായി ഒരു താരം മറ്റൊരു താരത്തിന്റെ സിനിമയുടെ ചടങ്ങുകളിൽ പങ്കെടുക്കുന്ന പതിവില്ല. പ്രത്യേകിച്ച് തമിഴ് സിനിമാ രംഗത്ത്. ഇതിന് വിരുദ്ധമായ ഒന്നായിരുന്നു കഴിഞ്ഞ ദിവസം ചെന്നൈയിൽ നടന്ന സിദ്ധാർത്ഥിന്റെ റൊമാൻ്റിക് കംബാക്ക് ചിത്രമായ ‘ മിസ് യു ‘ വിന്റെ ഓഡിയോ – ട്രെയിലർ ലോഞ്ച്. നടൻ കാർത്തിയായിരുന്നു വിശിഷ്ട അതിഥിയായി എത്തി ട്രെയിലർ ലോഞ്ച് നടത്തിയത്. ട്രെയിലർ പുറത്തിറക്കി സംസാരിച്ച താരം ഇന്നത്തെ പിള്ളേർക്ക് പ്രണയ കഥാ ചിത്രങ്ങളാണ് ഇഷ്ടം. എന്നാൽ അത് മനസിലാക്കാതെ ആക്ഷൻ സിനിമകൾ നിർമ്മിക്കുന്നാത്തിലാണ് എല്ലാവരുടെയും ശ്രദ്ധ എന്ന് അഭിപ്രായപ്പെട്ടു.
കാർത്തിയുടെ വാക്കുകൾ…

” ഇന്നത്തെ നമ്മുടെ പിള്ളേർ അധികവും ഉപയോഗിക്കുന്ന വാക്കുകളാണ് ‘ ലൗ യൂ ‘ , ‘ മിസ് യു ‘ എന്നിവ. അതിൽ തന്നെ വളരെ ആകർഷകമായ വാക്കായ ‘ മിസ് യു ‘ വിനെയാണ് ടൈലറ്റിൽ ആയി സ്വീകരിച്ചിരിക്കുന്നത്. ആൺ കുട്ടികൾ സോഷ്യൽ മീഡിയായിൽ ചെയ്യുന്ന പോസ്റ്റുകളൊക്കെ ലൗ പോസ്റ്റുകളാണ്. പക്ഷെ നമ്മൾ എടുത്തു കൊണ്ടിരിക്കുന്നതൊക്കെ ആക്ഷൻ സിനിമകളാണ് . വീണ്ടും ഒരു ആക്ഷൻ സിനിമ എടുത്ത്, അതിൽ ഒരു ലൗ ഫെയിലിയർ പാട്ടും , മദ്യപാന രംഗവുമായി ഈ സിനിമ ഞാൻ പഠിക്കുന്ന കാലത്ത് കണ്ട് ആസ്വദിച്ച സിനിമ പോലെ തോന്നുന്നു ഇതിന്റെ ട്രെയിലർ കാണുമ്പോൾ.

‘ ഇളയ ദളപതി ‘ വിജയ് സാറിന്റെ ‘ തുള്ളാത മനമും തുള്ളും ‘ എന്ന സിനിമ എനിക്ക് ഏറ്റവും ഇഷ്ടപ്പെട്ട സിനിമയാണ്. അതിലെ പാട്ടുകൾ, പ്രണയം, അതിനെ ചുറ്റി പറ്റിയുള്ള വിഷയങ്ങൾ എന്നിങ്ങനെ അത് ഇപ്പോൾ കണ്ടാലും ഉത്സാഹവും ഉന്മേഷവും നൽകും. അതു പോലുള്ള സിനിമകൾക്കായി ആരാധകർ ആകാംക്ഷയോടെ കാത്തിരിക്കയാണ്. എന്നാൽ അത്തരം സിനിമകൾ ഇപ്പോൾ എടുക്കുന്നില്ല. സിദ്ധാർഥ് ‘ ബോയ്സ് ‘ സിദ്ധാർത്ഥ് ആയതു കൊണ്ട് ഇപ്പോഴും പ്രേമിച്ചു കൊണ്ടിരിക്കുന്നു. കാഴ്ചയിലും ചെറുപ്പമായതു കൊണ്ട് അദ്ദേഹത്തിന് അതു വലിയ സൗകര്യമാണ്. ഈ സിനിമ എന്റെ യൗവ്വന കാലത്തിലേക്ക് കൂട്ടികൊണ്ടു പോകുന്ന ഒന്നായിരിക്കും. എന്നെ പോലെ തന്നെ പ്രേക്ഷകരെയും.സിദ്ധാർത്ഥ് ഒരു സിനിമ തിരഞ്ഞെടുക്കുന്നുവെങ്കിൽ അതിൽ എന്തെങ്കിലും പ്രത്യേകത ഇല്ലാതിരിക്കില്ല.

