കോഴിക്കോട്: കൊടുവള്ളിയിലെ സ്വര്‍ണക്കവര്‍ച്ചയില്‍ അഞ്ചു പേര്‍ പിടിയിലായി. മുത്തമ്പലം സ്വദേശിയും ജ്വല്ലറി ഉടമയുമായ ബൈജുവിനെ ആക്രമിച്ച് രണ്ടു കിലോ സ്വര്‍ണം കവര്‍ന്ന കേസില്‍ രമേശ്, വിപിന്‍, ഹരീഷ്, ലതീഷ്, വിമല്‍ എന്നിവരെയാണ് പിടികൂടിയത്.
പ്രത്യേക അന്വേഷണ സംഘം പാലക്കാട് ,തൃശൂര്‍ ഭാഗങ്ങളില്‍ നിന്നാണ് ഇവരെ കസ്റ്റഡിയില്‍ എടുത്തത്. കഴിഞ്ഞ രാത്രി പത്ത് മണിയോടെ കൊടുവള്ളി മാനിപുരം റോഡിലായിരുന്നു സംഭവം. സ്‌കൂട്ടറില്‍ വീട്ടിലേക്ക് പോവുകയായിരുന്ന ബൈജുവിനെ കാര്‍ ഇടിച്ചു വീഴ്‌ത്തിയായിരുന്നു കവര്‍ച്ച.
പ്രതികളില്‍ നിന്നും 1.3 കിലോയോളം സ്വര്‍ണവും കണ്ടെടുത്തു. കവര്‍ച്ച ശ്രമം ചെറുത്ത ബൈജുവിനെ കത്തി കാട്ടി ഭീഷണിപ്പെടുത്തിയാണ് സംഘം കടന്നത്.
കാര്‍ ഇടിച്ചു വീഴ്‌ത്തിയതിനെ തുടര്‍ന്ന് തെറിച്ചു വീണ ബൈജുവിന്റെ പക്കലുണ്ടായിരുന്ന ബാഗിലെ സ്വര്‍ണവുമായി സംഘം കാറില്‍ കയറി കടന്നുകളയുകയായിരുന്നു.സിസിടിവി ദൃശ്യങ്ങള്‍ കേന്ദ്രീകരിച്ച് പൊലീസ് നടത്തിയ അന്വേഷണത്തിലാണ് പ്രതികള്‍ കുടുങ്ങിയത്.
