ചെന്നൈ: ഡോക്ടറായ ഈ നടിക്ക് അഭിനയം പാഷന്‍ ആണ്. എന്ന് വെച്ച് പണം കിട്ടിയാല്‍ ഏത് റോളും ചെയ്യാനൊന്നും തയ്യാറല്ല. കഥ വായിച്ച് നോക്കി ഇഷ്ടപ്പെട്ടാലേ കരാറില്‍ ഒപ്പിടൂ.
ഇപ്പോഴിതാ സൗന്ദര്യം വര്‍ധിപ്പിക്കാന്‍ ഉതകുന്ന ക്രീമന്റെ പരസ്യത്തില്‍ അഭിനയിക്കാന്‍ രണ്ട് കോടിയുടെ ഓഫര്‍ ലഭിച്ചിട്ടും ആ ഓഫര്‍ നിരസിച്ചിരിക്കുകയാണ് ഡോക്ടര്‍ കൂടിയായ നടി. കാരണം മറ്റൊന്നുമല്ല, ഉപഭോക്താക്കളെ വഞ്ചിക്കാന്‍ താല്‍പര്യമില്ല എന്നത് തന്നെ. ക്രീം തേച്ച് സൗന്ദര്യം വര്‍ധിപ്പിക്കുന്നതിലല്ല, പകരം പ്രകൃതിദത്ത സൗന്ദര്യത്തിലും ആത്മവിശ്വാസത്തിലുമാണ് സായി പല്ലവി വിശ്വസിക്കുന്നത്. അതുകൊണ്ടാണ് ഇത്രയും വലിയ പ്രതിഫലമായിട്ടും പരസ്യത്തിലെ അവസരം നിഷേധിച്ചത്.
ഈ നടി മറ്റാരുമല്ല. ഇപ്പോള്‍ അമരന്‍ എന്ന സിനിമയില്‍ മേജറിന്റെ ഭാര്യയായി തകര്‍ത്തഭിനയിച്ച് ലോകത്തിന്റെ മുഴുവന്‍ ആദരവും പിടിച്ചുപറ്റിയ സായി പല്ലവി. സൗന്ദര്യവര്‍ധക ക്രീമിന്റെ പരസ്യത്തില്‍ അഭിനയിച്ച് സ്ത്രീകള്‍ക്ക് തെറ്റായ സന്ദേശം അയക്കാന്‍ താല്‍പര്യമില്ലെന്നാണ് സായി പല്ലവി അവകാശപ്പെടുന്നത്.
സ്ത്രീകളില്‍ പ്രകൃതിദത്ത സൗന്ദര്യവും ആത്മവിശ്വാസവും വളര്‍ത്താന്‍ പ്രവര്‍ത്തിക്കുക എന്നതില്‍ വിശ്വസിക്കുന്ന നടിയാണ് സായി പല്ലവി. അഭിനയത്തോടൊപ്പം തന്റെ ഡോക്ടര്‍ എന്ന പ്രൊഫഷനെയും സായി പല്ലവി സ്നേഹിക്കുന്നു. ജോര‍്ജ്ജിയയിലെ ബിലിസി സ്റ്റേറ്റ് മെഡിക്കല്‍ സര്‍വ്വകലാശാലയില്‍ നിന്നാണ് എംബിബിഎസ് ബിരുദം നേടിയത്. നന്നായി നൃത്തം ചെയ്യുന്ന സായി പല്ലവി പക്ഷെ നൃത്തം സ്വയം പഠിച്ചതാണ്. 2015ല്‍ പ്രേമം എന്ന മലയാളസിനിമയിലൂടെയാണ് സിനിമയില്‍ അരങ്ങേറിയത്. പിന്നീട് എന്‍ജികെ, കലി, മാരി 2 തുടങ്ങിയ സിനിമകളിലൂടെ ശ്രദ്ധേയയായ നായികയായി മാറി.
പ്രതികരിക്കാൻ ഇവിടെ എഴുതുക