‘ മിസ് യു ‘ നായിക ആഷിക രംഗനാഥ് എന്റെ നായികയായി ‘ സർദാർ 2 ‘ – ൽ അഭിനയിക്കുന്നുണ്ട്. വളരെ സിൻസിയറായ നടിയാണ് അവർ. ‘ മിസ് യു ‘വിൽ അവരെ കാണാൻ അതീവ സുന്ദരിയായിട്ടുണ്ട്. അവർക്ക് എന്റെ ആശംസകൾ. ഇത് യൂത്തിന്റെ സിനിമയാണ്. റൊമാൻ്റിക് എൻ്റർടൈനറായ ‘ മിസ് യു ‘ വൻ വിജയമാകട്ടെ എന്ന് ആശംസിക്കുന്നു. ”
സിദ്ധാർത്തിനെയും സംഘത്തെയും പ്രശംസിച്ചു കൊണ്ട് കാർത്തി പറഞ്ഞു.

കാർത്തി പുറത്തിറക്കിയ ‘ മിസ് യു ‘ വിന്റെ ട്രെയിലർ ഒറ്റ ദിവസം കൊണ്ട് ഒരു മില്യനിലേറെ കാഴ്ച്‌ക്കാരെ ആകർഷിച്ചു കൊണ്ടു യൂ ട്യൂബിൽ തരംഗമായി മുന്നേറുകയാണ്.അതു തന്നെ സിനിമയെ കുറിച്ചുള്ള പ്രതീക്ഷ വർധിപ്പിച്ചിരിക്കയാണ്. സിദ്ധാർത്ഥ് റൊമാൻ്റിക് ഹീറോ ആയി തിരിച്ചെത്തുന്ന റൊമാൻ്റിക് ഫീൽ ഗുഡ് സിനിമയായിരിക്കും എൻ. രാജശേഖർ തിരക്കഥ എഴുതി സംവിധാനം ചെയ്ത ‘ മിസ് യു ‘ എന്നാണ് അണിയറശില്പികൾ പറയുന്നത്. 7 മൈൽ പെർ സെക്കൻ്റ്സിന്റെ ബാനറിൽ മലയാളിയായ സാമുവൽ മാത്യുവാണ് ചിത്രം നിർമ്മിച്ചിരിക്കുന്നത്. ജിബ്രാനാണ് സംഗീതം. ശരത് ലോഹിത്ഷാ,പൊൻവണ്ണൻ, ജെ പി, നരേൻ, കരുണാകരൻ, ബാല ശരവണൻ, അനുപമ കുമാർ, രമ, ഷഷ്ടിക എന്നിങ്ങനെ പ്രഗൽഭരായ അഭിനേതാക്കൾ മറ്റു കഥാപാത്രങ്ങളെ അവതരിപ്പിക്കുന്നു. ഡിസംബർ 13 ന് റെഡ് ജെയിൻ്റ് മൂവീസ് ചിത്രം റിലീസ് ചെയ്യും.

പി ആർ ഓ  സി. കെ. അജയ് കുമാർ