കോഴിക്കോട്: സന്തോഷ് ട്രോഫി പ്രാഥമിക റൗണ്ടിലെ രണ്ടാം മത്സരത്തില്‍ കേരളം ഇന്ന് ലക്ഷദ്വീപിനെ നേരിടും. ഉച്ച തിരിഞ്ഞ് മൂന്നരയ്‌ക്കാണ് കോഴിക്കോട് കോര്‍പ്പറേഷന്‍ സ്റ്റേഡിയത്തിലെ പോരാട്ടം.
ആദ്യ മത്സരത്തില്‍ റെയില്‍വേസിനെ എതിരില്ലാത്ത ഒരു ഗോളിന് തോല്‍പ്പിച്ചിരുന്നു. ആദ്യ റൗണ്ട് ഏറ്റുമുട്ടല്‍ കഴിഞ്ഞപ്പോള്‍ കൂടുതല്‍ ഗോളുകള്‍ നേടിയതിന്റെ ബലത്തില്‍ പുതുച്ചേരിയാണ് പോയിന്റ് പട്ടികയില്‍ കേരളത്തെക്കാള്‍ മുന്നില്‍ നില്‍ക്കുന്നത്. ഗ്രൂപ്പ് എച്ചിലാണ് കേരളം, പുതുച്ചേരി, ലക്ഷദ്വീപ്, റയില്‍വേസ് ടീമുകളുള്ളത്. ഗ്രൂപ്പിലെ എല്ലാ മത്സരങ്ങളും കോഴിക്കോട്ടാണ് നടക്കുക. ഗ്രൂപ്പ് ജേതാക്കളാകുന്നവര്‍ മാത്രമായിരിക്കും ഫൈനല്‍സിലേക്ക് യോഗ്യത നേടുക.
ഗ്രൂപ്പ് എഫില്‍ ഇന്നലെ നടന്ന പോരാട്ടത്തില്‍ ഒഡീഷ എഫ്‌സി വമ്പന്‍ ജയം സ്വന്തമാക്കി. മധ്യപ്രദേശിനെതിരെ 6-1നാണ് ടീം ജയിച്ചത്. ആദ്യപകുതിയില്‍ എതിരില്ലാത്ത നാല് ഗോളുകള്‍ക്ക് മുന്നിട്ടു നിന്ന ഓഡീഷ രണ്ടാം പകുതിയില്‍ രണ്ട് ഗോളുകള്‍ കൂടി നേടി. ടീം 5-0ന് ജയം ഉറപ്പിച്ചുനില്‍ക്കെയായിരുന്നു മധ്യപ്രദേശിന്റെ ആശ്വാസ ഗോള്‍. സന്തോഷ് ട്രോഫിയില്‍ ഒഡീഷയുടെ ഇത്തവണത്തെ ആദ്യ മത്സരമായിരുന്നു ഇന്നലത്തേത്.
