ജയ്പൂർ: നിർബന്ധിത മത പരിവർത്തനം തടയാനുള്ള ബിൽ കൊണ്ടുവരാൻ രാജസ്ഥാൻ സർക്കാർ.മുഖ്യമന്ത്രി ഭജൻലാൽ ശർമ്മയുടെ അധ്യക്ഷതയിൽ ചേർന്ന മന്ത്രിസഭാ യോഗമാണ് ബിൽ അവതരിപ്പിക്കാൻ അംഗീകാരം നൽകിയത് . വരുന്ന നിയമസഭ സമ്മേളനത്തിൽ ബില് അവതരിപ്പിക്കുമെന്ന് നിയമമന്ത്രി ജോഗറാം പട്ടേൽ അറിയിച്ചു.
കബളിപ്പിച്ച് വ്യാജ മതപരിവർത്തനം നടത്തുന്നവർക്കെതിരെ കർശന നടപടിക്ക് ഒരുങ്ങുകയാണ് സംസ്ഥാന സർക്കാർ. സംസ്ഥാനത്ത് നിർബന്ധിത മതപരിവർത്തനം തടയാൻ പ്രത്യേക നിയമമില്ലെന്നും മന്ത്രി പറഞ്ഞു. ഇത് മുതലെടുത്താണ് ക്രിമിനൽ സംഘം ഇത്തരം സംഭവങ്ങൾ നടത്തുന്നതെന്നും നിയമമന്ത്രി ജോഗറാം പട്ടേൽ പറഞ്ഞു.
നിർദ്ദിഷ്ട ബിൽ നിയമമായതിന് ശേഷം, ഒരു സ്ഥാപനത്തിനോ വ്യക്തിക്കോ ആരെയും നിർബന്ധിച്ച് മതപരിവർത്തനം നടത്താൻ കഴിയില്ല. അങ്ങനെ ചെയ്യുന്നവർക്കെതിരെ നിയമപ്രകാരം കർശന നടപടി സ്വീകരിക്കും.’രാജസ്ഥാൻ പ്രൊഹിബിഷൻ ഓഫ് അൺലോഫുൾ കൺവേർഷൻ ഓഫ് റിലിജിയൻ ബിൽ-2024’ൽ, മതം മാറാൻ ഉദ്ദേശിച്ച് ഒരാളെ വിവാഹം കഴിച്ചാൽ, കുടുംബ കോടതിക്ക് അത് നിയമവിരുദ്ധമായി പ്രഖ്യാപിക്കാമെന്നും സംസ്ഥാന സർക്കാർ വ്യവസ്ഥ ചെയ്തിട്ടുണ്ട്.
കുറ്റകൃത്യങ്ങൾ ജാമ്യം ലഭിക്കാത്തതും,നിർബന്ധിത മതപരിവർത്തനത്തിന് 10 വർഷം കഠിന തടവ് ശിക്ഷ ലഭിക്കുന്നതുമാണ്.സ്വന്തം ഇഷ്ടപ്രകാരം മതം മാറുന്നതിന്, 60 ദിവസം മുമ്പ് ജില്ലാ മജിസ്ട്രേറ്റിനെ അറിയിക്കണമെന്നും നിയമം ബില്ലിൽ പറയുന്നു.
